Saturday, April 13, 2024
Homeຂ່າວໜ້າໜຶ່ງທ່ານ ນາຍົກລັດຖະມົນຕີ ຕິດຕາມ, ຊຸກຍູ້ ແລະ ຊີ້ນຳວຽກງານຢູ່ແຂວງຈຳປາສັກ

ທ່ານ ນາຍົກລັດຖະມົນຕີ ຕິດຕາມ, ຊຸກຍູ້ ແລະ ຊີ້ນຳວຽກງານຢູ່ແຂວງຈຳປາສັກ

ພາຍຫຼັງສຳເລັດການພົບປະໂອ້ລົມ ແລະ ຊີ້ນຳວຽກງານ ຢູ່ແຂວງສາລະວັນ ໃນຕອນເຊົ້າວັນທີ 11 ພະຈິກ 2023 ແລະ ມາໃນຕອນບ່າຍ ຂອງວັນດຽວກັນ, ທ່ານ ສອນໄຊ ສີພັນດອນ, ນາຍົກລັດຖະມົນຕີ, ຫົວໜ້າຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນຂອງ ເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ (ຫົວໜ້າຄະນະສະເພາະກິດ 19/ກມສພ) ພ້ອມດ້ວຍຄະນະ ໄດ້ສືບຕໍ່ພົບປະໂອ້ລົມ ແລະ ຊີ້ນຳວຽກງານເສດຖະກິດ-ການເງິນ ຕໍ່ການນຳ ແລະ ພະນັກງານຫຼັກແຫຼ່ງແຂວງຈຳປາສັກ; ມີທ່ານ ວິໄລວົງ ບຸດດາຄຳ, ເຈົ້າແຂວງຈຳປາສັກ ນຳພາຄະນະເຂົ້າຮ່ວມຟັງ ແລະ ຮັບເອົາທິດຊີ້ນຳ ຈາກການໂອ້ລົມດັ່ງກ່າວ ເພື່ອນຳໄປຈັດຕັ້ງຜັນຂະຫຍາຍສູ່ວຽກງານຕົວຈິງ.

​ໃນໂອກາດນີ້, ທ່ານ ເຈົ້າແຂວງຈຳປາສັກ ໄດ້ລາຍງານໃຫ້ຊາບ ກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງ ຕິດພັນກັບການ​ແກ້​ໄຂ​ບັນຫາ​ເຄັ່ງຮ້ອນ ຂອງ​ເສດຖະກິດ-ການ​ເງິນ ເຫັນວ່າ: ລວມຍອດຜະລິດຕະພັນພາຍໃນຂອງແຂວງ ໄລຍະ 9 ເດືອນຜ່ານມາ ປະຕິບັດໄດ້ 27.290,5 ຕື້ກີບ ເທົ່າກັບ 82,2% ຂອງແຜນການ, ລາຍຮັບສະເລ່ຍໃສ່ຫົວຄົນໄດ້ 35 ລ້ານກີບ/ຄົນ, ການເກັບລາຍຮັບເຂົ້າງົບປະມານ ໄລຍະ 10 ເດືອນ ປະຕິບັດໄດ້ 1.849,19 ຕື້ກີບ ເທົ່າກັບ 96,12% ຂອງແຜນການ, ລາຍຈ່າຍ ປະຕິບັດໄດ້ 627,26 ຕື້ກີບ, ເທົ່າກັບ 78,50% ຂອງແຜນການ, ການລົງທຶນ ປະຕິບັດໄດ້ 8.916,37 ຕື້ກີບ ເທົ່າກັບ 96,97% ຂອງແຜນການ, ໃນນັ້ນ ມູນຄ່າການລົງທຶນຂອງລັດ ກວມ 0,53%, ທຶນຊ່ວຍເຫຼືອລ້າ (ODA) ກວມ 4,24%, ການລົງທຶນພາກເອກະຊົນພາຍໃນ-ຕ່າງປະເທດ ກວມ 31,5% ແລະ ສິນເຊື່ອທະນາຄານ ກວມ 63,73% ຂອງການລົງທຶນທັງໝົດ; ການສົ່ງອອກສິນຄ້າ ປະຕິບັດໄດ້ 296,28 ລ້ານໂດລາ ເທົ່າກັບ 64% ຂອງແຜນການ, ຊຶ່ງສິນຄ້າຫຼັກ ແມ່ນສິນຄ້າກະສິກໍາ, ພືດຜັກທີ່ນອນໃນໂຄງການ Contract Farming, ຜະລິດຕະພັນອຸດສາຫະກໍາປຸງແຕ່ງ ແລະ ອື່ນໆ; ການນໍາເຂົ້າສິນຄ້າ ປະຕິບັດໄດ້ 286,71 ລ້ານໂດລາ ເທົ່າກັບ 77% ຂອງແຜນການ, ​ຊຶ່ງສິນຄ້າຫຼັກ ແມ່ນນໍ້າມັນເຊື້ອໄຟ, ພາຫະນະ-ອາໄຫຼ່, ເຄື່ອງກໍ່ສ້າງ, ເຄື່ອງໂຄງການຮັບໃຊ້ພາຍໃນ ແລະ ອື່ນໆ. ເມື່ອສົມທຽບ ລະຫວ່າງ ການນໍາເຂົ້າທັງໝົດ ແລະ ສົ່ງອອກທັງໝົດ ແຂວງຈໍາປາສັກ ມີມູນຄ່າການຄ້າເກີນດູນ 9,56 ລ້ານໂດລາ.

