ວິທະຍຸສາກົນ ແຫ່ງປະເທດຈີນ (CRI) ໄດ້ລາຍງານວ່າ: ວັນທີ 21 ກັນຍາ 2021, ທ່ານສີຈິ້ນຜິງ ປະທານປະເທດຈີນ ໄດ້ສະເໜີຂໍ້ລິເລີ່ມການພັດທະນາທົ່ວໂລກ, ເຊິ່ງໄດ້ຮັບການຕອບຮັບສະໜັບສະໜູນຈາກປະຊາຄົມໂລກຢ່າງກວ້າງຂວາງ. ໃນສອງປີຜ່ານມາ, ຂໍ້ລິເລີ່ມການພັດທະນາທົ່ວໂລກ ໄດ້ສະແດງໃຫ້ເຫັນເຖິງຄວາມມີຊີວິດຊີວາທີ່ແຂງແຮງ ແລະ ແຮງດຶງດູດທີ່ເຂັ້ມແຂງ, ໄດ້ເພີ່ມພະລັງແຮງຂອງຈີນ ເຂົ້າໃນການພັດທະນາຂອງໂລກ.
ໃນຖານະທີ່ເປັນໂຄງການທຳອິດຂອງຂໍ້ລິເລີ່ມພັດທະນາທົ່ວໂລກທີ່ໄດ້ຮັບການປະຕິບັດຢູ່ ສປປ ລາວ, ໃນເດືອນພະຈິກ 2022, ຈີນໄດ້ຊ່ວຍເຫລືອອົງການອາຫານໂລກ (FAO) ແລະໂຄງການອາຫານທ່ຽງໂຮງຮຽນ ໃຫ້ກະຊວງສຶກສາທິການ ແລະ ກິລາລາວ ດ້ວຍເຂົ້າສານ 930 ໂຕນ ແລະ ປາກະປ໋ອງ 120 ໂຕນ, ເພື່ອສະໜອງອາຫານໃຫ້ແກ່ນັກຮຽນຫລາຍກວ່າ 130.000 ຄົນ ຂອງໂຮງຮຽນປະຖົມ 1.400 ກວ່າແຫ່ງ ໃນ 8 ແຂວງຂອງລາວ, ເພື່ອສະໜັບສະໜູນການພັດທະນາການສຶກສາຂັ້ນພື້ນຖານ ແລະ ໂພຊະນາການເດັກໃນລາວ.
ໂຮງຮຽນປະຖົມສົມບູນນາຫອຍ ຕັ້ງຢູ່ເມືອງສັງທອງ ນະຄອນຫລວງວຽງຈັນ ຫ່າງຈາກຕົວເມືອງ 50 ກວ່າກິໂລແມັດ, ເປັນໂຮງຮຽນໜຶ່ງທີ່ໄດ້ຮັບຜົນປະໂຫຍດຈາກໂຄງການນີ້. ນາງ ຊົມພູ ນັກຮຽນຊັ້ນປະຖົມ ປ4 ບອກວ່າ: ກ່ອນບໍ່ທັນມີໂຄງການອາຫານທ່ຽງ, ລາວມັກຫິວເຂົ້າໃນເວລາຮຽນຕອນບ່າຍ ແລະ ບາງເທື່ອ ພໍ່ແມ່ຂອງລາວຈະມາໂຮງຮຽນເພື່ອຮັບໄປກິນເຂົ້າຕອນທ່ຽງ. ແຕ່ຫລັງຈາກໂຄງການອາຫານໃນໂຮງຮຽນໄດ້ຖືກສ້າງຕັ້ງຂຶ້ນ, ລາວໄດ້ກິນເຂົ້າທ່ຽງກັບເພື່ອນຮ່ວມຫ້ອງຮຽນໃນແຕ່ລະມື້, ບາງຄັ້ງເປັນເຂົ້າປຽກເຂົ້າ, ບາງຄັ້ງເປັນປາກະປ໋ອງ, ບາງຄັ້ງແມ່ນຂົ້ວໝາກຫຸ່ງ, ເວລາຮຽນໃນຕອນບ່າຍ ລາວກໍ່ຮູ້ສຶກມີແຮງຫລາຍຂຶ້ນ.
