ອີກຂ່າວເດັ່ນໃນປີ 2023 ນີ້, ສຳນັກຂ່າວສານປະເທດ ໄດ້ນຳສະເໜີເຫດການສຳຄັນ ໂດຍສະເພາະ ການເພີ່ມທະວີການພົວພັນຮ່ວມມືຫລາຍຂົງເຂດ ລະຫວ່າງສປປ ລາວ ແລະ ບັນດາປະເທດສະມາຊິກອາຊຽນ ພາຍຫລັງທີ່ໄດ້ຮັບກຽດເປັນເຈົ້າພາບ ຈັດຫລາຍກອງປະຊຸມລະດັບອາຊຽນ ເພື່ອປຶກສາຫາລືຫລາຍບັນຫາສຳຄັນ ຂອງແຕ່ລະຂະແໜງການ ໃນຂອບອາຊຽນ ແລະ ເພື່ອຮັດແໜ້ນການຮ່ວມມື ລະຫວ່າງບັນດາປະເທດອາຊຽນ ແລະ ປະເທດຄູ່ຮ່ວມມື ເປັນຕົ້ນ, ກອງປະຊຸມ ຄະນະກຳມະທິການທ່ອງທ່ຽວອາຊຽນ; ກອງປະຊຸມເຈົ້າໜ້າທີ່ອາວຸໂສວັດທະນະທຳ ແລະ ສິລະປະອາຊຽນ ຄັ້ງທີ 19, ກອງປະຊຸມ ລັດຖະມົນຕີ ໄອຊີທີ ອາຊຽນຄັ້ງທີ 19; ກອງປະຊຸມຫົວໜ້າຕໍາຫລວດ ອາ ຊຽນ ຄັ້ງທີ 41 ແລະ ກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ(CLV)ຄັ້ງທີ 1.
ສະເພາະກອງປະຊຸມຄະນະກຳມະທິການທ່ອງທ່ຽວອາຊຽນ ເຊິ່ງແມ່ນ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເປັນເຈົ້າພາບ ໄດ້ມີການປຶກສາຫາລືການຈັດຕັ້ງປະຕິບັດ ບັນ ດາກິດຈະກຳຕ່າງໆ ຕາມຜົນຂອງການຕົກລົງເຫັນດີຂອງກອງປະຊຸມ ເຈົ້າໜ້າທີ່ອາວຸໂສທ່ອງທ່ຽວອາ ຊຽນ ຄັ້ງທີ 58 ແລະ ກອງປະຊຸມປິ່ນອ້ອມອື່ນໆ ທີ່ຈັດຂຶ້ນຢູ່ປະເທດມາເລເຊຍ ກໍຄື ການຈັດຕັ້ງປະຕິບັດບັນດາກິດຈະກຳຕ່າງໆ ທີ່ນອນຢູ່ໃນແຜນຍຸດທະສາດການ ທ່ອງທ່ຽວອາຊຽນ 2016-2023, ພ້ອມທັງ ຕິດຕາມຄວາມຄືບໜ້າໃນການຈັດຕັ້ງປະຕິບັດ ສັນຍາຮັບຮູ້ ເຊິ່ງກັນ ແລະ ກັນ ວ່າດ້ວຍວິ ຊາຊີບທ່ອງທ່ຽວອາຊຽນ, ແຜນຍຸດທະສາດການຕະຫລາດການທ່ອງທ່ຽວອາຊຽນ ແລະ ກິດ ຈະກຳການທ່ອງທ່ຽວຕ່າງໆ ພາຍໃຕ້ກອງທຶນ ເຈົ້າໜ້າທີ່ອາວຸໂສທ່ອງທ່ຽວອາຊຽນ ປະຈຳປີ 2023.
