ໃນລະຫວ່າງວັນທີ 28 ຫາ 31 ສິງຫາ 2023, ຄະນະຜູ້ແທນອົງການກວດສອບແຫ່ງລັດ ສປປ ລາວ ຊຶ່ງນໍາໂດຍ ທ່ານ ວຽງທະວີສອນ ເທບພະຈັນ ປະທານອົງການກວດສອບແຫ່ງລັດ ສປປ ລາວ ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊຸມ 3 ຝ່າຍ ຄັ້ງທີ 10 ລະຫວ່າງ ອົງການກວດສອບແຫ່ງລັດ ກໍາປູເຈຍ-ລາວ-ຫວຽດນາມ ທີ່ ນະຄອນດານັງ ສສ ຫວຽດນາມ ໂດຍການເປັນປະທານກອງປະຊຸມຂອງ ທ່ານ ໂຫງ່ ຫວັນ ຕັວນ ປະທານອົງການກວດສອບແຫ່ງລັດ ສສ ຫວຽດນາມ ກອງປະຊຸມຄັ້ງນີ້, ມີຜູ້ແທນຈາກ 3 ຝ່າຍ ເຂົ້າຮ່ວມຢ່າງພ້ອມພຽງ.
ກອງປະຊຸມຮ່ວມມື 3 ຝ່າຍໃນຄັ້ງນີ້ ນອກຈາກໄດ້ລາຍງານຄວາມຄືບໜ້າ “ການກວດສອບການເກັບລາຍຮັບ ໂດຍຜ່ານລະບົບເຄື່ອງມືທັນສະໄໝ ເອເລັກໂຕຣນິກ” ແລ້ວກອງປະຊຸມຍັງສະເໜີແລກປ່ຽນບົດຮຽນກວດສອບຂອງ 3 ອົງການກວດສອບແຫ່ງລັດ ໃນຫົວຂໍ້: “ການຈັດຕັ້ງປະຕິບັດຄຳແນະນຳຜົນການກວດສອບ ແລະ ການຈັດຕັ້ງປະຕິບັດວຽກງານກວດສອບໃນຮູບແບບໃໝ່” ຊຶ່ງອົງການກວດສອບແຫ່ງລັດ ທັງສາມປະເທດໄດ້ລາຍງານຜົນການກະກຽມຄວາມພ້ອມ ຕໍ່ກັບການຫັນເປັນທັນສະໄໝ ໃນຍຸກດີຈີຕອນ. ຈາກນັ້ນ, ກອງປະຊຸມ ຍັງໄດ້ປຶກສາຫາລື ແລະ ແລກປ່ຽນບົດຮຽນວຽກງານກວດສອບໃນ ສາມຫົວຂໍ້ ຄື: (1). ການກວດສອບການເກັບລາຍຮັບ ໂດຍຜ່ານລະບົບເຄື່ອງມືທັນສະໄໝ ເອເລັກໂຕຣນິກ; (2). ການຈັດຕັ້ງປະຕິບັດຄໍາແນະນໍາຜົນການກວດສອບ ແລະ (3). ການຈັດຕັ້ງປະຕິບັດວຽກງານກວດສອບໃນຮູບແບບປົກກະຕິໃໝ່. ເຫັນໄດ້ວ່າບັນດາຄະນະຜູ້ແທນທັງສາມປະເທດໄດ້ມີການນຳສະເໜີ ແລະ ແລກປ່ຽນບົດຮຽນ, ປະສົບປະການໃນວຽກງານດັ່ງກ່າວຢ່າງກົງໄປກົງມາ ຊຶ່ງການນຳໃຊ້ເຕັກໂນໂລຊີ ແລະ ນະວັດຕະກຳໃໝ່ເຂົ້າໃນການກວດສອບໃນຍຸກປັດຈຸບັນແມ່ນມີຄວາມສຳຄັນ ແລະ ສອດຄ່ອງກັບແຜນຍຸດທະສາດ ການພັດທະນາ ຂອງອົງການກວດສອບແຫ່ງລັດ ສາມປະເທດ; ແມ່ນຄວາມຮຽກຮ້ອງຕ້ອງການຕົວຈິງໃນການພັດທະນາ ແລະ ຍົກລະດັບຄຸນນະພາບການກວດສອບໃຫ້ທຽບກັບມາດຕະຖານການກວດສອບພາກພື້ນ ແລະ ສາກົນ.
