ນະໂຍບາຍດ້ານການສົ່ງອອກພືດ ແລະ ຜະລິດຕະພັນພືດ ເປັນນະໂຍບາຍຂໍ້ 4 ຂອງ 8ນະໂຍບາຍ ທີ່ໄດ້ຖືກກຳນົດເຂົ້າເປັນນະໂຍບາຍແຫ່ງຊາດ ວ່າດ້ວຍການສົ່ງເສີມການປູກພືດ ຂອງ ສປປ ລາວ ຊຶ່ງລັດຖະບານເຮົາ ວາງນະໂຍບາຍນີ້ອອກມາ ແນໃສ່ປັບປຸງສະຖານີກັກກັນພືດ, ຫ້ອງວິໄຈ, ເຄື່ອງມືອຸປະກອນ ດ້ານສຸຂານາໄມພືດ ແລະ ຄວາມປອດໄພຂອງພືດ, ການບໍລິການຂົນສົ່ງ, ຈຸດຄ່ຽນຖ່າຍ ແລະ ສະຖານທີ່ພັກສິນຄ້າ ສາມາດປະຕິບັດ ຕາມເງື່ອນໄຂການນໍາເຂົ້າ ແລະ ສົ່ງອອກ ຂອງປະເທດຄູ່ຄ້າ; ພ້ອມນີ້, ກໍເພື່ອສະໜອງຂໍ້ມູນຂ່າວສານດ້ານວິຊາການ ແລະ ລາຍການສິນຄ້າປະເພດພືດ ແລະ ຜະລິດຕະພັນພືດ ສົ່ງອອກໃຫ້ຫຼາຍຂຶ້ນ.
ໄລຍະຜ່ານມາ, ການປະຕິບັດມາດຕະການດ້ານສຸຂານາໄມ ແລະ ສຸຂານາໄມພືດ, ມາດຕະຖານດ້ານເຕັກນິກ ເປັນຕົ້ນການສ້າງສະຖານີກັກກັນພືດ, ການປ້ອງກັນ ແລະ ຄວບຄຸມສັດຕູພືດ, ລະບົບກວດສອບຄືນຫຼັງ ແລະ ການວິໄຈສັດຕູພືດ ລວມທັງການຢັ້ງຢືນສຸຂານາໄມພືດ ແລະ ຄຸນນະພາບຜະລິດຕະພັນພືດ ຍັງບໍ່ທັນເຮັດໄດ້ດີເທົ່າຄວນ; ຂໍ້ມູນຂ່າວສານດ້ານການຕະຫຼາດ ແລະ ການຄຸ້ມຄອງລາຄາສິນຄ້າປະເພດພືດ ແລະ ຜະລິດຕະພັນພືດ ຍັງບໍ່ໄດ້ຮັບການຄຸ້ມຄອງຢ່າງເປັນລະບົບ; ການເຈລະຈາເຕັກນິກເປີດຕະຫຼາດພືດ ແລະ ຜະລິດຕະພັນພືດ ກັບບັນດາປະເທດຄູ່ຄ້າຍັງບໍ່ທັນໄດ້ຫຼາຍ ແລະ ຊັກຊ້າ ເປັນຕົ້ນແມ່ນພືດທີ່ປະເທດເຮົາມີທ່າແຮງ; ໂຄງລ່າງພື້ນຖານເຕັກນິກ (ສະຖາທີ່ກັກກັນພືດ, ຫ້ອງວິໄຈ, ເຄື່ອງມືອຸປະກອນ…), ເຈົ້າໜ້າທີ່ກັກກັນພືດຍັງຈໍາກັດ ແລະ ຜູ້ປະກອບການ ບໍ່ປະຕິບັດຕາມເງື່ອນໄຂດ້ານສຸຂານາໄມ ແລະ ສຸຂານາໄມພືດ ກ່ຽວກັບການນໍາເຂົ້າ-ສົ່ງອອກພືດ ແລະ ຜະລິດຕະພັນພືດ; ການບໍລິການຂົນ ສົ່ງ, ຈຸດຄ່ຽນຖ່າຍ, ສະຖານທີ່ພັກສິນຄ້າ ແລະ ສິ່ງອໍານວຍຄວາມສະດວກອື່ນ ຢູ່ພາຍໃນປະເທດຈໍາກັດ ແລະ ບໍ່ທັນສະໄໝ.