ສ່ວນ ກອງປະຊຸມເຈົ້າໜ້າທີ່ອາວຸໂສວັດທະນະທຳ ແລະ ສິລະປະອາຊຽນ ຄັ້ງທີ 19 ໄດ້ຈັດຂຶ້ນພາຍໃຕ້ຫົວຂໍ້ “ເສີມຂະຫຍາຍບົດບາດວັດທະນະທຳ ແລະ ສິລະປະອາຊຽນ ຫລັງໂລກລະບາດໂຄວິດ-19 ເພື່ອການພັດທະນາແບບຍືນຍົງ” ເຊິ່ງໄດ້ທົບທວນ ແລະ ປຶກສາຫາລື ການຈັດຕັ້ງປະຕິບັດແຜນຍຸດທະສາດດ້ານວັດທະນະທໍາ ແລະ ສິລະປະອາຊຽນ 2016-2025, ແຜນງານກ່ຽວກັບການຮ່ວມມືດ້ານວັດທະນະທໍາ ແລະ ສິລະປະກັບຄູ່ເຈລະຈາ 2022-2025, ຂໍ້ລິເລີ່ມໃໝ່ ແລະ ເລື່ອງອື່ນໆ ທີ່ກ່ຽວຂ້ອງເຖິງການຮ່ວມມືດ້ານວັດທະນະທຳ ແລະ ສິລະປະ. ພິເສດແມ່ນການຮັບຮອງເອົາເອກະສານສຳຄັນຂອງອາຊຽນ ເປັນຕົ້ນ, ຖະແຫລງການວັງວຽງກ່ຽວກັບການຊຸກຍູ້ ວິສາຫະກິດວັດທະ ນະທຳຂະໜາດນ້ອຍ ແລະ ຂະໜາດກາງ ໃຫ້ສອດຄ່ອງກັບການເຕີບໂຕສີຂຽວ ເພື່ອການພັດທະນາແບບຍືນຍົງເຊິ່ງຈະໄດ້ຮັບການຮັບຮອງຈາກ ເອເອັມຊີເອ(AMCA) ຕື່ມອີກ ແລະ ໄດ້ຍື່ນສະເໜີຕໍ່ມາເພື່ອຮັບຮອງເອົາຈາກ ບັນດາຜູ້ນຳອາຊຽນ ໃນກອງປະຊຸມສຸດຍອດອາຊຽນຄັ້ງທີ 44 ໃນເດືອນຕຸລາ 2024.
ກອງປະຊຸມ ລັດຖະມົນຕີ ໄອຊີທີ ອາຊຽນຄັ້ງທີ 19 ທີ່ກະຊວງໄປສະນີ, ໂທລະຄົມມະນາຄົມ ແລະ ການສື່ສານ(ປທສ) ແຫ່ງ ສປປ ລາວ ເປັນເຈົ້າພາບ ໄດ້ຈັດຂຶ້ນພາຍໃຕ້ຄຳຂັວນ “ສ້າງການເຊື່ອມຈອດທີ່ທັນສະໄໝ ເພື່ອການຫັນເປັນດີຈິຕອນ ຂອງອາຊຽນ” ໂດຍໄດ້ມີການປຶກສາຫາລື, ແລກປ່ຽນດ້ານນະໂຍບາຍ ແລະ ລະບຽບການ ກັບ ປະເທດຄູ່ຮ່ວມເຈລະຈາ ລວມທັງການຮ່ວມມືກັບຄູ່ຮ່ວມພັດ ທະນາ, ຜູ້ປະກອບການພາກເອກະຊົນ ເພື່ອສົ່ງເສີມໃຫ້ເສດຖະກິດ-ສັງຄົມ ດີຈິຕອນ ມີການຂະ ຫຍາຍຕົວ, ສອດ ຄ່ອງກັບເປົ້າໝາຍປະຊາຄົມອາຊຽນ ເຊິ່ງປີນີ້ ໄດ້ກ້າວເຂົ້າສູ່ປີສຸດທ້າຍ ຂອງການປະ ຕິບັດແຜນແມ່ບົດອາຊຽນ ໄອຊີທີ 2020(AIM 2020) ເຊິ່ງໄດ້ປະກອບສ່ວນເຮັດໃຫ້ ບັນດາປະເທດສະມາ ຊິກ ອາຊຽນ ມີຄວາມກ້າວໜ້າໃນແຕ່ລະດ້ານ ແລະ ຫັນເປັນ ດີຈິຕອນ ເທື່ອລະກ້າວ. 10 ປີ ທີ່ຜ່ານມາ ສປປ ລາວ ໄດ້ມີການວາງແຜນ ແລະ ພະຍາຍາມ ໃນການປັບປຸງຂະຫຍາຍພື້ນຖານໂຄງລ່າງໂທ ລະຄົມມະນາຄົມຂອງປະເທດ ແຕ່ສູນກາງຮອດທ້ອງຖິ່ນ ເພື່ອໃຫ້ການເຊື່ອມຕໍ່ເຄືອຂ່າຍໄດ້ມາດຕະ ຖານສູງ. ປັດຈຸບັນ, ອາຊຽນ ໄດ້ກາຍເປັນຈຸດໃຈກາງອັນສຳຄັນໜຶ່ງ ໃນການຊຸກຍູ້ເສດຖະກິດ-ສັງຄົມ ດ້ວຍການນຳໃຊ້ນະວັດຕະກຳໃໝ່ທາງດ້ານ ໄອຊີທີ ແລະ ການຫັນເປັນ ດີຈິຕອນ ໃນການເຊື່ອມໂຍງ-ເຊື່ອມຈອດ.
