ກົມຄວາມປອດໄພທາງໄຊເບີ, ກະຊວງເຕັກໂນໂລຊີ ແລະ ການສື່ສານ ຮ່ວມກັບ ກຸ່ມບໍລິສັດ ເອໄອເອັຟ ຈໍາກັດ ລົງນາມເຊັນບົດບັນທຶກຄວາມເຂົ້າໃຈ ແນໃສ່ເພື່ອຮ່ວມມືກັນຍົກລະດັບຫ້ອງປະຕິບັດການຄວາມປອດໄພໄຊເບີ ແຫ່ງຊາດ ໃຫ້ໄດ້ມາດຕະຖານສາກົນ ແລະ ສາມາດໃຫ້ບໍລິການປ້ອງກັນຄວາມປອດໄພໂຄງລ່າງພື້ນຖານຂໍ້ມູນຂ່າວສານທີ່ສໍາຄັນຂອງປະເທດເປັນຕົ້ນແມ່ນ: ການບໍລິການການປ້ອງກັນໄພອັນຕະລາຍທາງອິນເຕີເນັດ, ປ້ອງກັນການເຂົ້າທໍາລາຍເວັບໄຊ, ຖານຂໍ້ມູນຂອງພາກລັດ ແລະ ເອກະຊົນ, ປ້ອງກັນໄວຣັດຄອມພິວເຕີ, ການແກ້ໄຂບັນຫາຈຸດອ່ອນຂອງລະບົບເຄືອຄາຍຄອມພິວເຕີ ລວມທັງການປ້ອງກັນລະບົບຖານຂໍ້ມູນການບໍລິຫານ, ການບໍລິການຕ່າງໆ ທີ່ນໍາໃຊ້ລະບົບດິຈິຕອນໃຫ້ມີຄວາມປອດໄພ.
ທ່ານ ຄໍາຫຼ້າ ສຸນນະລັດ, ຫົວໜ້າກົມຄວາມປອດໄພໄຊເບີ ໄດ້ໃຫ້ຮູ້ວ່າ: ພາຍຫຼັງກະຊວງ ເຕັກໂນໂລຊີ ແລະ ການສື່ສານ ກໍຄື ກົມຄວາມປອດໄພໄຊເບີ ໄດ້ຮັບລະບົບປະຕິບັດການຄວາມປອດໄພໄຊເບີ ຈາກ ອົງການຄຸ້ມຄອງຄວາມປອດໄພຂໍ້ມູນຂ່າວສານ, ກະຊວງ ຖະແຫຼງຂ່າວ ແລະ ການສື່ສານ ຂອງ ສສ. ຫວຽດນາມ ໃນຕົ້ນປີ 2023 ທີ່ຜ່ານມາ ກົມຄວາມປອດໄພໄຊເບີໄດ້ເອົາໃຈໃສ່ຄຸ້ມຄອງລະບົບດັ່ງກ່າວຢ່າງເປັນປົກກະຕິ ໂດຍໄດ້ດຳເນີນຕິດຕາມເຝົ້າລະວັງເວັບໄຊມີຈໍານວນປະມານ 120 ເວັບໄຊ, ເຝົ້າລະວັງການບຸກລຸກຖານຂໍ້ມູນຂອງຜູ້ໃຊ້ງານຄອມພິວເຕີພາຍໃນກະຊວງຈໍານວນ 300 ເຄື່ອງ, ຕິດຕັ້ງໃນຄອມພິວເຕີຜູ້ໃຊ້ຂອງກົມຄວາມປອດໄພໄຊເບີ, ສູນບໍລິຫານລັດດິຈິຕອນ ແລະ ກົມຄື້ນຄວາມຖີ່ວິທະຍຸສື່ສານໄດ້ຈໍານວນ 44 ເຄື່ອງ, ໄດ້ມີການແຈ້ງເຫດກ່ຽວກັບຂໍ້ມູນຮົ່ວໄຫຼພາຍໃນ ສປປ ລາວ ຊຶ່ງເປັນລະບົບທີ່ໄດ້ນໍາໃຊ້ໃຫ້ບໍລິການຕ່າງໆ ເຊັ່ນ: ຈົດໝາຍເອເລັກໂຕຣນິກ, ຂໍ້ມູນສ່ວນບຸກຄົນ ທີ່ໄດ້ລົງທະບຽນໃນລະບົບເກັບກໍາຂໍ້ມູນ KYC ຂໍ້ມູນໃນລະບົບຄຸ້ມຄອງການເກັບລາຍຮັບ, ລະບົບ ຂ່າວສານດ້ານສຸກຂະພາບ ແລະ ລະບົບການເກັບກໍາຂໍ້ມູນຂອງພາກລັດ (G-drive).