ບົນເສັ້ນທາງການພັດທະນາ, ປະເທດໃດກໍ່ບໍ່ໃຫ້ຕົກຫລົ່ນ ແລະຄົນໃດກໍ່ບໍ່ໃຫ້ປະຖິ້ມ, ນີ້ແມ່ນຈຸດປະສົງເບື້ອງຕົ້ນຂອງຂໍ້ລິເລີ່ມພັດທະນາທົ່ວໂລກ. ເມື່ອບໍ່ດົນມານີ້,ຈີນໄດ້ປະກາດຈະເປີດກອງທຶນພິເສດ 10 ຕື້ໂດລາສະຫະລັດ ເພື່ອປະຕິບັດຂໍ້ລິເລີ່ມການພັດທະນາທົ່ວໂລກ. ທຶນເຫລົ່ານີ້ຈະສຸມໃສ່ 8 ຂົງເຂດຮ່ວມມືທີ່ສຳຄັນຂອງຂໍ້ລິເລີ່ມການພັດທະນາທົ່ວໂລກເຊັ່ນ: ການຫລຸດຜ່ອນຄວາມທຸກຍາກ, ການປ່ຽນແປງຂອງດິນຟ້າອາກາດ ແລະການພັດທະນາສີຂຽວ, ສະໜັບສະໜູນການຊຸກຍູ້ການປະຕິບັດໂຄງການຕ່າງໆທີ່ວາງໄວ້, ເພີ່ມພະລັງແຮງໃໝ່ ແລະຊີວິດຊີວາໃໝ່ໃຫ້ແກ່ວຽກງານການພັດທະນາທົ່ວໂລກ.
ມາຮອດປັດຈຸບັນ, ມີ 70 ກວ່າປະເທດໄດ້ເຂົ້າຮ່ວມກຸ່ມເພື່ອນມິດແຫ່ງຂໍ້ລິເລີ່ມການພັດທະນາທົ່ວໂລກ. ມີ 41 ປະເທດ, ເຂດແຄວ້ນ ແລະອົງການຈັດຕັ້ງສາກົນ ໄດ້ຮ່ວມກັນຊຸກຍູ້ການສ້າງ ເຄືອຂ່າຍສູນສົ່ງເສີມການພັດທະນາທົ່ວໂລກ ແລະເກືອບ 30 ປະເທດ ແລະອົງການຈັດຕັ້ງສາກົນໄດ້ລົງນາມໃນບົດບັນທຶກຄວາມເຂົ້າໃຈກ່ຽວກັບການຮ່ວມມືກັບຈີນ, ຊຸກຍູ້ຂໍ້ລິເລີ່ມເຊື່ອມໂຍງເຊື່ອມຈອດຢ່າງເລິກເຊິ່ງກັບຍຸດທະສາດການພັດທະນາທີ່ສຳຄັນຂອງບັນດາປະເທດ ແລະ ພາກພື້ນທີ່ກ່ຽວຂ້ອງ. ເກືອບ 200 ໂຄງການຮ່ວມມືກັນໃນພາກປະຕິບັດຕົວຈິງຖືກຈັດເຂົ້າເປັນໂຄງການຂໍ້ລິເລີ່ມການພັດທະນາທົ່ວໂລກ, ເຊິ່ງໄດ້ກວມເອົາ 60 ກວ່າປະເທດທີ່ກຳລັງພັດທະນາ.
ຂໍ້ລິເລີ່ມການພັດທະນາທົ່ວໂລກບໍ່ພຽງແຕ່ໄດ້ຮັບການສະໜັບສະໜູນຢ່າງກວ້າງຂວາງຈາກປະຊາຄົມສາກົນເທົ່ານັ້ນ, ຫາກຍັງໄດ້ຮັບການບັນທຶກເຂົ້າໃນບັນດາເອກະສານຮ່ວມມືລະຫວ່າງຈີນກັບອາຊຽນ, ອາຊີກາງ, ອາຟຣິກາ, ອາເມລິກາລາຕິນ ແລະ ປະເທດໝູ່ເກາະປາຊີຟິກ, ເຊິ່ງໄດ້ສະແດງໃຫ້ເຫັນເຖິງຄວາມມີຊີວິດຊີວາທີ່ແຂງແຮງ ແລະ ແຮງດຶງດູດທີ່ເຂັ້ມແຂງ.
