ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ພ້ອມຄະນະ, ໄດ້ຕ້ອນຮັບການເຂົ້າຢ້ຽມອໍາລາຂອງ ທ່ານ ປີເຕີ ເຮມອນ (Peter M. Haymond) ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສະຫະລັດ ອາເມຣິກາ ປະຈໍາ ສປປ ລາວ, ໃນວັນທີ 29 ສິງຫາ ນີ້ ທີ່ກະຊວງ ຮສສ ໃນໂອກາດທີ່ທ່ານທູດສໍາເລັດການປະຕິບັດໜ້າທີ່ການທູດຢູ່ ສປປ ລາວ.
ໃນໂອກາດນີ້, ທ່ານນາງ ໃບຄຳ ຂັດທິຍະ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດໃນການປະຕິບັດໜ້າທີ່ການທູດ ຢູ່ ສປປ ລາວ ຕະຫຼອດໄລຍະເວລາທີ່ຜ່ານມາ, ໂດຍໄດ້ປະກອບສ່ວນເຂົ້າໃນວຽກງານສົ່ງເສີມພັດທະນາເສດຖະກິດ -ສັງຄົມ ແລະ ຊຸກຍູ້ການພົວພັນຮ່ວມມືໃນຫຼາຍດ້ານ ລະຫວ່າງ ສປປ ລາວ ແລະ ສະຫະລັດ ອາເມຣິກາ ເວົ້າລວມ, ເວົ້າສະເພາະ ກໍແມ່ນການຮ່ວມມື ຂອງ ສ ອາເມຣິກາ ໃນຂະແໜງ ຮສສ. ໂດສະເພາະແມ່ນການຮວ່ມມືຊວ່ຍເຫຼືອງົບປະມານ, ວິຊາການ ວຽກທຳລາຍ ແລະ ກວດກູລະເບີດທີ່ຍັງບໍ່ທັນແຕກຕົກຄ້າງຢູ່ ສປປ ລາວ, ວຽກຊ່ວຍເຫຼືອຜູ້ພິການຈາກລະເບີດບໍ່ທັນແຕກ ແລະ ພິການຈາກອຸບັດເຫດອື່ນໆ, ພ້ອມທັງຊ່ວຍເຫຼືອປົກປ້ອງສິດທິມະນຸດ ແລະ ວຽກຕ້ານກຽມພ້ອມຕອບໂຕໄພພິບັດທາງທຳມະຊາດອື່ນໆອີກຫຼາຍດ້ານ. ພ້ອມທັງຫວັງຢ່າງຍິ່ງວ່າ ລັດຖະບານສະຫະລັດອາເມຣິກາ ຈະສືບຕໍ່ການຮ່ວມມື ສະໜັບສະໜູນຊ່ວຍເຫຼືອ ສປປ ລາວ, ໂດຍສະເພາະຂະແໜງ ຮສສ ໃຫ້ຫຼາຍຍິ່ງຂຶ້ນ.
ໃນໂອກາດດຽວກັນນີ້, ທ່ານເອກອັກຄະລັດຖະທູດ ກໍໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີ ພ້ອມຄະນະ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້ ແລະ ສະແດງຄວາມຂອບໃຈ ຕໍ່ລັດຖະບານ ສປປ ລາວ ກໍຄືພາກສ່ວນກ່ຽວຂ້ອງ ທີ່ໄດ້ໃຫ້ການສະໜັບສະໜູນ ແລະ ການຮ່ວມມື ໃນໄລຍະການປະຕິບັດໜ້າທີ່ການທູດຂອງຕົນ ຢູ່ ສປປ ລາວ ໄດ້ຮັບຜົນສໍາເລັດເປັນຢ່າງດີ.
(ຂ່າວ-ພາບ ຮສສ)