ຜ່ານການດຳເນີນກອງປະຊຸມຮ່ວມມື 3 ຝ່າຍຂອງ 3 ອົງການກວດສອບແຫ່ງລັດຄັ້ງນີ້ໄດ້ຕີລາຄາສູງ ຕໍ່ສາຍພົວພັນມິດຕະພາບການຮ່ວມມື ອັນເປັນມູນເຊື້ອ ລະຫວ່າງ ອົງການກວດສອບແຫ່ງລັດ ທັງ 3 ປະເທດ ກໍຄືຜົນສຳເລັດຫຼາຍດ້ານ ຂອງການພົວພັນຮ່ວມມື 3 ຝ່າຍ ກຳປູເຈຍ-ລາວ-ຫວຽດນາມ ໂດຍສະເພາະແມ່ນການແລກປ່ຽນຄະນະຜູ້ແທນຂັ້ນສູງ, ຂັ້ນວິຊາການ ເພື່ອຍົກສູງປະສິດທິຜົນແຫ່ງການຮ່ວມມື ໃນຂົງເຂດວຽກງານກວດສອບແຫ່ງລັດ ໃຫ້ມີຄວາມເຂັ້ມແຂງ, ມີປະສິດທິພາບ ແລະ ປະສິດທິຜົນ ແລະ ກວດສອບໄປຕາມມາດຕະຖານການກວດສອບສາກົນ ເທື່ອລະກ້າວ.
ໃນໂອກາດດັ່ງກ່າວ, ທ່ານ ວຽງທະວີສອນ ເທບພະຈັນ ໄດ້ສະແດງຄວາມຍິນດີ ແລະ ຮູ້ສຶກເປັນກຽດຢ່າງຍິ່ງ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສສ ຫວຽດນາມ ໃນຖານະປະທານອົງການກວດສອບແຫ່ງລັດ ສປປ ລາວ ແລະ ໄດ້ພົບປະກັບ ທ່ານ ໂຫງ່ ຫວັນ ຕັວນ ປະທານອົງການກວດສອບແຫ່ງລັດ ສສ ຫວຽດນາມ ແລະ ທ່ານ ນາງ ຊົມ ຄິມ ຊົວ ປະທານ ອົງການກວດສອບແຫ່ງຊາດ ຣາຊະອານາຈັກ ກຳປູເຈຍ ຊຶ່ງໃນກອງປະຊຸມ 3 ຝ່າຍຄັ້ງນີ້ ແລະ ຂໍສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຂອງ ອົງການກວດສອບແຫ່ງລັດ ສສ ຫວຽດນາມ ທັງໝົດນັ້ນໄດ້ສະແດງໃຫ້ເຫັນເຖິງໄມຕີຈິດມິດຕະພາບ ແລະ ໃຫ້ຄວາມເອົາໃຈໃສ່ໃນການເສີມຂະຫຍາຍສາຍພົວພັນການຮ່ວມມືລະຫວ່າງ 3 ປະເທດ ກຳປູເຈຍ-ລາວ-ຫວຽດນາມ. ພ້ອມນັ້ນ ທ່ານຍັງໄດ້ສະແດງຄວາມຊົມເຊີຍຕໍ່ຜົນສຳເລັດທີ່ຍາດມາໄດ້ໃນໄລຍະຜ່ານມາ ຊຶ່ງແມ່ນໝາກຜົນແຫ່ງຄວາມພະຍາຍາມ, ຄວາມຈິງໃຈ ແລະ ຄວາມສະໜິດສະໜົມ ຖານບ້ານໃກ້ເຮືອນຄຽງ ແລະ ເພື່ອນສະຫາຍ ທີ່ມີມູນເຊື້ອມາຍາວນານ ແລະ ຈະສືບຕໍ່ຮັດແໜ້ນ, ເພີ່ມທະວີຄວາມສາມັກຄີ ແລະ ສາຍພົວພັນມິດຕະພາບການຮ່ວມມື ອັນເປັນມູນເຊື້ອ ລະຫວ່າງ ປະຊາຊົນຂອງ 3 ປະເທດ ກໍຄື ອົງການກວດສອບແຫ່ງລັດ ທັງສາມປະເທດ ກໍາປູເຈຍ-ລາວ-ຫວຽດນາມ ໃຫ້ນັບມື້ນັບໄດ້ຮັບການເສີມຂະຫຍາຍເຂົ້າສູ່ລວງເລິກ ຢ່າງມີປະສິດທິຜົນ, ນຳເອົາຜົນປະໂຫຍດຕົວຈິງມາສູ່ ສາມອົງການກວດສອບແຫ່ງລັດ ທັງສາມປະເທດ.
ຂ່າວ: ກວດສອບແຫ່ງລັດ