ສະນັ້ນ, ເພື່ອຈະແກ້ໄຂບັນຫາຂ້າງເທິງ ລັດຖະບານຈຶ່ງໄດ້ກຳນົດເອົານະໂຍບາຍການສົ່ງອອກພືດ ແລະ ຜະລິດຕະພັນພືດ ເຂົ້າໃນນະໂຍບາຍແຫ່ງຊາດ ໂດຍຊຸກຍູ້, ສົ່ງເສີມ ແລະ ພັດທະນາການນໍາໃຊ້ເຕັກນິກທີ່ທັນສະໄໝ ເຂົ້າໃນວຽກງານສຸຂານາໄມ ແລະ ສຸຂານາໄມພືດ ສໍາລັບການສົ່ງອອກພືດ ແລະ ຜະລິດຕະພັນພືດ ໃຫ້ມີຄວາມເຂັ້ມແຂງ; ຊຸກຍູ້, ສົ່ງເສີມ ໃຫ້ຜູ້ປະກອບການລົງທຶນ ສ້າງ ແລະ ພັດທະນາ ສະຖານທີ່ກັກກັນພືດ, ຫ້ອງວິໄຈສັດຕູພືດ, ສານພິດຕົກຄ້າງ, ຄຸນນະພາບສິນຄ້າ ແລະ ການຮົມຢາຂ້າເຊື້ອ; ຊຸກຍູ້, ສົ່ງເສີມໃຫ້ຜູ້ປະກອບການລົງທຶນ ສ້າງລະບົບການບໍລິການຂົນສົ່ງ, ຈຸດຄ່ຽນຖ່າຍ ແລະ ສະຖານທີ່ພັກສິນຄ້າ ໃຫ້ມີຫຼາຍແຫ່ງ ແລະ ທັນສະໄໝ. ພ້ອມກັນນັ້ນ, ລັດໄດ້ເພີ່ມທະວີໃນການເກັບກໍາຂໍ້ມູນປະເມີນຄວາມສ່ຽງສັດຕູພືດ, ການເຈລະຈາເຕັກນິກເປີດຕະຫຼາດພືດ ແລະ ຜະລິດຕະພັນພືດ ໃຫ້ຫຼາຍຂຶ້ນ; ໂຄສະນາເຜີຍແຜ່ຂໍ້ມູນຂ່າວສານ, ເງື່ອນໄຂການສົ່ງອອກໃຫ້ແກ່ຜູ້ປະກອບການປະຕິບັດໃຫ້ສອດຄ່ອງ ກັບແຕ່ລະປະເທດຄູ່ຄ້າ; ສ້າງຄວາມເຂັ້ມແຂງໃຫ້ແກ່ວິຊາການ, ເຈົ້າໜ້າທີ່ ແລະ ຜູ້ປະກອບການ ປະຕິບັດໃຫ້ສອດຄ່ອງຕາມເງື່ອນໄຂນໍາເຂົ້າ-ສົ່ງອອກ ຂອງປະເທດຄູ່ຄ້າ.
ທັງໝົດນັ້ນ, ແມ່ນນະໂຍບາຍທີ່ລັດຖະບານໄດ້ກຳນົດກ່ຽວການສົ່ງອອກພືດ ແລະ ຜະລິດຕະພັນພືດ ເນື່ອງຈາກປັດຈຸບັນ ຕະຫຼາດພືດຜະລິດຕະພັນພືດ ມີການຂະຫຍາຍຕົວຢ່າງຕໍ່ເນື່ອງ, ຄວາມຕ້ອງການບໍລິໂພກພືດ ແລະ ຜະລິດຕະພັນພືດ ຢູ່ພາຍໃນນັບມື້ເພີ່ມຂຶ້ນ, ມີຕະຫຼາດຂາຍຍົກ, ຂາຍຍ່ອຍ, ຕະຫຼາດກະສິກຳສະອາດ, ຕະຫຼາດຊຸມຊົນ, ມີຫ້າງຮ້ານຂາຍຜົນຜະລິດພືດ ແລະ ຜະລິດຕະພັນພືດ ເພີ່ມຂຶ້ນ ສາມາດສະໜອງໃຫ້ແກ່ການບໍລິໂພກພາຍໃນ ແລະ ນັກທ່ອງທ່ຽວ. ນອກນີ້, ຍັງສາມາດເຂົ້າເຖິງບັນດາຕະຫຼາດສົ່ງອອກ ທີ່ໄດ້ສຳເລັດການເຈລະຈາເຕັກນິກເປີດຕະຫຼາດ ເຊັ່ນ: ສປ ຈີນ, ສສ ຫວຽດນາມ, ໄທ, ສະຫະພາບເອີຣົບ ແລະ ປະເທດຄູ່ຄ້າອື່ນໆ.
ຢ່າງໃດກໍຕາມ, ການເຂົ້າເຖິງຕະຫຼາດຂອງບັນດາປະເທດຄູ່ຄ້າ ຍັງມີຄວາມຫຍຸ້ງຍາກ ເນື່ອງຈາກວ່າ ຄຸນນະພາບຂອງພືດ ແລະ ຜະລິດຕະພັນພືດ ຍັງບໍ່ທັນໄດ້ມາດຕະຖານຂອງປະເທດຄູ່ຄ້າ. ສະນັ້ນ, ຈຶ່ງມີຄວາມຈໍາເປັນຕ້ອງໄດ້ປັບປຸງລະບົບຜະລິດ, ການປຸງແຕ່ງພືດ ແລະ ຜະລິດຕະພັນພືດ ໃຫ້ໄດ້ມາດຕະຖານ ພ້ອມທັງເຈລະຈາເຕັກນິກເປີດຕະຫຼາດ ກັບປະເທດຄູ່ຄ້າ ໃຫ້ໄດ້ຫຼາຍຂຶ້ນ.
ໂດຍ: ສ.ບຸດປະຊາ
