ເມື່ອບໍ່ດົນມານີ້, ຄະນະຜູ້ແທນ ສປປ ລາວ ນໍາໂດຍ ທ່ານ ສັນຕິພາບ ພົມວິຫານລັດຖະມົນຕີກະຊວງການເງິນ, ພ້ອມດ້ວຍຄະນະຜູ້ແທນຈາກກົມກ່ຽວຂ້ອງຂອງກະຊວງການເງິນ ເຂົ້າຮ່ວມກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງອາຊຽນ (ASEAN) ຄັ້ງທີ 10 ແລະ ກອງປະຊຸມປິ່ນອ້ອມ ຈັດຂຶ້ນທີ່ນະຄອນຫລວງ ຈາກາຕາ ປະເທດອິນໂດເນເຊຍ ໂດຍມີ 10 ປະເທດອາຊຽນ ແລະ ຕີມໍລາສະເຕ ໃນນາມເປັນປະເທດຜູ້ສັງເກດການ ເຂົ້າຮ່ວມ. ກອງປະຊຸມ AFMGM ຄັ້ງທີ 10 ເພື່ອສືບຕໍ່ປຶກສາຫາລື ແລະ ແລກປ່ຽນກ່ຽວກັບນະໂຍ ບາຍເສດຖະກິດມະຫາພາກຂອງພາກພື້ນອາຊຽນ, ຄວາມຄືບໜ້າການຈັດຕັ້ງປະຕິບັດວຽກງານການຮ່ວມມື ແລະ ການເຊື່ອມໂຍງດ້ານການເງິນ-ເງິນຕາ ກໍຄື ການຈັດຕັ້ງປະຕິບັດວຽກງານບູລິມະສິດປີ 2023 (PED) ໃນໄລຍະການເປັນເຈົ້າພາບຂອງອິນໂດເນເຊຍ ເຊິ່ງສາມາດສັງລວມເນື້ອໃນ ແລະ ຜົນຂອງກອງປະຊຸມໄດ້ຄື: ລັດຖະມົນຕີການເງິນ ແລະ ທະນາຄານກາງອາຊຽນ ໄດແລກ ປ່ຽນ ແລະ ປຶກສາຫາລືກ່ຽວກັບສະພາບເສດຖະກິດມະຫາພາກ ຂອງພາກພື້ນ ແລະ ສາກົນ, ກອງປະຊຸມເຫັນໄດ້ເຖິງຄວາມສຳຄັນຂອງຜົນກະທົບຈາກພາຍນອກ ຕໍ່ເສດຖະກິດຂອງພາກພື້ນອາຊຽນເປັນຕົ້ນ ສະພາບການເມືອງຂອງໂລກທີ່ຍັງບໍ່ມີຄວາມແນ່ນອນ, ການໜັງຕີງຂອງລາຄາສິນຄ້າ-ລາຄານໍ້າມັນເຊື້ອໄຟ, ການເພີ່ມອັດຕາດອກເບ້ຍສະຫະລັດອາເມລິກາ ແລະ ອັດຕາເງິນເຟີ້. ໃນນັ້ນ, ອົົງການຕິດຕາມເສດຖະກິດມະຫາພາກ ອາຊຽນ+3 ໄດ້ຄາດຄະເນການເຕີບໂຕຂອງອາຊຽນ ໃນປີ 2023 ຢູ່ໃນລະດັບ 4.4%, ສ່ວນອັດຕາເງິນເຟີຢູ່ໃນລະດັບ 7.9%.
ກອງປະຊຸມ ໄດ້ຮັບຮອງຄວາມຄືບໜ້າຂອງການຈັດຕັ້ງປະຕິບັດຂອງ ບັນດາຄະນະເຮັດວຽກຕາມແຜນແມ່ບົດອາຊຽນ 2025, ແຜນການຈັດຕັ້ງປະຕິບັດວຽກງານການເງິນ-ເງິນຕາອາຊຽນ ປີ 2023-2024, ການຫັນກອງທຶນໂຄງລ່າງພື້ນຖານ ເປັນກອງທຶນພັດທະນາໂຄງລ່າງອາຊຽນສີຂຽວ ແລະ ການຫັນສູ່ລະບົບການພັດທະນາການເງິນທີ່ຍືນຍົງ; ໄດ້ຮັບຮອງຖະແຫລງການຮ່ວມກອງປະຊຸມ AFMGM ຄັ້ງທີ 10 ເຊິ່ງມີເນື້ອໃນສຳຄັນກ່ຽວກັບສະພາບເສດຖະກິດມະຫາພາກ ທີ່ຍັງຫຍຸ້ງຍາກ ແລະ ມີສິ່ງທ້າທາຍຫລາຍອັນທີ່ປະເທດອາຊຽນ ຕ້ອງໄດ້ຄຳນຶງເຖິງ ແລະ ກຽມພ້ອມຮັບມື; ການນຳໃຊ້ນະໂຍບາຍແບບປະສົມ ການແກ້ໄຂສະພາບໃນປັດຈຸບັນ, ພ້ອມທັງເນັ້ນຄວາມສຳຄັນຂອງການຮ່ວມມືລະຫວ່າງ ຂະແໜງການເງິນ ແລະ ຂະແໜງການອື່ນໆ ເຊັ່ນ: ສາທາລະນະສຸກ, ການຄໍ້າປະກັນສະບຽງອາຫານ ແລະ ການຮັບມືປ້ອງກັນໄພພິບັດທຳມະຊາດ, ເສີມຂະຫາຍການຮ່ວມມື ແລະ ເຊື່ອມໂຍງດ້ານການເງິນອອກສູ່ພາກພື້ນ ແລະ ສາກົນ, ການອໍານວຍຄວາມສະດວກດ້ານການຄ້າ ແລະ ການລົງທຶນ, ການເຊື່ອມໂຍງດ້ານການບໍລິການ ແລະ ການຊໍາລະສະສາງດ້ານການເງິນ, ການສືບຕໍ່ສະໜັບສະໜູນການພັດທະນາໂຄງລ່າງພື້ນຖານ, ການສ້າງວຽກງານການເງິນໃຫ້ຄວາມຍືນຍົງ ແລະ ຄວບຄຸມໃຫ້ທົ່ວເຖິງ ແລະ ການສືບຕໍ່ສ້າງຄວາມເຂັ້ມແຂງໃຫ້ການດຳເນີນວຽກງານການຮ່ວມມືດ້ານການເງິນອາຊຽນ ໃຫ້ມີການຫັນປ່ຽນ ແລະ ການປະຕິບັດຂໍ້ລິເລີ່ມໃໝ່.
