ບົດລາຍງານສະພາບອັດຕາເງິນເຟີ້ ປະຈໍາເດືອນສິງຫາ 2023 ຂອງສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ລະບຸວ່າ: ໃນເດືອນສິງຫາ 2023 ທ່າອ່ຽງລາຄາສິນຄ້າຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ, ແຕ່ເປັນການເພີ່ມຂຶ້ນໃນຈັງຫວະທີ່ຊ້າລົງ. ດັດຊະນີລາຄາສິນຄ້າໂດຍລວມຂອງເດືອນສິງຫາ 2023 ຢູ່ໃນລະດັບ 195,10 ຊຶ່ງເພີ່ມຂຶ້ນຈາກ 154,99 ໃນເດືອນສິງຫາ 2022 ເຮັດໃຫ້ອັດຕາເງິນເຟີ້ລວມຂອງ ສປປ ລາວ ໃນເດືອນສິງຫານີ້ ຢູ່ໃນລະດັບ 25,9% (ເດືອນກໍລະກົດ ຢູ່ໃນລະດັບ 27,8%).
ເມື່ອທຽບລາຄາສິນຄ້າ ແລະ ບໍລິການ ເດືອນສິງຫາ 2023 ທຽບກັບເດືອນກໍລະກົດ 2023 ເຫັນວ່າຍັງສືບຕໍ່ເພີ່ມຂຶ້ນ ຊຶ່ງເພີ່ມຂຶ້ນ 2,6%, ໝວດຮ້ານອາຫານ ແລະ ໂຮງແຮມ ເພີ່ມຂຶ້ນ 3,7%, ໝວດສະບຽງອາຫານ ແລະ ເຄື່ອງດື່ມບໍ່ແມ່ນທາດເຫຼົ້າ ເພີ່ມຂຶ້ນ 3,0%, ໝວດຮັກສາສຸຂະພາບ ແລະ ຢາ ເພີ່ມຂຶ້ນ 2,7%, ໝວດຄົມມະນາຄົມ ແລະ ການຂົນສົ່ງ ເພີ່ມຂຶ້ນ 2,3% ພົ້ນເດັ່ນໂດຍສະເລ່ຍແລ້ວ ນໍ້າມັນແອັດຊັງທໍາມະດາ ເພີ່ມຂຶ້ນຈາກ 21.215 ກີບ/ລິດ ມາເປັນ 22.740 ກີບ/ລິດ, ນ້ໍາມັນກະຊວນ ເພີ່ມຂຶ້ນຈາກ 18.446 ກີບ/ລິດ ມາເປັນ 20.387 ກີບ/ລິດ, ໝວດເຄື່ອງນຸ່ງຫົ່ມ ແລະ ເກີບ ເພີ່ມຂຶ້ນ 2,3%, ພ້ອມກັນນັ້ນ, ຫຼາຍລາຍການສິນຄ້າ ກໍເຫັນວ່າໄດ້ມີການປັບຕົວເພີ່ມຂຶ້ນ ເປັນຕົ້ນແມ່ນສິນຄ້າປະເພດອາຫານສົດ, ເຄື່ອງກໍ່ສ້າງ ແລະ ຫົວອາຫານສັດ.
ການເພີ່ມຂຶ້ນຂອງລາຄາສິນຄ້າໃນເດືອນນີ້, ປັດໄຈຕົ້ນຕໍຍັງແມ່ນມາຈາກ ຖານການຜະລິດພາຍໃນບໍ່ເຂັ້ມແຂງທີ່ຕ້ອງໄດ້ອາໄສການນໍາເຂົ້າ ແລະ ພ້ອມກັນນັ້ນການຜະລິດຢູ່ພາຍໃນ ເປັນຕົ້ນແມ່ນສິນຄ້າກະສິກໍາຍັງໄປຕາມລະດູການ ຊຶ່ງໃນເດືອນນີ້ສິນຄ້າກະສິກໍາໄດ້ປັບຂຶ້ນຫຼາຍເມື່ອທຽບເດືອນດຽວກັນຂອງປີຜ່ານໆມາ, ການຂາດແຄນເງິນຕາ ເພື່ອແຊກແຊງອັດຕາແລກປ່ຽນ ເຮັດໃຫ້ເງິນກີບອ່ອນຄ່າເມື່ອທຽບກັບສະກຸນເງິນຂອງປະເທດຄູ່ຄ້າ ໃນນັ້ນເມື່ອທຽບເດືອນກໍລະກົດຜ່ານມາ ເງິນກີບອ່ອນຄ່າ 1,6% ແລະ 2,4% ເມື່ອທຽບກັບເງິນໂດລາ ແລະ ເງິນບາດ ຕາມລໍາດັບ, ພ້ອມນັ້ນ, ເງິນໂດລາເອງ ກໍມີທ່າອ່ຽງແຂງຄ່າຂຶ້ນເຫັນໄດ້ຈາກດັດຊະນີເງິນໂດລາ ເພີ່ມຂຶ້ນຈາກ 119 ໃນຕົ້ນເດືອນສິງຫາມາເປັນ 121 ໃນປັດຈຸບັນ, ນອກຈາກນີ້, ກໍມີການເພີ່ມຂຶ້ນລາຄາສິນຄ້ານໍາເຂົ້າ ເປັນຕົ້ນແມ່ນລາຄານ້ໍາມັນຢູ່ຕະຫຼາດສາກົນ ສະເລ່ຍໄລຍະດຽວກັນຂອງເດືອນສິງຫາ ທຽບກັບເດືອນກໍລະກົດ ຜ່ານມາເພີ່ມຂຶ້ນ 10%. ພ້ອມດຽວກັນນັ້ນ,ການຈັດຕັ້ງປະຕິບັດນະໂຍບາຍການຄຸ້ມຄອງລາຄາສິນຄ້າ ຍັງບໍ່ທັນໄດ້ດີ, ສະແດງອອກຈາກການເພີ່ມຂຶ້ນຂອງລາຄາສິນຄ້າຄວບຄຸມ.
(ຂ່າວ: ສຸກສະຫວັນ)
