ປີ 2023 ຂໍ້ລິເລີ່ມ“ໜຶ່ງແລວໜຶ່ງເສັ້ນທາງ”ຂອງ ສປ ຈີນ ມີອາຍຸຄົບຮອບ 10 ປີ ແລະ ມາຮອດປັດຈຸບັນ ໄດ້ກາຍເປັນເວທີຮ່ວມມືສາກົນ ທີ່ກວມຂອບເຂດກວ້າງຂວາງ ແລະ ມີຂະໜາດໃຫຍ່ທີ່ສຸດຂອງໂລກ ເຊິ່ງມີ 151 ປະເທດ ແລະ32 ອົງການຈັດຕັ້ງສາກົນໄດ້ເຊັນສັນຍາກັບ ຈີນຫລາຍກວ່າ 200 ສະບັບ. ຜົນສຳເລັດນີ້ຕ້ອງຍົກໃຫ້ ທ່ານ ສີຈິ້ນຜິງ ປະທານປະເທດຈີນ ທີ່ມີວິໄສທັດມອງກວ້າງເບິ່ງໄກ ເປັນຜູ້ວາງແນວທາງ ແລະ ປູເສັ້ນທາງໃຫ້ໂຄງການນີ້ເກີດຂຶ້ນ ແລະ ດຳເນີນໄປດວ້ຍຜົນສຳເລັດ. ທ່ານ ສີຈິ້ນຜິງ ໄດ້ກ່າວໄວ້ວ່າ: ຂໍ້ລິເລີ່ມ ໜຶ່ງແລວໜຶ່ງເສັ້ນທາງເປັນຂອງ ຈີນ, ແຕ່ໂອກາດເປັນຂອງໂລກ. ນີ້ເປັນຄຳເວົ້າທີ່ສັດຈະທຳທີ່ສຸດ, ບົນເສັ້ນທາງທີ່ຈີນຍິນດີ ຮ່ວມກັບຝ່າຍຕ່າງໆ, ສ້າງສາຍພົວພັນຄູ່ຮ່ວມມື ‘ໜຶ່ງແລວໜຶ່ງເສັ້ນທາງ’ ທີ່ໃກ້ຊິດກວ່າເກົ່າ, ຍຶດໝັ້ນການເດີນຕາມເສັ້ນທາງທີ່ສາມັກຄີ ແລະ ຮ່ວມມືກັນ,ເຊື່ອມຈອດກັນ ແລະ ພັດທະນາຮ່ວມກັນ, ທັງ ຮ່ວມກັນຊຸກຍູ້ ການສ້າງປະຊາຄົມຮ່ວມຊາຕາກຳຂອງມວນມະນຸດ.
ສໍາລັບ ສປປ ລາວ,ລົດໄຟ ລາວ-ຈີນ ແມ່ນໂຄງການຕົວແບບຂອງຂໍ້ລິເລີ່ມ“ໜຶ່ງແລວໜຶ່ງເສັ້ນທາງ” ທີ່ຖືກຈັດຕັ້ງປະຕິບັດດ້ວຍຜົນສຳເລັດ ທີ່ມີຄຸນນະພາບດີທີ່ສຸດຢູ່ ສປປ ລາວ ແລະ ມາຮອດປັດຈຸບັນລົດໄຟ ລາວ-ຈີນ ໄດ້ກາຍເປັນເສັ້ນເລືອດໃຫຍ່ ໃນການລຳລຽງຂົນສົ່ງຜູ້ໂດຍສານ ແລະ ຂົນສົ່ງສິນຄ້າລະຫວ່າງ ລາວ-ຈີນ ແລະ ລະຫວ່າງລາວ ໄປຫາບັນດາປະເທດອາຊຽນ, ພາກພື້ນ ແລະ ສາກົນ ໃນອະນາຄົດອັນໃກ້ນີ້, ດັ່ງທ່ານ ໄຊສົມພອນ ພົມວິຫານ ໄດ້ໃຫ້ສຳພາດຕໍ່ນັກຂ່າວ ວິທະຍຸໂທລະພາບສູນກາງຈີນ ຫລື CMG ໃນໂອກາດຢ້ຽມຢາມ ສປ ຈີນ ລະຫວ່າງວັນທີ 3 ຫາ 7 ກັນຍາ2023 ນີ້ວ່າ:ໃນຕະຫລອດໄລຍະ 10 ປີນັບຕັ້ງແຕ່ຈີນໄດ້ສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ອອກມານີ້, ການຮ່ວມມື ລາວ-ຈີນ ໄດ້ຮັບຜົນສຳເລັດຢ່າງຈົບງາມ. ມາຮອດກາງເດືອນສິງຫາ ປີ 2023 ນີ້,ທາງລົດໄຟ ລາວ-ຈີນ ເປັນໂຄງການສັນຍະລັກ “ໜຶ່ງແລວ ໜຶ່ງເສັ້ນທາງ” ໄດ້ຂົນສົ່ງຜູ້ໂດຍສານຫລາຍ ກວ່າ20 ລ້ານເທື່ອຄົນ, ນັບແຕ່ເດືອນມັງກອນຫາກາງເດືອນສິງຫາ 2023, ເສັ້ນທາງລົດໄຟ ລາວ-ຈີນ ໄດ້ເປີດແລ່ນລົດໄຟຫລາຍກວ່າ 13.000 ຂະບວນ, ເພີ່ມຂຶ້ນ 22% ເມື່ອທຽບໃສ່ໄລຍະດຽວກັນຂອງປີ 2022. ເສັ້ນທາງລົດໄຟ ລາວ-ຈີນ ໄດ້ກາຍເປັນເສັ້ນ ທາງແຫ່ງມິດຕະພາບ ແລະ ເປັນເສັ້ນທາງທີ່ນໍາເອົາຄວາມຜາສຸກ ມາສູ່ປະຊາຊົນສອງຊາດ ລາວ-ຈີນ ແລະ ມີຄວາມເຊື່ອໝັ້ນວ່າ: ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ ແຜນແມ່ບົດວ່າດ້ວຍ ການສ້າງຄູ່ຮ່ວມຊາຕາກຳ ລາວ-ຈີນ ຈະປະກອບສ່ວນຮັດແໜ້ນ ທາງດ້ານການເມືອງ, ຄວາມໄວ້ເນື້ອ ເຊື່ອໃຈ ແລະ ສະໜັບສະໜູນເຊິ່ງກັນ ແລະ ກັນໃນລະດັບສູງລະຫວ່າງ ສອງພັກ, ສອງລັດ, ຊຸກຍູ້ການຮ່ວມມືທາງດ້ານ ເສດຖະກິດ-ການຄ້າ-ການລົງທຶນສອງຝ່າຍ ລາວ-ຈີນ ໃຫ້ມີຜົນສຳເລັດໃໝ່, ຊຸກຍູ້ໃຫ້ ສປປ ລາວ ເຂົ້າເຖິງແຫລ່ງທຶນ, ດຶງດູດການລົງທຶນ ແລະ ການທ່ອງທ່ຽວຢູ່ ສປປລາວ, ພັດທະນາພື້ນຖານໂຄງລ່າງ, ການຮ່ວມມືດ້ານການຜະລິດ, ການຮ່ວມມືດ້ານພະລັງງານ ແລະ ອື່ນໆ ເພື່ອຊຸກຍູ້ໃຫ້ ສປປ ລາວ ພັດທະນາເສດຖະກິດ-ສັງຄົມຂອງຕົນ.
