ກອງປະຊຸມພົບປະ ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດອຳນາດປະຊາຊົນ ແຫ່ງ ສ.ກູບາ ໄດ້ຈັດຂຶ້ນໃນຕອນເຊົ້າວັນທີ 11 ກັນຍາ ນີ້ ທີ່ຫໍສະພາແຫ່ງຊາດ ຫຼັງໃໝ່; ຝ່າຍລາວ ນໍາໂດຍ ສະຫາຍ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແລະ ຝ່າຍ ສ ກູບາ ນໍາໂດຍ ສະຫາຍ ນາງ ແອນນາ ມາເລຍ ມາລີ ມາຊາໂດ ຮອງປະທານສະພາແຫ່ງຊາດອໍານາດປະຊາຊົນ, ຮອງປະທານສະພາແຫ່ງລັດ ແຫ່ງ ສ.ກູບາ.
ການພົບປະຄັ້ງນີ້, ເປັນໂອກາດດີໃຫ້ແກ່ສອງອົງການນິຕິບັນຍັດ ລາວ-ກູບາ ທີ່ຈະໄດ້ພ້ອມກັນຕີລາຄາການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດອໍານາດປະຊາຊົນ ແຫ່ງ ສ ກູບາ ໃນໄລຍະຜ່ານມາ ແລະ ປຶກສາຫາລືກ່ຽວກັບທິດທາງແຜນການໃນຕໍ່ໜ້າ ຊຶ່ງເປັນການປະກອບ ສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອອັນດີງາມມາແຕ່ດົນນານບົນພື້ນຖານອຸດົມການສັງຄົມນິຍົມ ລະຫວ່າງ ສອງພັກ, ສອງລັດ ແລະ ປະຊາຊົນ ສອງປະເທດ ລາວ-ກູບາ ເວົ້າລວມ, ເວົ້າສະເພາະແມ່ນ ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດອໍານາດປະຊາຊົນ ແຫ່ງ ສ.ກູບາ ໃຫ້ແຕກດອກອອກຜົນຍິ່ງຂຶ້ນ.
ການພົວພັນ ແລະ ຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາແຫ່ງຊາດອໍານາດປະຊາຊົນກູບາ ໃນໄລຍະຜ່ານມາ ຊຶ່ງສອງຝ່າຍໄດ້ຮ່ວມກັນຈັດຕັ້ງປະຕິບັດ ບົດບັນທຶກຊ່ວຍຈໍາ (MOU) ວ່າດ້ວຍ ການຮ່ວມມື ລະຫວ່າງ ສອງອົງການນິຕິບັນຍັດ ທີ່ໄດ້ລົງນາມ ໃນປີ 2019 ຢ່າງເປັນຮູບປະທໍາ ຊຶ່ງສະແດງອອກໃນການແລກປ່ຽນການຢ້ຽມຢາມຂອງຜູ້ແທນ ລະດັບປະທານສະພາ ແລະ ຄະນະມິດຕະ ພາບລັດຖະສະພາລາວ-ກູບາ. ນອກຈາກນີ້, ຍັງມີການແລກປ່ຽນບົດຮຽນ ແລະ ຂໍ້ມູນຂ່າວສານ, ສົ່ງສານຊົມເຊີຍ, ສານອວຍພອນ ເຊິ່ງກັນ ແລະ ກັນ ໃນໂອກາດວັນສຳຄັນຂອງຊາດ ແລະ ສະໜັບສະໜູນກັນໃນເວທີລັດຖະສະພາພາກພື້ນ ແລະ ສາກົນ.
ສາທາລະນະລັດ ກູບາ ໄດ້ຖືກຮັບຮອງເຂົ້າເປັນປະເທດສັງເກດການ ໃນກອງປະຊຸມໃຫຍ່ສາມັດຊາລະຫວ່າງຊາດອາຊຽນ (AIPA) ຄັ້ງທີ 44 ຢູ່ ສາທາລະນະລັດ ອິນໂນເນເຊຍ ໃນທ້າຍເດືອນສິງຫາ 2023 ຜ່ານມາ ຊຶ່ງສະພາແຫ່ງຊາດລາວ ໄດ້ສະໜັບສະໜູນຢ່າງແຮງກ້າ ໃຫ້ ສ.ກູບາ ເຂົ້າເປັນປະເທດສັງເກດການ ໃນກອງປະຊຸມສະມັດຊາໃຫຍ່ລະຫວ່າງຊາດອາຊຽນ (AIPA) ທີ່ ຜ່ານມາ. ສະພາແຫ່ງຊາດລາວ ຊຸດທີ IX ໄດ້ແຕ່ງຕັ້ງຄະນະມິດຕະພາບລັດຖະສະພາ ລາວ-ສ.ກູບາ ຊຶ່ງເປັນກົນໄກໜຶ່ງໃນການປະກອບ ສ່ວນຊຸກຍູ້ ແລະ ສົ່ງເສີມການພົວພັນຮ່ວມມື ລະຫວ່າງ ສອງສະພາແຫ່ງຊາດ ນໍາເອົາຜົນປະໂຫຍດມາສູ່ ປະເທດຊາດ ແລະ ປະຊາຊົນ ທັງເປັນການປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ, ການຮ່ວມມືເພື່ອການພັດທະນາ ຢູ່ໃນພາກພື້ນ ແລະ ໃນໂລກ.