ຂະນະທີ່ ກອງປະຊຸມຫົວໜ້າຕໍາຫລວດ ອາຊຽນ ຄັ້ງທີ 41 ພາຍໃຕ້ຄໍາຂັວນ “ເພີ່ມທະວີການເປັນຄູ່ຮ່ວມ ໃນການສົ່ງເສີມສັນຕິພາບ, ຄວາມສະຫງົບ ແລະ ຄວາມໝັ້ນຄົງ” ເຊິ່ງໄດ້ພ້ອມກັນປຶກສາຫາລື ແລະ ຜັນຂະຫຍາຍ ບັນຫາທີ່ມີຄວາມສົນໃຈຮ່ວມກັນ ໃຫ້ເກີດໝາກຜົນເທື່ອລະກ້າວ ແລະ ຮ່ວມມືກັນຈັດຕັ້ງປະຕິບັດນະໂຍບາຍ, ຍຸດທະສາດ ແລະ ນິຕິກໍາອື່ນໆ ທີ່ກ່ຽວກັບການແກ້ໄຂບັນຫາອາຊະຍາກໍາຂ້າມຊາດ ແລະ ການຈັດຕັ້ງປະຕິບັດຖະແຫລງການຮ່ວມ ຂອງກອງປະຊຸມໃນແຕ່ລະປີໃຫ້ໄດ້ຮັບຜົນດີ; ເພີ່ມທະວີການຮ່ວມມື ແລະ ການຊ່ວຍເຫລືອ ເຊິ່ງກັນ ແລະ ກັນ ທາງດ້ານວຽກງານຕໍາຫລວດ ໃຫ້ຫລາຍຂຶ້ນກວ່າເກົ່າ ເພື່ອເຮັດໃຫ້ພາກພື້ນອາຊຽນ ເປັນພາກພື້ນແຫ່ງສັນຕິພາບ, ມິດຕະພາບ ແລະ ການຮ່ວມມື; ເອົາໃຈໃສ່ເສີມຂະຫຍາຍບົດບາດ ຂອງກອງເລຂາຕໍາຫລວດອາຊຽນ ໃຫ້ກາຍເປັນອົງການຕົວແທນທີ່ສໍາຄັນ ຂອງບັນດາປະເທດສະມາຊິກຕໍາຫລວດອາຊຽນ ໃນການຮ່ວມມື, ປະສານງານ, ເກັບກໍາຂໍ້ມູນ ເພື່ອຮັບໃຊ້ການສະກັດກັ້ນ ແລະ ຕ້ານອາຊະຍາກໍາຂ້າມຊາດ ຢູ່ພາກພື້ນ ແລະ ສາກົນ.
ສ່ວນ ກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ(CLV) ຄັ້ງທີ 1, ໄດ້ຈັດຂຶ້ນພາຍໃຕ້ຫົວຂໍ້: “ເພີ່ມທະວີບົດບາດຂອງລັດຖະສະພາ ໃນການສົ່ງເສີມການຮ່ວມມືຮອບດ້ານ ລະ ຫວ່າງ ກໍາປູເຈຍ-ລາວ-ຫວຽດນາມ’’ ເຊິ່ງງສະພາແຫ່ງຊາດ ສາມປະເທດ ໄດ້ຮ່ວມກັນປຶກສາຫາລື ກ່ຽວກັບການຮ່ວມມືຮອບດ້ານ ຕາມບົດບາດຂອງຕົນ ເພື່ອຊຸກຍູ້ ແລະ ຕິດຕາມກວດກາ ການປະຕິບັດບັນ ດາແຜນງານ, ກິດຈະກໍາຕ່າງໆຂອງບັນດາກະຊວງ, ຂະແໜງການທີ່ກ່ຽວຂ້ອງຂອງສາມປະເທດ ໂດຍສະເພາະ ການດຳເນີນໂຄງການຮ່ວມມື ແລະ ການລົງທຶນຂອງລັດຖະບານສາມປະເທດ ກໍຄື ໂຄງການຊ່ວຍເຫລືອສາກົນ ຢູ່ໃນເຂດສາມຫລ່ຽມພັດທະນາ(CLV) ແນໃສ່ເພີ່ມທະວີຄວາມສາມັກຄີ, ມິດຕະພາບ ແລະ ການຮ່ວມມືເພື່ອການພັດທະນາ ຢູ່ໃນເຂດດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນ ເພື່ອຍົກລະດັບຊີວິດການເປັນຢູ່ ຂອງປະຊາຊົນໃຫ້ດີຂຶ້ນເທື່ອລະກ້າວ.
ຂ່າວ: ທະນູທອງ
