ທ້າຍເດືອນເທື່ອໃດກໍ່ມີບິນຄ່າໃຊ້ຈ່າຍທີ່ຕ້ອງຈ່າຍໄລຍະຍາວ ຫຼັກໆ ຄ່ານ້ຳ ຄ່າໄຟ ແລະ ຄ່າໂທລະສັບມືຖື ແລະ ອື່ນໆ… ແຕ່ມີໃຜສັງເກດໂຕເລກບິນນີ້ບໍ່ວ່າໃນທຸກໆ ເດືອນບິນຄ່າໃຊ້ຈ່າຍສູງຂື້ນເລື້ອຍໆ ໂດຍສະເພາະຄ່າໄຟທີ່ສູງຂື້ນເລື້ອຍໆ ສະນັ້ນຢ່າຢູ່ເສີຍໆ ເຮົາມາຊ່ວຍກັນຫຼຸດຄ່າໄຟຟ້າໃນເຮືອນດ້ວຍວິທີປະຢັດໄຟຕໍ່ໄປນີ້ນຳກັນເລີຍ.
ຫຼຸດຜ່ອນການໃຊ້ແອ: ບ້ານໃດທີ່ມີແອກໍ່ຄວນເປີດແອເທົ່າທີ່ຈຳເປັນ ເຊັ່ນ: ເປີດໃນມື້ທີ່ຮູ້ສຶກຮ້ອນແທ້ໆ ແລະ ຄວນເປີດແອໃນອຸ່ນນະພູມທີ່ເໝາະສົມ ໂດຍເປີດແອ 27 ອົງສາກໍ່ພໍ ແຕ່ຖ້າທ່ານເປັນຄົນທີ່ນອນບໍ່ຫຼັບຫາກບໍ່ເປີດແອ ກໍ່ປ່ຽນມາເປິດແອໄລຍະ 1-2 ຊົ່ວໂມງທໍາອິດກ່ອນຈະນອນຫຼັບກໍ່ໄດ້ຕັ້ງເວລາປິດແອເອົາໄວ້ໃຫ້ຮຽບຮ້ອຍ ແລະ ຢ່າລືມສໍາຫຼວດເບີ່ງປ່ອງຢ້ຽມປະຕູ ແລະ ຊ່ອງຫວ່າງທຸກບ່ອນໃນຫ້ອງນອນນຳແດ່ ພຽງເທົ່ານີ້ກໍ່ຊ່ວຍປະຢັດໄຟໄດ້ດີຫຼາຍ.
ຫຼີກເວັ້ນເຄື່ອງດູດຝຸ່ນ: ຖ້າບ້ານໃດບໍ່ໄດ້ລ້ຽງສັດ ແລະ ປົກກະຕິກໍ່ບໍ່ຄ່ອຍມີຝຸ່ນຫຼາຍປານໃດ ກໍ່ສາມາດຫຼີກເວັ້ນຈາກເຄື່ອງດູດຝຸ່ນ ເຊີ່ງແຕ່ກ່ອນຈະດູດຝຸ່ນທຸກໆ ອາທິດ ປ່ຽນມາເປັນດູດຝຸ່ນ 2-3 ຄັ້ງຕໍ່ເດືອນກໍ່ໄດ້ ວິທີນີ້ກໍ່ຊ່ວຍຫຼຸດປະລິມານການໃຊ້ໄຟໄດ້ຫຼາຍເຊັ່ນກັນ.
ຖອດປັກໄຟທຸກໆ ເທື່ອຫຼັງຈາກໃຊ້ວຽກ: ພຽງແຕ່ປິດສະວິດໄຟຟ້າ ກໍ່ບໍ່ໄດ້ໝາຍຄວາມວ່າຈະເປັນການຕັດກະແສໄຟຟ້າເລີຍ ເພາະຖ້າປັກຍັງສຽບຢູ່ ນັ້ນກໍ່ແປວ່າຍັງມີກະແສໄຟວົນວຽນ ເພື່ອໃຫ້ເຮົາເປີດໃຊ້ວຽກເຄື່ອງໃຊ້ໄຟຟ້າໄດ້ໂດຍທັນທີ ໂດຍສະເພາະຄົນທີ່ມັກເປີດໂມດພັກໜ້າຈໍຄອມພິວເຕີໄວ້ພຽງ 1 ຊົ່ວ ໂມງ ກໍ່ສູນເສຍກະແສໄຟຟ້າບໍ່ຮູ້ເທົ່າໃດຕໍ່ເທົ່າໃດແລ້ວ ແລະ ໃນເມື່ອຮູ້ຢ່າງນີ້ແລ້ວ ກໍ່ຄວນຖອດປັກໄຟເຄື່ອງໃຊ້ໄຟຟ້າທີ່ບໍ່ໄດ້ໃຊ້ວຽກອອກທຸກໆ ເທື່ອຈະເປັນການດີທີ່ສຸດ.
ເລືອກໃຊ້ຫຼອດໄຟຟູອໍເລສເຊັນສ໌ (ຫຼອດໄຟປະຢັດພະລັງງານ): ຫຼອດໄຟຟູອໍເລສເຊັນສ໌ມີລາຄາແພງກ່ວາຫຼອດໄຟຊະນິດອື່ນກໍ່ແມ່ນ ເພາະຫຼອດໄຟຟູອໍເລສເຊັນສ໌ ສາມາດຊ່ວຍປະຢັດໄຟໄດ້ຫຼາຍກ່ວາຫຼອດໄຟຊະນິດອື່ນໄດ້ເຖີງ 75% ແຖມຍັງມີອາຍຸການໃຊ້ງານຍາວກ່ວາ ຫຼື ເວົ້າງ່າຍໆ ວ່າມີຄວາມທົນທານຫຼາຍພໍສົມຄວນ.
ຊັກ ລີດເຄື່ອງນຸ່ງຫົ່ມໃນເວລາດຽວກັນ: ຈັກຊັກເຄື່ອງ ແລະ ເຕົາລີດເປັນອຸປະກອນທີ່ກິນໄຟຫຼາຍຄືກັນ ດັ່ງນັ້ນຫາກເຮົາຊັກ ລີດເຄື່ອງນຸ່ງຫົ່ມ ກໍ່ຄວນຊັກ ລີດເສື້ອຜ້າຫຼາຍໆ ບາດດຽວ ຫຼື ຢ່າງໜ້ອຍ 2 ເທື່ອຕໍ່ອາທິດກໍ່ໄດ້ ວິທີນີ້ຈະຊ່ວຍໃຫ້ເຮົາປະຢັດໄຟໄດ້ຫຼາຍ ທ່ານໃດທີ່ມັກລີດເສື້ອຜ້າຕອນເຊົ້າຄວນປ່ຽນພຶດຕິກຳດ່ວນໆ.