​ໃນໂອກາດດຽວກັນ, ທ່ານ ນາຍົກລັດຖະມົນຕີ ກໍ່ໄດ້ມີຄຳເຫັນເຈາະຈີ້ມ ແລະ ສະເໜີຂະແໜງການກ່ຽວຂ້ອງ ຂອງແຂວງ ແລະ ສູນກາງ ປະກອບຄຳເຫັນ ບາງວຽກງານເພີ່ມເຕີມ. ຫຼັງຈາກນັ້ນ ກໍ່ໄດ້ໃຫ້ກຽດໂອ້ລົມຕໍ່ຜູ້ເຂົ້າຮ່ວມ ໂດຍໄດ້ຍົກໃຫ້ເຫັນສະພາບພົ້ນເດັ່ນໃນການພັດທະນາເສດຖະກິດ-ສັງຄົມແຫ່ງຊາດ, ການເຄື່ອນໄຫວຊີ້ນຳວຽກງານ ຂອງສູນກາງພັກ ແລະ ລັດຖະບານ, ທັງໄດ້ຊີ້ນຳໃຫ້ອົງການປົກຄອງແຂວງ ເອົາໃຈໃສ່ຕື່ມບາງດ້ານ ເປັນຕົ້ນ ເຂັ້ມງວດແກ້ໄຂບັນຫາການຈັບຈ່ອງໂຄງການ ທີ່ບໍ່ມີການພັດທະນາ ແລະ ໂຄງການທີ່ບໍ່ມີປະສິດທິຜົນ; ສຸມໃສ່ຍົກສະມັດຕະພາບການຜະລິດໃຫ້ສູງຂຶ້ນ, ປັບປຸງຮູບແບບການຜະລິດ ທີ່ມີລັກສະນະອີງໃສ່ທຳມະຊາດ ຫັນໄປສູ່ການຜະລິດ ທີ່ມີວິທະຍາສາດ, ຮັບປະກັນທາງດ້ານປະລິມານ, ຄຸນນະພາບ ແລະ ເສດຖະກິດ, ລວມທັງ ການພັດທະນາໂຄງລ່າງພື້ນຖານການຜະລິດ; ສືບຕໍ່ປະຕິບັດບັນດາວຽກຈຸດສຸມ ແລະ ມາດຕະການໃນການແກ້ໄຂບັນຫາເຄັ່ງຮ້ອນ ຂອງເສດຖະກິດ-ການເງິນ ກໍ່ຄືວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ມີການຫັນປ່ຽນຢ່າງຈະແຈ້ງ; ສືບຕໍ່ຈັດຕັ້ງປະຕິບັດດຳລັດ ວ່າດ້ວຍລົດຂອງລັດ, ລວມທັງ ບັນດາມາດຕະການປະຢັດ ແລະ ຕ້ານການຟູມເຟືອຍຕ່າງໆ ໃຫ້ໄດ້ຮັບຜົນດີ; ສືບຕໍ່ກວດກາ ແລະ ສ້ອມແປງໂຄງລ່າງເສັ້ນທາງພາຍໃນແຂວງ ໃຫ້ສາມາດໄປມາໄດ້ສະດວກ, ມີການຄຸ້ມຄອງທີ່ດີ, ຫຼີກລ່ຽງສະພາບເສັ້ນທາງເປ່ເພຫຼາຍແລ້ວ ຈຶ່ງສ້ອມແປງ;

