ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ) ຮ່ວມກັບ ຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄກມດ) ແຂວງ ຊຽງຂວາງ ຈັດກອງປະຊຸມ ສ້າງຄວາມເຂັ້ມແຂງໃຫ້ຄະນະກໍາມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ຂັ້ນແຂວງ ໃນວັນທີ 6 ກັນຍາ ຜ່ານມາ ທີ່ແຂວງຊຽງຂວາງ ເປັນປະທານໂດຍ ທ່ານ ສີວິໄລ ແສງຈະເລີນ ຮອງເຈົ້າແຂວງ ປະທານ ຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ ແຂວງຊຽງຂວາງ, ມີບັນດາທ່ານຈາກຄະນະກຳມາທິການເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກຂັ້ນແຂວງ, ເມືອງແປກເຂົ້າຮ່ວມ ແລະ ຜູ້ປະສານງານແຂວງ.
ກອງປະຊຸມຄັ້ງນີ້, ເປັນການສ້າງຄວາມເຂັ້ມແຂງ ພ້ອມທັງຕິດຕາມຊຸກຍູ້, ປັບປຸງການຈັດຕັ້ງ ແລະ ການເຄື່ອນໄຫວຂອງແຂວງ ແລະ ການຈັດຕັ້ງປະຕິບັດວຽກງານຄວາມສະເໝີພາບຍິງ-ຊາຍ ແລະ ສິດທິເດັກ ໃນຂັ້ນແຂວງ, ໂດຍເນັ້ນໃສ່ ເຜີຍແຜ່ ແນະນຳ ການປັບປຸງ ການຈັດຕັ້ງ ແລະ ການເຄື່ອນໄຫວຂອງ ຄຊກມດ, ຄກມດ ແຂວງ ແລະ ເມືອງ ຕາມນິຕິກຳປັບປຸງສະບັບໃໝ່ ປີ 2023, ເຜີຍແຜ່ ແນະນຳ ການຜັນຂະຫຍາຍ ແລະ ຈັດຕັ້ງປະຕິບັດນິຕິກຳສາກົນ ທີ່ ສປປ ລາວ ເປັນພາຄີ ທີ່ຕິດພັນກັບສິດທິແມ່ຍິງ, ຄວາມສະເໝີພາບຍິງ-ຊາຍ ແລະ ສິດທິເດັກ ໃນຂັ້ນແຂວງ, ເຜີຍແຜ່ ແນະນຳກົດໝາຍທີ່ຕິດພັນກັບສິດທິແມ່ຍິງ, ຄວາມສະເໝີພາບຍິງ-ຊາຍ ແລະ ສິດທິເດັກ ໃນຂັ້ນແຂວງ, ເຜີຍແຜ່ ແນະນຳ ການຜັນຂະຫຍາຍ ແລະ ຈັດຕັ້ງປະຕິບັດ ວິໄສທັດ ຮອດປີ 2030, ຍຸດທະສາດ (2026-2025) ແລະ ແຜນດໍາເນີນງານແຫ່ງຊາດ (2021-2025) ທີ່ຕິດພັນກັບສິດທິແມ່ຍິງ, ຄວາມສະເໝີພາບຍິງ-ຊາຍ ແລະ ສິດທິເດັກ ໃນຂັ້ນແຂວງ ໂດຍສະເພາະວຽກ ທີ່ ຄຊກມດ ຮັບຜິດຊອບ, ຮັບຟັງການລາຍງານຂອງແຂວງ ໃນການຈັດຕັ້ງຜັນຂະຫຍາຍ ວິໄສທັດ ຮອດປີ 2030, ຍຸດທະສາດ (2026-2025) ແລະ ແຜນດໍາເນີນງານແຫ່ງຊາດ (2021-2025) ທີ່ຕິດພັນກັບສິດທິແມ່ຍິງ, ຄວາມສະເໝີພາບຍິງ-ຊາຍ ແລະ ສິດທິເດັກ ໃນຂັ້ນແຂວງ ໃນໄລຍະກາງສະໄໝ (2021-2023) ພ້ອມນີ້, ກອງປະຊຸມໄດ້ປຶກສາຫາລືຄົ້ນຄວ້າການຈັດຕັ້ງປະຕິບັດວຽກງານໃນຕໍ່ໜ້າ ຂອງແຂວງຊຽງຂວາງ ແລະ ວຽກງານອື່ນໆ.
ຂ່າວ: ຊຽງຂວາງ
