ແຫລ່ງຂ່າວຈາກ ແຂວງເຊກອງ ໃຫ້ຮູ້ວ່າ: ພິທີມອບ-ຮັບ ແລະ ເປີດນໍາໃຊ້ສູນບໍາບັດ, ຟື້ນຟູສຸຂະພາບຜູ້ຕິດຢາເສບຕິດ ຈັດຂຶ້ນໃນວັນທີ 17 ພະຈິກ 2023 ທີ່ບ້ານທົ່ງຫວາຍ ເມືອງທ່າແຕງ ແຂວງເຊກອງ ໂດຍມີທ່ານ ພົອ ວິໄລ ຫລ້າຄໍາຟອງ ຮອງນາຍົກລັດຖະ ມົນຕີ, ລັດຖະມົນຕີກະຊວງປ້ອງກັນຄວາມສະ ຫງົບ, ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.
ທ່ານ ພັອ ຄໍາບານ ພົມມະນີວົງ ຫົວໜ້າກອງບັນຊາການປ້ອງ ກັນຄວາມສະຫງົບ (ປກສ) ແຂວງເຊກອງ ໄດ້ລາຍງານວ່າ: ໂຄງການກໍ່ສ້າງ ແລະ ສ້ອມແປງສູນບໍາບັດ-ຟື້ນຟູສຸຂະພາບຜູ້ຕິດຢາເສບຕິດ ແມ່ນໂຄງການໜຶ່ງທີ່ມີຄວາມສໍາຄັນ, ຈໍາເປັນ ແລະ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ເພື່ອເປັນບ່ອນບໍາບັດ ແລະ ຟື້ນ ຟູສຸຂະພາບໃຫ້ແກ່ລູກ-ຫລານຂອງພໍ່ແມ່ປະຊາຊົນຜູ້ຕິດຢາ ເສບຕິດທຸກປະເພດ, ທັງເປັນການກອບກູ້ເອົາຊີວິດອັນມືດມົນ ໄປສູ່ຊີວິດອັນແຈ່ມໃສ ແລະ ມີອະນາຄົດທີ່ດີ, ມີອາຊີບການທໍາມະຫາກິນທີ່ໝັ້ນຄົງ ເພື່ອໃຫ້ກາຍເປັນຊາວໜຸ່ມ-ໄວໜຸ່ມທີ່ມີອານາຄົດສົດໃສຂອງພໍ໋-ແມ່ ກໍຄື ປະເທດຊາດຕະຫລອດໄປ.
ສູນບໍາບັດ-ຟື້ນຟູສຸຂະພາບຜູ້ຕິດຢາເສບຕິດ ຕັ້ງຢູ່ບ້ານທົ່ງຫວາຍ ເມືອງທ່າແຕງ ແຂວງເຊກອງ ຫ່າງຈາກເທສະບານແຂວງປະມານ 68 ກິໂລແມັດ, ການກໍ່ສ້າງສູນດັ່ງກ່າວ ແມ່ນໄດ້ຮັບການສະໜັບສະໜູນງົບປະມານຈາກການນໍາແຂວງ ແລະ ກະຊວງປ້ອງກັນຄວາມສະງົບ, ເລີ່ມລົງມືກໍ່ສ້າງ ໃນວັນທີ 20 ກຸມພາ 2023 ເປັນຕົ້ນມາ ໂດຍນໍາໃຊ້ເນື້ອທີ່ດິນທັງໝົດ 21.363 ຕາແມັດ ຊຶ່ງປະກອບມີ 7 ຕຶກອາຄານ, ສາມາດຮອງ ຮັບ ແລະ ບັນຈຸຜູ້ຕິດຢາເສບຕິດໄດ້ 500 ຄົນ.
ໃນໂອກາດດຽວກັນນີ້, ທ່ານ ເຫລັກໄຫລ ສີວິໄລ ໄດ້ມີຄໍາເຫັນວ່າ: ບັນຫາຢາເສບຕິດ ແມ່ນບັນຫາລະດັບໂລກ, ເປັນໄພຄຸກຄາມຕໍ່ຄວາມໝັ້ນຄົງທາງດ້ານການເມືອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ກໍຄືການພັດທະນາເສດຖະ ກິດ-ສັງຄົມ ແລະ ເປັນພິດເປັນໄພຕໍ່ສຸຂະພາບ ກໍຄື ອະນາຄົດຂອງຜູ້ຕິດຢາເສບຕິດເອງ. ສໍາລັບແຂວງເຊກອງ ໃນໄລຍະຜ່ານມາ ກໍໄດ້ຮັບຜົນກະທົບ ແລະ ມີຜູ້ຕິດຢາເສບຕິດເປັນຈໍານວນຫລາຍສົມຄວນ ໂດຍສະເພາະແມ່ນໄວໜຸ່ມ-ຍິງ ສາວ ເຊິ່ງກໍ່ໃຫ້ເກີດມີປະກົດການຫຍໍ້ທໍ້ຕາມມາ ເປັນຕົ້ນ ປຸ້ນຈີ້, ກໍ່ອາລະວາດ-ອາດຍະກໍາ, ຂີ້ລັກງັດແງະ ແລະ ອື່ນໆ. ສະນັ້ນ ເພື່ອແກ້ໄຂບັນຫາດັ່ງກ່າວໃຫ້ຫລຸດໜ້ອຍຖອຍລົງ, ຄະນະພັກ-ອົງການປົກຄອງແຂວງ ຈຶ່ງໄດ້ຄົ້ນຄວ້າຕົກລົງມອບ ອາຄານພັກເຊົາຂອງເຂື່ອນໄຟຟ້າຫ້ວຍນໍ້າພັນຕອນເທິງໃຫ້ກອງບັນຊາການ ປກສ ແຂວງ ເພື່ອກໍ່ສ້າງ ແລະ ສ້ອມແປງເປັນສູນບໍາບັດ-ຟື້ນຟູປີ່ນປົວ ແລະ ຮັກສາສຸຂະພາບຂອງຜູ້ຕິດຢາເສບ ຕິດ ອັນເປັນການປະກອບສ່ວນສໍາຄັນ ເພື່ອສືບຕໍ່ຈັດຕັ້ງປະຕິ ບັດວາລະແຫ່ງຊາດ ວ່າດ້ວຍການແກ້ໄຂ, ຕ້ານ ແລະ ສະກັດກັ້ນບັນຫາຢາເສບຕິດໃຫ້ຫລຸດໜ້ອຍຖອຍລົງ.
ຂ່າວ-ພາບ: ສັນຍາ