ທ່ານ ໄຊສົມພອນ ພົມວິຫານ ກ່າວຕື່ມວ່າ: ພາຍໃຕ້ສະພາບການໃນປັດຈຸບັນ ທີ່ທົ່ວໂລກກຳລັງຜະເຊີນກັບຄວາມຫຍຸ້ງຍາກ ທາງດ້ານເສດຖະກິດ-ການເງິນ ແລະ ສິ່ງທ້າທາຍຕ່າງໆ, ກອງປະຊຸມເວທີປຶກສາຫາລື ຂັ້ນສູງກ່ຽວກັບການຮ່ວມມືສາກົນ “ໜຶ່ງແລວໜຶ່ງເສັ້ນທາງ” ຄັ້ງທີ 3 ຈະຈັດຂຶ້ນຢູ່ນະຄອນຫລວງປັກກິ່ງ ສປ ຈີນໃນໄວໆນີ້, ກອງປະຊຸມດັ່ງກ່າວ ຈະເປັນເວທີຊ່ອງທາງ ແລະ ກາລະໂອກາດສົ່ງເສີມການຮ່ວມມື ເພື່ອຟື້ນຟູເສດຖະກິດຂອງແຕ່ລະປະເທດ ກໍຄືຟື້ນຟູເສດຖະກິດໂລກ ພາຍຫລັງການແພ່ລະບາດ ຂອງພະຍາດໂຄວິດ-19 ໄດ້ຜ່ອນຄາຍລົງ.
ເມື່ອຫວນຄືນກ່ອນນີ້ຫລາຍປີ, ຍ້ອນເຫັນໄດ້ຜົນດີຈາກຂໍ້ລິເລີ່ມ“ໜຶ່ງແລວໜຶ່ງເສັ້ນທາງ”,ປະເທດລາວຈິ່ງກາຍເປັນໜຶ່ງໃນບັນດາປະເທດທີ່ເຫັນດີ ແລະ ເຂົ້າຮ່ວມຂໍ້ລິເລີ່ມ“ໜຶ່ງແລວໜຶ່ງເສັ້ນທາງ”ກ່ອນປະເທດອື່ນ ແລະ ມາຮອດປັດຈຸບັນ ສປປ ລາວ ໄດ້ຮັບຜົນປະໂຫຍດຢ່າງໃຫຍ່ ຫລວງທັງທາງກົງ ແລະ ທາງອ້ອມ, ທັງໃນປັດຈຸບັນ ແລະອະນາຄົດ ຈາກຂໍ້ລິເລີ່ມນີ້. ໃນນັ້ນ,ທາງດ່ວນນະຄອນຫລວງວຽງຈັນ ຫາດ່ານບໍ່ຫານ-ບໍ່ເຕັນ, ນະຄອນຫລວງວຽງຈັນຫາ ເມືອງວັງວຽງ ກໍແມ່ນໂຄງການສັນຍະລັກ ພາຍໃຕ້ຂໍ້ລິເລີ່ມໜຶ່ງແລວໜຶ່ງເສັ້ນທາງ ເຊັ່ນດຽວກັນ. ພາຍຫລັງ ສ້າງສຳເລັດແລ້ວ, ການໄປມາຫາສູ່ກັນ ແລະ ການຄ້າລະຫວ່າງສອງປະເທດ ແລະ ພາກພື້ນຍິ່ງແໜ້ນແຟ້ນກວ່າເກົ່າ ເຊິ່ງໄດ້ສ້າງເງື່ອນໄຂທີ່ດີຫລາຍຢ່າງໃຫ້ແກ່ການຮ່ວມມືດ້ານ ເສດຖະກິດ-ການຄ້າ,ການລົງທຶນ,ການທ່ອງທ່ຽວ ແລະ ການເຊື່ອມຈອດ ລະຫວ່າງ ປະເທດດ້ວຍກັນ. ດັ່ງທີ່ ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງແຫ່ງ ສປປ ລາວ ໃນເວລານັ້ນ ໄດ້ກ່າວວ່າ: ອີງໃສ່ເງື່ອນໄຂພູມສາດຂອງລາວ, ລັດຖະບານ ຈິ່ງໄດ້ວາງຍຸດທະສາດໃຫ້ ສປປ ລາວ ຈາກປະເທດ Land Lock ໃຫ້ກາຍເປັນປະເທດ Land Link, ດ້ວຍການ ເຊື່ອມ ໂຍງກັບຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”ຂອງ ສປ ຈີນ. ສະນັ້ນ, ເສັ້ນທາງລົດໄຟລາວ-ຈີນ ຈິ່ງກາຍເປັນໂຄງການແຫ່ງສັນຍະລັກ ທີ່ເຊື່ອມຕໍ່ຍຸດທະສາດຂອງສອງປະເທດ ລາວ-ຈີນ ດ້ວຍຜົນສຳເລັດ. ນັ້ນສາມາດຢັ້ງຢືນໄດ້ຢ່າງໜັກແໜ້ນວ່າ: ໂຄງການຂໍ້ລິເລີ່ມ“ໜຶ່ງແລວໜຶ່ງເສັ້ນທາງ”ຂອງ ສປ ຈີນ ແລະ ໂຄງການລົດໄຟລາວ-ຈີນ ໄດ້ກາຍເປັນສ່ວນປະກອບທີ່ສຳຄັນທີ່ສຸດ ເຮັດໃຫ້ປະເທດລາວສາມາດລົບລ້າງ ຄວາມທຸກຍາກໄດ້ຕາມແຜນການທີ່ລັດຖະບານລາວ ໄດ້ກຳນົດໄວ້ຢ່າງແນ່ນອນ.
“ໜຶ່ງແລວໜຶ່ງເສັ້ນທາງ”ນອກຈາກອຳນວຍຄວາມສະດວກດ້ານການຄົມມະນາຄົມ ແລະ ຂົນສົ່ງແລ້ວ,ໃນໄລຍະມີການແພ່ລະບາດຂອງພະຍາດໂຄວິດ-19 ບັນດາປະເທດທີ່ເຂົ້າຮ່ວມໂຄງການນີ້ ຍັງໄດ້ຮັບການຊ່ວຍເຫລືອວັກຊິນ ແລະອຸປະກອນການແພດຕ້ານພະຍາດໂຄວິດ-19 ຕື່ມ ອີກຈາກ ສປ ຈີນ ໃນຈຳນວນຫລາຍຕື້ຫລອດ. ສະເພາະ ສປປ ລາວໃນປີ 2021 ຜ່ານມາໄດ້ຮັບການຊວ່ຍເຫລືອວັກຊິນ ທັງໝົດຈາກຫລາຍປະເທດລວມ 13 ລ້ານກ່ວາຫລອດ,ໃນນັ້ນເກືອບ 7 ລ້ານຫລອດແມ່ນວັກຊິນຊີໂນຟາມ ທີ່ໄດ້ຮັບການຊ່ວຍເຫລືອລ້າຈາກ ສປ ຈີນ.