ພ້ອມກັນນັ້ນ ກໍ່ປຸກລະດົມປະຊາຊົນ ແລະ ສັງຄົມ ມີສ່ວນຮ່ວມໃນການສ້ອມແປງ ແລະ ກໍ່ສ້າງ ບັນດາເສັ້ນທາງເຂົ້າຫາບ້ານ ແລະ ເສັ້ນທາງຮ່ອມຕ່າງໆ; ເອົາໃຈໃສ່ຕິດຕາມ ແລະ ແກ້ໄຂ ບັນຫາລົດທີ່ນຳເຂົ້າ ແລະ ນຳໃຊ້ບໍ່ຖືກຕ້ອງ ໃຫ້ຂາດຕົວເປັນກ້າວໆ; ຕິດຕາມແກ້ໄຂບັນຫາຫຍໍ້ທໍ້ ໃນສື່ສັງຄົມອອນລາຍ, ລວມທັງ ບັນຫາຫຍໍ້ທໍ້ ໃນຂົງເຂດການສຶກສາ, ແຮງງານ ແລະ ອື່ນໆ; ສືບຕໍ່ຊຸກຍູ້ສົ່ງເສີມວຽກງານການທ່ອງທ່ຽວ ໃຫ້ເປັນຂະ ບວນການກວ້າງຂວາງ ແລະ ແຂງແຮງກວ່າເກົ່າ ໂດຍສະເພາະ ການໂຄສະນາເຜີຍແຜ່, ການພັດທະນາ ແລະ ປັບປຸງໂຄງລ່າງພື້ນຖານການທ່ອງທ່ຽວ, ການສ້າງກິດຈະກຳທ່ອງທ່ຽວ, ການບໍລິການການທ່ອງທ່ຽວ ແລະ ອື່ນໆ; ກະກຽມກິດຈະກໍາ ສະເຫຼີມສະຫຼອງວັນສໍາຄັນ ທາງດ້ານປະຫວັດສາດຂອງຊາດ ໂດຍເນັ້ນໃສ່ດ້ານເນື້ອໃນເປັນສຳຄັນ ໃຫ້ມີລັກສະນະນຳພາ, ປຸກລະດົມ, ສຶກສາອົບຮົມ ແລະ ພັດທະນາທີ່ກ້າວໜ້າ ເຮັດໃຫ້ຄົນລາວ ມີນໍ້າໃຈຮັກຊາດ ແລະ ຮັກບ້ານເກີດເມືອງນອນຂອງຕົນ.

ຂ່າວ ແລະ ພາບ: ກົມປະຊາສຳພັນ ຫສນຍ.

RELATED ARTICLES

LEAVE A REPLY

Please enter your comment!
Please enter your name here

- Advertisment -
Google search engine

Most Popular

Recent Comments