ໃນການພົບປະຄັ້ງນີ້, ຝ່າຍລາວ ຍັງໄດ້ສະເໜີບາງທິດທາງການພົວພັນຮ່ວມມື ລະຫວ່າງ ສອງອົງການນິຕິບັນຍັດ ໃນຕໍ່ໜ້າ ເປັນຕົ້ນແມ່ນ ສະເໜີໃຫ້ສອງອົງການນິຕິບັນຍັດ ລາວ-ກູບາ ສືບຕໍ່ແລກປ່ຽນຄະນະຜູ້ແທນ ໃນລະດັບປະທານສະພາ, ກຳມາທິການ, ຄະນະເລຂາທິການ, ຄະນະມິດຕະພາບລັດຖະສະພາລາວ-ກູບາ ໄປພ້ອມກັບການຈັດການແລກປ່ຽນຂໍ້ມູນຂ່າວສານ, ບົດຮຽນ ກ່ຽວກັບການຈັດຕັ້ງປະຕິ ບັດພາລະບົດບາດດ້ານນິຕິບັນຍັດ ແລະ ຈັດສໍາມະນາໃນຫົວຂໍ້ຕ່າງໆ ທີ່ສອງຝ່າຍມີຄວາມສົນໃຈ ຕາມເງື່ອນໄຂທີ່ເໝາະສົມ; ສືບຕໍ່ຊຸກຍູ້ໃຫ້ລັດຖະບານ ຂອງສອງປະເທດ ຈັດຕັ້ງປະຕິບັດບັນດາສັນຍາ, ສົນທິ ສັນຍາ, ຂໍ້ຕົກລົງ, ບົດບັນທຶກຄວາມເຂົ້າໃຈ ທີ່ພົວພັນເຖິງການຮ່ວມມືສອງຝ່າຍ ທີ່ໄດ້ຕົກລົງຮ່ວມກັນ ໃຫ້ເປັນຮູບປະທຳ ແລະ ມີປະສິດຜົນດີຂຶ້ນກວ່າເກົ່າ ເປັນຕົ້ນ ໃນຂົງເຂດສາທາລະນະສຸກ, ກະສິກໍາ, ສຶກສາ-ກິລາ ແລະ ຂົງເຂດຕຸລາການ ໃຫ້ແຕກດອກອອກຜົນຍິ່ງຂຶ້ນ ເພື່ອນໍາຜົນປະໂຫຍດມາສູ່ປະຊາຊົນສອງຊາດລາວ-ກູບາ. ໃນປີ 2024 ທີ່ຈະມາເຖິງນີ້, ບົດບັນທຶກວ່າດ້ວຍການຮ່ວມມື ລະຫວ່າງ ສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດ ແຫ່ງ ອຳນາດປະຊາຊົນ ແຫ່ງ ສ. ກູບາ ຈະໝົດອາຍຸການນໍາໃຊ້ ຫວັງວ່າສອງສະພາແຫ່ງຊາດພວກເຮົາ ຈະສືບຕໍ່ປຶກສາຫາລືກັນ ເພື່ອປັບປຸງບັນດາເນື້ອໃນໃຫ້ສອດ ຄ່ອງກັບສະພາບການໃນປັດຈຸບັນ ແລະ ປະສານສົມທົບກັນ ເພື່ອລົງນາມໃນບົດບັນທຶກສະບັບໃໝ່ ໃນໂອກາດທີ່ສອງຝ່າຍຢ້ຽມຢາມ ເຊິ່ງກັນ ແລະ ກັນ.
ນອກນີ້, ສະພາແຫ່ງຊາດ ແຫ່ງ ສປປ ລາວ ກໍຍັງສະເໜີໃຫ້ສືບຕໍ່ສະໜັບສະໜູນ ແລະ ຮ່ວມມືກັນ ໃນການເຄື່ອນໄຫວໃນເວທີລັດຖະສະພາ ພາກພື້ນ ແລະ ສາກົນ ເພື່ອປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາແບບຍືນຍົງໃນພາກພື້ນ ແລະ ສາກົນ. ໃນປີ 2024, ສະພາແຫ່ງຊາດ ແຫ່ງ ສປປ ລາວ ຈະໄດ້ເປັນເຈົ້າພາບຈັດກອງປະຊຸມສະມັດຊາລັດຖະສະພາລະຫວ່າງຊາດອາຊຽນ ຄັ້ງທີ 45 ຫຼື AIPA-45 ຢູ່ ນະຄອນຫຼວງວຽງຈັນ ໃນລະຫວ່າງວັນທີ 18-24 ຕຸລາ 2024 ຊຶ່ງກໍຫວັງເປັນຢ່າງຍິ່ງວ່າ ສະພາແຫ່ງຊາດອຳນາດປະຊາຊົນ ແຫ່ງ ສ.ກູບາ ຈະໃຫ້ການສະໜັບສະໜູນໃນການປະຕິບັດພັນທະສາກົນດັ່ງກ່າວ ຂອງສະພາແຫ່ງຊາດລາວໃຫ້ມີຜົນສໍາເລັດ.
(ຂ່າວ: ສຸດສະຫວັນ, ພາບ: ກິກ)