ເພື່ອສຶບຕໍ່ວຽກງານດັ່ງກ່າວ, ກົມຄວາມປອດໄພໄຊເບີ ຈຶ່ງໄດ້ເຫັນດີຄົ້ນຄວ້າ ຮ່ວມມື ກັບ ກຸ່ມບໍລິສັດ ເອໄອເອັຟ ຈໍາກັດ ໃນການສຶກສາຄວາມເປັນໄປໄດ້ໃນການສືບຕໍ່ລົງທຶນ ລວມໄປເຖີງສຶກສາຄວາມເປັນໄປໄດ້ ໃນການເປີດໃຫ້ບໍລິການການປອ້ງກັນຄວາມປອດໄພ ໂຄງລ່າງພື້ນຖານຂໍ້ມູນຂ່າວສານ ໃຫ້ແກ່ທຸກຂະແໜງການ ລວມທາງພາກລັດ ແລະ ເອກະຊົນ. ຊຶ່ງໃນອະນາຄົດ ຖ້າຫາກສູນປະຕິບັດການຄວາມປອດໄພໄຊເບີ (Security Operation Center) ສາມາດປັບປຸງ ແລະ ຕິດຕັ້ງລະບົບໄດ້ສົມບູນແບບ ປະກອບມີບຸກຄະລະກອນຄົບຊຸດ ແລະ ມີວິຊາການທີ່ມີຄວາມຮູ້ຄວາມສາມາດພ້ອມ ພວກເຮົາຈະສາມາດໃຫ້ບໍລິການ ແລະ ຈະສາມາດສ້າງລາຍຮັບເຂົ້າງົບປະມານໄດ້ຢ່າງຫຼວງຫຼາຍ ທັງຈະເປັນການຍົກສູງບົດບາດ ຂອງກະຊວງເຕັກໂນໂລຊີ ແລະ ການສື່ສານ ໃນຂົງເຂດວຽກງານດ້ານ ການຮັກສາຄວາມປອດໄພທາງໄຊເບີ ໃຫ້ກ້າວໜ້າໄປເທື່ອລະກ້າວ ເພື່ຮັບປະກັນໄດ້ຄວາມປອດໄພໂຄງລ່າງພື້ນຖານຂໍ້ມູນຂ່າວສານທີ່ສໍາຄັນ ແລະ ບັນລຸເປົ້າໝາຍ ສໍາເລັດຕາມແຜນພັດທະນາເສດຖະກິດດິຈິຕອນຂອງລັດຖະບານແຕ່ນີ້ຮອດປີ 2030.
ພິທີລົງນາມດັ່ງກ່າວໄດ້ຈັດຂຶ້ນໃນແລງຂອງວັນທີ 07 ກັນຍາ 2023 ທີ່ຜ່ານມາ, ທີ່ຫ້ອງປະຊຸມກະຊວງເຕັກໂນໂລຊີ ແລະ ການສື່ສານ (ຕຶກສີສະເກດ) ຊຶ່ງລົງນາມໂດຍທ່ານ ຄຳຫຼ້າ ສຸນນະລັດ ຫົວໜ້າ ກົມຄວາມປອດໄພທາງໄຊເບີ ແລະ ທ່ານ ລັດຕະນະມະນີ ຄູນນີວົງ, ຮອງປະທານ ອາວຸໂສ ກຸ່ມບໍລິສັດ ເອໄອເອັຟ ຈຳກັດ ໂດຍມີທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ບັນດາຮອງລັດຖະມົນຕີ, ຄະນະຜູ້ບໍລິຫານ ກຸ່ມບໍລິສັດ ເອໄອເອັຟ ຈໍາກັດ ພ້ອມດ້ວຍແຂກທີ່ຖືກເຊີນເຂົ້າຮ່ວມເປັນສັກຂີພິຍານ.