ໃນກອງປະຊຸມ, ທ່ານ ສັນຕິພາບ ພົມວິຫານ ໄດ້ມີຄໍາເຫັນ ແລະ ແຈ້ງຕໍ່ກອງປະຊຸມກ່ຽວກັບ ຄວາມພ້ອມການຮັບເປັນເຈົ້າພາບ ແລະ ປະທານກອງປະຊຸມການຮ່ວມມືດ້ານການເງິນອາຊຽນ ໃນປີ 2024 ໂດຍວຽກງານບຸລິມະສິດປີໜ້າ ຈະເນັ້ນໃສ່ການສົ່ງເສີມການເຊື່ອມໂຍງອາຊຽນ, ສົ່ງເສີມການຄ້າ ແລະ ຕ່ອງໂສ້ການສະໜອງສິນຄ້າ, ການພັດທະນາການເງິນຍືນຍົງ ແລະ ການເສີມສ້າງດ້ານເສດຖະກິດມະຫາພາກ-ການເງິນໃຫ້ມີຄວາມທົນທານ ແລະ ຫັນເປັນດີຈີຕອນ,ລວມທັງການປະຕິບັດຄຳໝັ້ນສັນຍາການຮ່ວມມືດ້ານການເງິນ, ເພື່ອສ້າງປະຊາຄົມເສດຖະກິດອາຊຽນໃຫ້ມີການພັດທະນາທີ່ຍືນຍົງໃນອະນາຄົດ.
ໂອກາດນີ້, ຄະນະຜູ້ແທນກອງປະຊຸມ ຍັງໄດ້ເຂົ້າຮ່ວມກອງປະຊຸມປິ່ນອ້ອນຈຳນວນໜຶ່ງ ຄື:ກອງປະຊຸມຮ່ວມລັດຖະມົນຕີການເງິນ ແລະ ລັດຖະມົນຕີສາທາລະນະສຸກ ຄັ້ງທີ 1, ກອງປະຊຸມສຳມະນາລະດັບສູງກ່ຽວກັບ ການສົ່ງເສີມການພັດທະນາໂຄງລ່າງພື້ນຖານແບບຍືນຍົງ, ກອງປະຊຸມຮອງລັດຖະມົນຕີການເງິນ ແລະ ຮອງຜູ້ວ່າທະນາຄານກາງອາຊຽນ, ກອງປະຊຸມຮ່ວມຮອງລັດຖະ ມົນຕີການເງິນ ແລະ ຜູ້ວ່າທະນາຄານກາງອາຊຽນ ແລະ ຮອງລັດຖະມົນຕີກະຊວງການເງິນອົດສະຕຣາລີ, ເວທີສົນທະນາດ້ານຄັງເງິນອາຊຽນ ເປັນຄັ້ງທີ 1 ທີ່ເປີດໂອກາດໃຫ້ຜູ້ແທນຈາກຄັງເງິນປະເທດສາມາຊິກອາຊຽນ ເພື່ອມາແລກປ່ຽນບົດຮຽນ ແລະ ນະໂຍບາຍກ່ຽວກັບວຽກງານການຄຸ້ມຄອງການເງິນພາກລັດ ແລະ ທິດທາງການຮ່ວມມືຂອງຄັງເງິນອາຊຽນໃນຕໍ່ໜ້າ.
ນອກນັ້ນ, ທ່ານລັດຖະມົນຕີກະຊວງການເງິນ ພ້ອມຄະນະ ຍັງໄດ້ມີການພົບປະສອງຝ່າຍຮ່ວມກັບທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນສິງກະໂປ, ລັດຖະມົນຕີກະຊວງການເງິນອິນໂດເນຊຍ, ປະທານທະນາຄານພັດທະນາອາຊີ ແລະ ຮອງເລຂາທິການໃຫຍ່ກອງເລຂາອາຊຽນ ເພື່ອປຶກສາຫາລືຂອບການຮ່ວມມືໃນອະນາຄົດ ແລະ ການຊ່ວຍເຫລືອດ້ານວິຊາການ ໃນການກະກຽມໃຫ້ແກ່ການເປັນເຈົ້າພາບ ແລະ ປະທານອາຊຽນຂອງ ສປປ ລາວ ໃນປີ 2024.
ຂ່າວ-ພາບ: ກະຊວງການເງິນ
