ວິທະຍຸກະຈາຍສຽງຫວຽດນາມລາຍງານວ່າ: ກອງປະຊຸມພາກພື້ນກ່ຽວກັບການຕ້ານການອົບພະຍົບແບບຜິດປົກກະຕິ ໄດ້ເປີດຂຶ້ນໃນວັນທີ 28 ສິງຫາ ຜ່ານມາ ຢູ່ເອຢິບ ໂດຍການເຂົ້າຮ່ວມຂອງ 27 ປະເທດ ທີ່ມາຈາກເອີຣົບ, ອາຟຣິກາ ແລະ ອາເມຣິກາເໜືອ ກໍຄືບັນດາອົງການຈັດຕັ້ງສາກົນທີ່ກ່ຽວຂ້ອງ.
ຂ່າວລະບຸວ່າ: ກອງປະຊຸມດຳເນີນເປັນເວລາ 3 ວັນ, ໂດຍຄະນະກຳມະການປະສານງານແຫ່ງຊາດ ກ່ຽວກັບການຕ້ານ ແລະ ສະກັດກັ້ນການອົບພະຍົບແບບຜິດກົດໝາຍ ແລະ ການຄ້າມະນຸດ (NCCPIM&TIP) ຈັດຕັ້ງຂຶ້ນ. ນີ້ແມ່ນສ່ວນໜຶ່ງໃນຍຸດທະສາດແຫ່ງຊາດ ຂອງ ເອຢິບ ເພື່ອແນໃສ່ຕ້ານສະພາບການອົບພະຍົບແບບຜິດກົດໝາຍ, ປົກປ້ອງຊາວອົບພະຍົບ, ພິເສດແມ່ນເດັກນ້ອຍ ທີ່ບໍ່ມີຄົນໄປນຳ.
ປັດຈຸບັນ ເອຢິບ ໄດ້ຮັບເອົາຊາວອົບພະຍົບປະມານ 9 ລ້ານຄົນ. ເອຢິບ ໄດ້ຢັ້ງຢືນຫຼາຍຄັ້ງວ່າຈະພະຍາຍາມຈົນສຸດຄວາມສາມາດຂອງຕົນ ເພື່ອບໍ່ໃຫ້ກາຍເປັນສະຖານທີ່ສົ່ງຕໍ່ສຳລັບຊາວອົບພະຍົບແບບຜິດກົດໝາຍ ທີ່ຊອກຫາເສັ້ນທາງໄປຍັງເອີຣົບ. ໃນຄວາມພະຍາຍາມຮ່ວມມືກັບ ເອຢິບ ເພື່ອແນໃສ່ຫຼຸດຜ່ອນສະພາບການອົບພະຍົບແບບຜິດປົກກະຕິ, ສະຫະພາບ ເອີຣົບ (EU) ໄດ້ອຸປະຖຳ ເງິນຈຳນວນ 80 ລ້ານເອີໂຣ ໃຫ້ແກ່ ເອຢິບ ໃນເດືອນມິຖຸນາ ປີ 2023 ເພື່ອຄວບຄຸມເສັ້ນຊາຍແດນ, ຊອກຫາການກູ້ໄພກູ້ຊີບ ແລະ ເພີ່ມທະວີບັນດາການເຄື່ອນໄຫວຕ້ານການຄ້າມະນຸດ.