ຢ່າງໃດກໍຕາມ,ໃນຂະນະທີ່“ໜຶ່ງແລວໜຶ່ງເສັ້ນທາງ”ໄດ້ກາຍເປັນເສັ້ນທາງການພັດທະນາທີ່ກວ້າງຂວາງຂອງຄົນທັງຫລາຍ, ທັງມີຫລາຍປະເທດທີ່ມີຄວາມສົນໃຈຢາກເຂົ້າຮວ່ມໃນໂຄງການນີ້, ແຕ່ຜູ້ບໍ່ຫວັງດີຍາມໃດກໍໃສ່ຮ້າຍປ້າຍສີໃສ່ໂຄງການນີ້ຕະຫລອດມາ ເຊິ່ງໃນຄວາມເປັນຈິງ ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ບໍ່ໄດ້ມີເງື່ອນໄຂໃນທາງການເມືອງ ແລະ ບໍ່ແຊກແຊງວຽກງານພາຍໃນຂອງປະເທດອື່ນໃນເວລາຮ່ວມມືກັນ, ນະໂຍບາຍແບບນີ້ ຈິ່ງມີຜົນດີຕໍ່ປະເທດພວມພັດທະນາຫລາຍກວ່າ, ໂດຍຖືເອົາມາດຕະຖານສູງ ແບບຍືນຍົງ ແລະ ສ້າງຜົນປະໂຫຍດໃຫ້ແກ່ຊີວິດ ການເປັນຢູ່ຂອງປະຊາຊົນເປັນເປົ້າໝາຍ, ລົງເລິກຄວາມໂລ່ງລ່ຽນດ້ານການຄ້າ, ເປີດກວ້າງການຄ້າກັບປະເທດອ້ອມຂ້າງ, ສົ່ງເສີມການນຳເຂົ້າສິນຄ້າຄຸນນະພາບດີໃຫ້ຫລາຍຂຶ້ນ, ຍົກສູງລະດັບການຫັນເປັນເສລີ ແລະ ຄວາມສະດວກດ້ານການຄ້າ ແລະ ການລົງທຶນ, ຊຸກຍູ້ໃຫ້ການຄ້າພັດ ທະນາຢ່າງດຸນດ່ຽງ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ.ໃນນັ້ນ ຈີນ ໄດ້ສືບຕໍ່ເປີດກວ້າງການຮ່ວມມືດ້ານຕະຫລາດໃນຮູບແບບຫລາຍຝ່າຍ, ດຳເນີນການຮ່ວມມືກັບສາກົນໃນດ້ານຄວາມສາມາດການຜະລິດ. ລົງເລິກການໄຫລວຽນຕໍ່ກັນໃນດ້ານເງິນທຶນ, ດຶງດູດອົງການພັດທະນາ ຫລາຍຝ່າຍ ແລະ ສະຖາບັນການເງິນຂອງປະເທດພັດທະນາເຂົ້າຮ່ວມ, ບູລະນະລະບົບການລົງທຶນ ແລະ ການລະດົມທຶນໃນຫລາຍຮູບແບບ, ບົນຫລັກການຮ່ວມມືກັນ, ຕ່າງຝ່າຍຕ່າງມີຜົນປະໂຫຍດ.
ຜູ້ຂຽນຂໍຢໍ້າຕື່ມວ່າ: ຜົນສຳເລັດຂອງໂຄງການສ້າງທາງລົດໄຟ ລາວ-ຈີນ ເປັນສັນຍາະລັກທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ”ຢ່າງມີຄຸນນະພາບສູງ ແລະ ໃນອະນາຄົດອັນໃກ້ນີ້ ຈາກທາງລົດໄຟລາວ-ຈີນ ໄປທາງພາກເໜືອຂອງລາວ ຜ່ານຊາຍແດນຈີນ ກໍ່ສາມາດເຂົ້າເຖິງບັນ ດາປະ ເທດເອີຣົບໄດ້. ນອກນັ້ນ,ຈາກທາງລົດໄຟລາວ-ຈີນ ຜ່ານປະເທດໄທສາມາດ ໄປຮອດມາເລເຊຍ ແລະ ສິງກະໂປໄດ້ ຫລື ໃນຮູບການໜຶ່ງແມ່ນຜ່ານທາງລົດໄຟ ລາວ-ຈີນ ໄປທາງພາກກາງ ຫລື ພາກໃຕ້ຂອງ ສປປ ລາວ ເຂົ້າໄປຫວຽດນາມ ຫລື ກຳປູເຈຍຜ່ານທະເລ ແລະ ອອກສູ່ມາເລ ເຊຍ ແລະ ຮອດສິງກະໂປ ໄດ້ເຊັ່ນດຽວກັນ. ຜົນສຳເລັດຂອງການສ້າງທາງລົດໄຟ ລາວ-ຈີນ ເຮັດໃຫ້ປະເທດລາວ ເປັນປະເທດທີ່ບໍ່ມີທາງອອກສູ່ທະເລ, ເປັນປະເທດເຊື່ອມໂຍງເຊື່ອມຈອດ ເຊິ່ງໄດ້ກາຍເປັນສັນຍະລັກ ທາງປະຫວັດສາດ ທີ່ສຳຄັນຂອງການພັດທະນາ ພື້ນຖານໂຄງລ່າງທີ່ທັນສະໄໝ ຂອງ ສປປ ລາວ, ທັງຊຸກຍູ້ການພັດທະນາ ເສດຖະກິດ-ສັງຄົມຂອງລາວ ໃຫ້ເຂັ້ມແຂງ.“ໜຶ່ງແລວໜຶ່ງເສັ້ນທາງ” ໄດ້ກາຍເປັນເວທີຮ່ວມມືສາກົນທີ່ກວ້າງຂວາງທີ່ສຸດ ແລະ ມີຂະໜາດໃຫຍ່ທີ່ສຸດຢູ່ໃນໂລກ ແລະ ໜຶ່ງແຫລວໜຶ່ງເສັ້ນທາງ, ແມ່ນໜຶ່ງດຽວທີ່ດີທີ່ສຸດ ຢູ່ໃນໂລກໃນການນຳເອົາ ຄວາມຜາສຸກມາສູ່ປະຊາຄົມ ຮ່ວມຊາຕາກຳຂອງມວນມະນຸດຢ່າງແທ້ຈິງຂອງສະຕະວັດທີ 21 ນີ້.
ປະຊາຊົນລາວບັນດາເຜົ່າ ສະແດງຄວາມຂອບໃຈ ແລະ ຮູ້ບຸນຄຸນມາຍັງພັກ, ລັດ ແລະ ປະຊາຊົນຈີນ ພາຍໃຕ້ການຊີ້ນຳ ແລະ ນຳພາຂອງທ່ານປະທານ ສີຈິ້ນຜິງ ທີ່ໄດ້ນຳເອົາຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”ມາຈັດຕັ້ງປະຕິບັດຢູ່ ສປປ ລາວ ຈິ່ງເຮັດໃຫ້ປະເທດລາວ ແລະ ປະຊາຊົນລາວ ໄດ້ຮັບຜົນປະໂຫຍດ ໃນການພັດທະນາເສດຖະກິດ-ສັງຄົມ ແລະ ມີຄວາມສະດວກສະບາຍ ໃນການເດີນທາງ ຄືທຸກມື້ນີ້. ຜູ້ຂຽນມີຄວາມເຊື່ອໝັ້ນຕື່ມອີກວ່າ: ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ ແຜນແມ່ບົດວ່າດ້ວຍ ການສ້າງຄູ່ຮ່ວມຊາຕາກຳ ລາວ-ຈີນ ຈະປະກອບສ່ວນຮັດແໜ້ນທາງ ດ້ານການເມືອງ, ຄວາມໄວ້ເນື້ອເຊື່ອໃຈ ແລະ ສະໜັບສະໜູນ ເຊິ່ງກັນ ແລະ ກັນໃນລະດັບສູງລະຫວ່າງສອງພັກ, ສອງລັດ, ຊຸກຍູ້ການຮ່ວມມືທາງດ້ານ ເສດຖະກິດ-ການຄ້າ-ການລົງທຶນ ສອງຝ່າຍລາວ-ຈີນ ໃຫ້ມີຜົນສຳເລັດໃໝ່, ຊຸກຍູ້ໃຫ້ ສປປ ລາວ ເຂົ້າເຖິງແຫລ່ງທຶນ, ດຶງດູດການລົງທຶນ ແລະ ການທ່ອງທ່ຽວຢູ່ ສປປ ລາວ, ພັດທະນາພື້ນຖານໂຄງລ່າງ, ການຮ່ວມມືດ້ານການຜະລິດ, ການຮ່ວມມືດ້ານພະລັງງານ ແລະ ອື່ນໆ.
ໂດຍ:ດວງຈິດສະຫວັດບຸນມີ
