ໃນວັນທີ 11 ກັນຍາ 2023 ນີ້, ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ສະຫາຍ ນາງ ແອນນາ ມາເລຍ ມາລີ ມາຊາໂດ ກຳມະການສູນກາງພັກຄອມມູນິດກູບາ, ຮອງປະທານສະພາແຫ່ງຊາດອຳນາດປະຊາຊົນ, ຮອງປະທານສະພາແຫ່ງລັດ ແຫ່ງ ສ ກູບາ ໃນໂອກາດເດີນທາງມາຢ້ຽມຍາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 10-13 ກັນຍາ 2023.
ໂອກາດນີ້, ສະຫາຍ ບຸນທອງ ຈິດມະນີ ໄດ້ສະແດງຄາາມຍິນຕ້ອນຮັບ ແລະ ຕີລາຄາສູງ ຕໍ່ສະຫາຍ ນາງ ແອນນາ ມາເລຍ ມາລີ ມາຊາໂດ ທີ່ໄດ້ນໍາພາຄະນະ ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນສໍາຄັນ ເຂົ້າໃນການຮັດແໜ້ນການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ ເວົ້າລວມ, ເວົ້າສະເພາະ ກໍຄື ລະຫວ່າງສອງສະພາແຫ່ງຊາດ ລາວ-ກູບາ ໃຫ້ໄດ້ຮັບການພັດທະນາ ແລະ ສືບຕໍ່ ໃຫ້ການສະໜັບສະໜູນຊ່ວຍເຫລືອ ເຊິ່ງກັນ ແລະ ກັນ ໃນທຸກໆດ້ານ ຕະຫລອດໄປ. ພ້ອມນັ້ນ, ສະຫາຍ ບຸນທອງ ຈິດມະນີ ຍັງໄດ້ຕີລາຄາສູງຕໍ່ການຮ່ວມມືກັນໃນ ຫລາຍໆດ້ານລະຫວ່າງສອງປະເທດ ລາວ-ກູບາ ເປັນຕົ້ນ ການຮ່ວມມືດ້ານການເມືອງ, ດ້ານພັກ, ດ້ານເສດຖະກິດ, ດ້ານການສຶກສາ, ສາທາ, ວັດທະນະທຳ-ສັງຄົມ, ດ້ານກະສິກຳ ແລະ ອື່ນໆ.
ສະຫາຍນາງ ແອນນາ ມາເລຍ ມາລີ ມາຊາໂດ ກໍໄດ້ສະແດງຄວາມຂອບໃຈຕໍ່ ສະຫາຍ ບຸນທອງ ຈິດມະນີ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງແຈ້ງຜົນການພົບກັບຄະນະຜູ້ແທນຂອງ ສປປ ລາວ ກໍຄື ຄະນະຜູ້ແທນ ສະພາແຫ່ງຊາດ ແຫ່ງ ສປປ ລາວ ເຊິ່ງທັງສອງຝ່າຍໄດ້ຕີລາຄາສູງຕໍ່ການຮ່ວມມືກັນໃນຫລາຍຫລາຍໆດ້ານໃນໄລຍະຜ່ານມາ ແລະ ໄດ້ມີຜົນສຳເລັດເປັນກ້າວໆມາ, ພ້ອມນີ້, ສະຫາຍ ນາງ ແອນນາ ມາເລຍ ມາລີ ມາຊາໂດ ຍັງໄດ້ແຈ້ງ ຈຸດປະສົງຂອງການເດີນທາງຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໃຫ້ຮອງປະທານປະເທດ ຮັບຊາບ.
ຂ່າວ: ທະນູທອງ
ພາບ: ຊັງກີ
