ສະຖານທູດ ສປປ ເກົາຫລີ ປະຈຳ ສປປ ລາວ ຈັດພິທີສະເຫລີມສະຫລອງວັນ ສະຖາປະນາ ສປປ ເກົາຫລີ ຄົບຮອບ 75 ປີ ໃນວັນທີ 7 ກັນຍາ 2023 ທີ່ນະຄອນຫລວງວຽງຈັນ ໂດຍມີ ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ, ມີບັນດາຫົວໜ້າກົມ, ຮອງກົມ, ພ້ອມດ້ວຍແຂກຖືກເຊີນ ເຂົ້າຮ່ວມ.
ໂອກາດດັ່ງກ່າວ, ທ່ານ ລີ ຢົງ ຊົນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ເກົາຫລີ ປະຈຳ ລາວ ໄດ້ກ່າວວ່າ: ການສະຖາປະນາ ຂອງ ສປປ ເກົາຫລີ ແມ່ນເຫດການປະຫວັດສາດອັນຍິ່ງໃຫຍ່ ເຊິ່ງເປັນຄວາມມຸ່ງມາດປາຖະໜາອັນຍາວນານ ຂອງປະຊາຊົນພວກເຮົາທີ່ຫວັງເອົາລັດທີ່ແທ້ຈິງ ເພື່ອຮັບໃຊ້ປະຊາຊົນ. ຕະຫລອດໄລຍະ 75 ປີທີ່ຜ່ານມານັບແຕ່ສະຖາປະນາ ສປປ ເກົາຫລີ ໄດ້ມີບາດກ້າວໃໝ່ຢ່າງຕໍ່ເນື່ອງ ບົນເສັ້ນທາງແຫ່ງການສ້າງສາປະເທດສັງຄົມນິຍົມທີ່ເຂັ້ມແຂງ, ຈະເລີນຮຸ່ງເຮືອງ ພາຍໃຕ້ການຊີ້ນຳໆພາຂອງ ສະຫາຍ ກິມ ອິນ ຊຸງ, ສະຫາຍ ກິມ ເຈິງ ອິນ ຜູ້ນຳທີ່ຍິ່ງໃຫ່ຍ ແລະ ສະຫາຍ ກິມ ເຈິງ ອຸນ ທີ່ເຄົາລົບຮັກ ຂອງປະຊາຊົນ ສປປ ເກົາຫລີ.
ສະຫາຍ ກິມ ອິນ ຊຸງ ແລະ ສະຫາຍ ກິມ ເຈິງ ອິນ ໄດ້ຫັນປ່ຽນ ສປປ ເກົາຫລີ ໃຫ້ກາຍເປັນປະເທດສັງຄົມນິຍົມ ທີ່ບໍ່ມີສັດຕູໂຕໃດສາມາດເອົາຊະນະໄດ້ ໂດຍອີງໃສ່ຮາກຖານທາງການເມືອງ, ເສດຖະກິດ ແລະ ການທະຫານທີ່ເຂັ້ມແຂງ ໂດຍໄດ້ປະຕິບັດຄວາມເປັນເອກະພາບ ທາງດ້ານແນວຄິດການເມືອງຂອງມວນຊົນຜູ້ອອກ ແຮງງານ ແລະ ເຕົ້າໂຮມພວກເຂົາອ້ອມຂ້າງພັກແຮງງານເກົາຫລີ ແລະ ໄດ້ສ້າງສາປະເທດສັງຄົມນິຍົມ ທີ່ມີສີສັນ ທີ່ມີປະຊາຊົນເປັນໃຈກາງ ໂດຍສະເພາະປະຊາຊົນໄດ້ເປັນເຈົ້າຂອງປະເທດຊາດ, ທຸກສິ່ງທຸກຢ່າງເພື່ອຮັບໃຊ້ປະຊາຊົນ ແລະ ສັງຄົມໄດ້ຮັບການພັດທະນາ ໂດຍອີງໃສ່ຫົວຄິດປະດິດສ້າງຂອງປະຊາຊົນ.
ທ່ານ ລີ ຢົງ ຊົນ ໄດ້ກ່າວອີກວ່າ: ຕະຫລອດໄລຍະຜ່ານມາ, ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີ ແລະ ການຮ່ວມມືອັນດີງາມລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ສປປ ເກົາຫລີ-ສປປ ລາວ ໄດ້ຮັບການຂະຫຍາຍຕົວຢ່າງຕໍ່ເນື່ອງ ບົນພື້ນຖານແຫ່ງການພັດທະນາສາຍພົວພັນໂດຍ ບັນດາຜູ້ນໍາສອງປະເທດໃນເມື່ອກ່ອນ. ປັດຈຸບັນ ສາຍພົວພັນມິດຕະພາບອັນເປັນມູນເຊື້ອ ລະຫວ່າງ ສປປ ເກົາຫລີ ແລະ ສປປ ລາວ ໄດ້ຮັບການສືບທອດຢ່າງບໍ່ຢຸດຢັ້ງ ໂດຍສະຫາຍ ກິມ ເຈິງ ອຸນ ເລຂາທິການໃຫ່ຍ ພັກແຮງງານເກົາຫລີ, ປະທານກິດຈະການແຫ່ງລັດ ແຫ່ງ ສປປ ເກົາຫລີ ແລະ ສະຫາຍ ທອງລຸນ ສີສຸລິດເລຂາທິການໃຫຍ່ ຄະນະບໍລິຫານງານ ສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ.
ຂ່າວ: ທະນູທອງ
ພາບ: ເກດສະໜາ
