ຕາມຂ່າວຈາກວິທະຍຸສາກົນຫວຽດນາມ, ອາຊຽນໃຫ້ຄຳໝັ້ນໝາຍຢ່າງແຂງແຮງ ເພື່ອບັນລຸການພັດທະນາແບບຍືນຍົງ ຢູ່ພາກພື້ນ ຫລັງຈາກ ທ່ານ ນາງ ເຣັດໂນ ມາຊູດີ(Retno Marsudi), ລັດຖະມົນຕີການຕ່າງປະເທດອິນໂດເນເຊຍ ທີ່ຕາງໜ້າໃຫ້ບັນດາປະເທດອາຊຽນ ໄດ້ຍົກອອກມາທີ່ກອງປະຊຸມສຸດຍອດ ບັນດາເປົ້າໝາຍການພັດທະນາແບບຍືນຍົງ ໃນວັນທີ 19 ກັນຍານີ້ ທີ່ສຳນັກງານໃຫຍ່ ສະຫະປະຊາຊາດນະຄອນຫລວງນິວຢອກ ຂອງ ສ.ອາເມລິກາ. ພ້ອມທັງໄດ້ເນັ້ນໜັກວ່າ: ສະພາບແວດລ້ອມທົ່ວໂລກ ນັບມື້ນັບປະເຊີນໜ້າກັບສິ່ງທ້າທາຍ ແລະ ຄວາມບໍ່ແນ່ນອນຫລາຍຢ່າງ. ສະນັ້ນ, ອາຊຽນ ຊຸກຍູ້ການຮ່ວມມື ເພື່ອເພີ່ມທະວີຄວາມສາມາດຟື້ນຟູ ແລະ ຮັບມື ກັບສິ່ງທ້າທາຍ ທີ່ຫາກໍ່ ພົ້ນເດັ່ນຂຶ້ນ ແລະ ການກະທົບ ໃນອະນາຄົດ ເພື່ອບັນລຸ ເປົ້າໝາຍ ພັດທະນາແບບຍືນຍົງ, ຂະນະທີ່ອາຊຽນ ສືບຕໍ່ຜັນຂະຫຍາຍບັນດາ ຄຳໝັ້ນສັນຍາຊຸກຍູ້ວິໄສທັດປະຊາຄົມອາຊຽນ 2025, ໂຄງການດຳເນີນງານ 2030 ກໍ່ຄື ຄວາມມານະພະຍາຍາມມຸ່ງໄປເຖິງວິໄສທັດປະຊາຄົມອາຊຽນ 2045. ນອກນັ້ນອາຊຽນ ຍັງຈະປະຕິບັດ ບັນດາຄຳໝັ້ນສັນຍາເພື່ອຊຸກຍູ້ການພັດທະນາ ແບບຍືນຍົງ. ອາຊຽນ ກໍ່ຢືນຢັນຄືນໃໝ່ການສະໜັບສະໜູນ ເລື່ອງເພີ່ມທະວີລັດທິຫລາຍຝ່າຍ, ໂດຍອີງໃສ່ແກ່ນສານແມ່ນສະຫະປະຊາຊາດ, ພ້ອມກັນນັ້ນ, ສະໜັບສະໜູນການປະຕິບັດຕາມຫລັກການຂອງກົດບັດສະຫະປະຊາຊາດ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
