ກະຊວງການເງິນ ໄດ້ຈັດພິທີເປີດປ່ອງບໍລິການສອບຖາມຂໍ້ມູນ ໃຫ້ຄໍາປຶກສາກ່ຽວກັບວຽກງານ ສ່ວຍສາອາກອນ ສາຍດ່ວນ Call center 1466 ເພື່ອແຈ້ງໃຫ້ບຸກຄົນ, ນິຕິບຸກຄົນ ແລະ ອົງການຈັດຕັ້ງຮັບຮູ້ ແລະ ນຳໃຊ້ຊ່ອງທາງດັ່ງກ່າວ ໃຫ້ສາມາດເຂົ້າເຖິງຂໍ້ມູນ, ການໃຫ້ຄໍາແນະນໍາ ແລະ ໃຫ້ຄໍາປຶກສາຕອບຂໍ້ຂ້ອງໃຈ ກ່ຽວກັບວຽກງານສ່ວຍສາອາກອນ ໃຫ້ມີຄວາມວ່ອງໄວ ທັນກັບສະພາບການໃນປັດຈຸບັນ. ພິທີດັ່ງກ່າວໄດ້ຈັດຂຶ້ນໃນວັນທີ 28 ສິງຫາ ນີ້ ທີ່ກົມສ່ວຍສາອາກອນ ໂດຍມີ ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ມີທ່ານ ສົມບູນ ອິນທະປັດຖາ ຫົວໜ້າຫ້ອງການກະຊວງ, ມີພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ກະຊວງການເງິນ ໄດ້ກ່າວວ່າ: ໃນໄລຍະຜ່ານການໃຫ້ຄຳປຶກສາວຽກງານສ່ວຍສາອາກອນ ຍັງບໍ່ເປັນເອກະພາບກັນໃນຂອບເຂດທົ່ວປະເທດ ແລະ ບໍ່ລວມສູນຢູ່ບ່ອນດຽວ, ບໍ່ມີຮູບແບບການຕອບຄໍາຖາມທີ່ຊັດເຈນ ເຮັດໃຫ້ຜູ້ເສຍອາກອນເກີດຄວາມສັບສົນ ແລະ ຍັງຊັກຊ້າ. ນອກຈາກນັ້ນ, ການເຂົ້າເຖິງຂໍ້ມູນທີ່ຕິດພັນກັບວຽກງານສ່ວຍສາອາກອນ ກໍຍັງມີຄວາມຫຍຸ້ງຍາກ ແລະ ມີຂອບເຂດຈຳກັດ. ສະນັ້ນ, ການເປີດປ່ອງບໍລິການສອບຖາມຂໍ້ມູນອາກອນທາງໂທສະສັບ ແມ່ນເປັນໃບໜ້າໃໝ່ຂອງກົມສ່ວຍສາອາກອນ ແລະ ເປັນຄັ້ງທຳອິດ ທີ່ໄດ້ສ້າງຕັ້ງຂຶ້ນຕາມແຜນພັດທະນາ ຂອງຂະແໜງສ່ວຍສາອາກອນ 2021-2025 ທີ່ໄດ້ກໍານົດໄວ້ ເພື່ອເປັນການສ້າງມາດຕະຖານໃນການບໍລິການ ແລະ ໃຫ້ຄຳປຶກສາ ຜູ້ເສຍອາກອນໃນຂອບເຂດທົ່ວປະເທດ ທັງເປັນເງື່ອນໄຂທີ່ຂະແໜງສ່ວຍສາອາກອນ ໃນແຕ່ລະປະເທດຕ້ອງມີ ເພາະເປັນກະບອກສຽງ ໃນການສ້າງຄວາມເພິ່ງພໍໃຈ ໃຫ້ແກ່ຜູ້ເສຍອາກອນ, ຫັນເຂົ້າສູ່ລະບຽບກົດໝາຍໃຫ້ຫຼາຍຂຶ້ນ.
