ວິທະຍຸກະຈາຍສຽງຫວຽດນາມລາຍງານ ໃນວັນທີ 9 ກັນຍາ ຜ່ານມາ, ສູນຄົ້ນຄວ້າວິທະຍາສາດໜ່ວຍໂລກຂອງ ເຢຍລະມັນ (GFZ) ປະກາດວ່າ: ເຫດແຜ່ນດິນໄຫວມີຄວາມແຮງ 7,0 ຣິດເຕີ ເຮັດໃຫ້ ມາຣົກ ສັ່ນສະເທືອນໃນຕອນຄ່ຳວັນທີ 8 ກັນຍາ ເວລາ 22 ໂມງ 10 ນາທີ (ກົງກັບເວລາ 23 ໂມງ 10 ນາທີ ໃນມາຣົກ).
ກະຊວງພາຍໃນ ມາຣົກ ໃຫ້ຮູ້ວ່າ: ຢ່າງໜ້ອຍສຸດມີ 632 ຄົນ ເສຍຊີວິດ ແລະ 329 ຄົນບາດເຈັບໃນເຫດແຜ່ນດິນໄຫວທີ່ເກີດຂຶ້ນໃນຄັ້ງນີ້. ບັນດາຜູ້ໄດ້ຮັບບາດເຈັບໄດ້ສົ່ງເຖິງໂຮງໝໍເພື່ອປິ່ນປົວແລ້ວ.
ເຫດການແຜ່ນດິນໄຫວໄດ້ເຮັດໃຫ້ຕຶກອາຄານຫຼາຍແຫ່ງສັ່ນສະເທືອນຢູ່ຫຼາຍເມືອງ ແລະ ເຮັດໃຫ້ຫຼາຍຄົນຢ້ານກົວອອກມາຢູ່ກາງຖະໜົນ. ເມືອງ Marrakech ເປັນເມືອງໃຫຍ່ທີ່ຢູ່ໃກ້ສຸດກັບຈຸດໃຈກາງຂອງແຜ່ນດິນໄຫວ ແລະ ອົງການ UNESCO ຮັບຮູ້ເປັນມໍລະດົກວັດທະນະທຳໂລກ, ຕຶກອາຄານຫຼາຍຫຼັງໄດ້ພັງທະລາຍ. ບັນດາຜູ້ເສຍຊີວິດໃນເຫດການນີ້ສ່ວນຫຼາຍແມ່ນອາໄສຢູ່ເຂດພູດອຍ ຍາກທີ່ຈະເຂົ້າເຖິງໄດ້.