ສຳລັບການເປີດບໍລິການສອບຖາມຂໍ້ມູນ Call center 1466 ແມ່ນໃຫ້ບໍລິການຕາມວັນເວລາໂມງລັດຖະການ (ວັນຈັນ ຫາວັນສຸກ) ເລີ່ມແຕ່ເວລາ 8:30-16:00 ໂມງ, ປັດຈຸບັນສາມາດໂທເຂົ້າຜ່ານສາຍດ່ວນໝາຍເລກໂທລັບສັບ 1466. ພ້ອມນັ້ນ, ຍັງມີຊ່ອງທາງການຕິດຕໍ່ຜ່ານ Socialme dia ກໍຄື E-Mail, WhatsApp, Facebook ຂອງກົມສ່ວຍສາອາກອນ (ແມ່ນຈະໃຫ້ບໍລິການໃນ phrase ຕໍ່ໄປ).
ສ່ວນເປົ້າໝາຍການໃຫ້ບໍລິການ ເພື່ອເສີມຂະຫຍາຍໜ່ວຍງານບໍລິການປະຕູດຽວ One stop service ໃນການໃຫ້ຂໍ້ມູນກັບຜູ້ປະກອບການກໍຄືບັນດາຫົວໜ່ວຍທຸລະກິດທັງພາກລັດ ແລະ ເອກະຊົນ, ສາມາດເຂົ້າເຖິງແຫຼ່ງຂໍ້ມູນ ແລະ ສອບຖາມຂໍ້ຂ້ອງໃຈ ເປັນຕົ້ນແມ່ນ ຂໍ້ມູນດ້ານກົດໝາຍກົດໝາຍ ເຊັນ: ກົດໝາຍຄຸ້ມຄອງສ່ວຍສາອາກອນ, ກົດໝາຍອາກອນລາຍໄດ້, ກົດໝາຍອາກອນຊົມໃຊ້, ກົດໝາຍອາກອນມູນຄ່າເພີ່ມ, ນິຕິກຳ, ລະບຽບການ, ຄໍາແນະນໍາການຈັດຕັ້ງປະຕິບັດ ແລະ ບັນດາແຈ້ງການດ່ວນຕ່າງໆ, ລວມທັງຂໍ້ມູນກ່ຽວກັບການນໍາໃຊ້ລະບົບ TaxRIS (ເປັນຕົ້ນ ການແຈ້ງ-ການມອບອາກອນ ຜ່ານລະບົບTaxRIS).
ປັດຈຸບັນປ່ອງບໍລິການ Call center 1466 ຂອງກະຊວງການເງິນ ມີ 3 License ແລະ ມີ ພະນັກງານຮັບສາຍໃຫ້ບໍລິການ 3 ທ່ານ. ນອກຈາກນີ້, ຍັງມີລະບົບ Knowledge Base System ກໍຄືລະບົບ KBS ເປັນຖານຂໍ້ມູນທັງໝົດ ກ່ຽວກັບວຽກງານສ່ວຍສາອາກອນ ເພື່ອໃຫ້ພະນັກງານສາມາດເບິ່ງເປັນບ່ອນອີງ ໃນການຕອບຂໍ້ຂ້ອງໃຈໃຫ້ແກ່ຜູ້ໂທເຂົ້າມາ, ທຸກການສົນທະນາຂອງຫົວໜ່ວຍທຸລະກິດ ແລະ ພະນັກງານ ທີ່ໃຫ້ຂໍ້ມູນຈະຖືກບັນທຶກ (Record) ເຂົ້າໃນລະບົບທຸກຄັ້ງ ແລະ ລະບົບຍັງສາມາດຶງເອົາຂໍ້ມູນດັ່ງກ່າວ ອອກມາເປັນບົດສະຫຼຸບ-ລາຍງານ ໃຫ້ຄະນະນໍາ ຮັບຊາບເປັນແຕ່ລະໄລຍະ.
