ດັ່ງທີ່ເຮົາຮູ້ນໍາກັນແລ້ວວ່າ ພິດຊ່າ ບໍ່ແມ່ນອາຫານລາວ ເປັນອາຫານຈາກຕ່າງປະເທດ ໂດຍປະເທດອີຕາລີ ສະນັ້ນ, ປະຊາຊົນລາວເຮົາຈຶ່ງບໍ່ຄ່ອຍຈະຮັບຮູ້ ແລະ ບໍ່ນິຍົມກິນຢ່າງກວ້າງຂວາງ ກັບການກິນພິດຊ່າ ຕາມທໍານຽມ ຄືກັບຊາວຕາເວັນຕົກພໍເທົ່າໃດ ແຕ່ເມື່ອສັງຄົມບ້ານເຮົາເປີດກວ້າງຂຶ້ນ ວັດທະນະທໍາການກິນ ການຢູ່ເລີ່ມແຜ່ລາມເຂົ້າມາ ເຮັດໃຫ້ຄົນລາວເຮົາໄດ້ສໍາຜັດກັບອາຫານ ແລະ ວັດທະນະທໍາແຕກຕ່າງອອກໄປ ຈົນກາຍເປັນຄວາມມັກ ໂດຍສະເພາະແມ່ນເດັກນ້ອຍ ແລະ ໄວໜຸ່ມ ແມ່ນຈະຖືກໃຈເປັນພິເສດ ເພາະພິດຊ່າ ແມ່ນເຂົ້າໜົມປັງອົບແຫ້ງທີ່ຕົບແຕ່ງໜ້າດ້ວຍ ປູ,ປາ,ກຸ້ງ,ຫອຍ, ຮອດດ໋ອກ, ຫົວຜັກບົ່ວໃຫຍ່ ແລະ ອື່ນໆ ຕາມຄວາມມັກ ຈຶ່ງເຮັດໃຫ້ທຸລະກິດ ຂາຍພິດຊ່າຂະຫຍາຍຕົວຢ່າງກວ້າງຂວາງ ໂດຍຄົນລາວເອງກໍຫັນມາຍຶດອາຊີບນີ້ຫລາຍຂຶ້ນ ເພື່ອຕອບໂຈດຄວາມຕ້ອງການຂອງຜູ້ບໍລິໂພກ ເໝືອນດັ່ງ ພິດຊ່າ ໄວລຸ້ນ ຂອງ ນາງ ແສງດາລາ ເພັດລໍາພັນ ຈາກບ້ານ ຮ່ອງຄ້າ ເມືອງຈັນທະບູລີ ນະຄອນຫລວງວຽງຈັນ ກໍເປັນຮ້ານໜຶ່ງທີ່ສາມາດຄອງໃຈຜູ້ບໍລິໂພກໄດ້ ເຖິງຈະເປີດມາບໍ່ທັນຮອດປີ ດ້ວຍຄວາມແຊບຂອງລົດຊາດ ແລະ ລາຄາສຸດຄຸ້ມ ເລີ່ມຕົ້ນພຽງ 29 ພັນກີບຕໍ່ຖາດເທົ່ານັ້ນ.
ທ່ານ ນາງ ແສງດາລາ ເພັດລໍາພັນ ເຈົ້າຂອງຮ້ານ ພິດຊ່າໄວ້ລຸ້ນ ເວົ້າສູ່ຟັງວ່າ: ຈຸເລີ່ມຕົ້ນ ທີ່ໄດ້ມາເຮັດອາຊີບ ຂາຍພິດຊ່ານີ້ ແມ່ນລູກຊາຍເປັນຄົນທີ່ມັກກິນ ພິດຊ່າຫລາຍ ແລະ ອີງໃສ່ລາຄາ ພິດຊ່າ ລາຄາສູງຫລາຍດັ່ງນັ້ນ, ຈຶ່ງຕັດສິນໃຈໄປຮຽນເຮັດຟິດຊ່າ ຈາກປະເທດເພື່ອນບ້ານ ແລ້ວນໍາເອົາຄວາມຮູ້ນໍາໃຊ້ໂຕຈິງ ເລີ່ມ ຕົ້ນແມ່ນມາຮຽນເຮັດກິນເອງ ລອງຜິດລອງຖືກຫລາຍຫລົບຫລາຍຕ່າວ ຈົນກວ່າຈະໄດ້ລົດຊາດທີ່ລົງໂຕ ຈຶ່ງຕັດສິນໃຈເປີດຮ້ານ ພິດຊ່າໄວລຸ້ນ ແຕ່ຕົ້ນປີ 2023 ຜ່ານມາເປັນຕົ້ນມາ ແລະ ພາຍຫລັງທີ່ເປີດມາຖືວ່າໄດ້ຂາຍດີ ເພາະພິດຊ່າຂາຍລາຄາບໍ່ແພງ ລາຄາເລີ່ມຕົ້ນພຽງ 29 ພັນກີບເທົ່ານັ້ນ ເພາະເນັ້ນໃສ່ ເດັກນ້ອຍທີ່ມັກກິນພິດຊ່າ ແຕ່ເງິນບໍ່ຫລາຍ ກໍ່ສາມາດກິນໄດ້ ໂດຍຈຸດເດັ່ນຂອງພິດຊ່າໄວລຸ້ນ ແມ່ນລາຄາຖືກ, ລົດຊາດແຊບ ມີ 8 ໜ້າໃຫ້ເລືອກ ແລະ ນໍາໃຊ້ຊິດທີ່ມີຄຸນນະພາບ ເວລາກິນຈະມີຄວາມໜຽວນຸ່ມ,ຫອມ ບວກກັບແຜ່ນແປງ ທີ່ກອບນອກແຕ່ນຸ່ມໃນ ເລວາກິນເຂົ້າກັນບອກໄດ້ເລີຍແຊບຊ້ອຍ ຮັບຮອງໄດ້ ເພາະຜູ້ຂຽນເອງກໍ່ໄດ້ກິນມາແລ້ວ.
ທ່ານ ນາງ ແສງດາລາ ເວົ້າຕື່ມວ່າ: ປັດຈຸບັນ ຮ້ານ ພິດຊ່າ ມີ 2 ສາຂາ, ສາຂາທີ 1 ຢູ່ໜ້າໂຮງຮຽນກ້າວໜ້າ, ສາຂາທີ 2 ແມ່ນ ຢູ່ບ້ານຮ່ອງຄ້າ ແຕ່ຕໍ່ໄປອາດ ຈະມາເປີດຢູ່ສາຂາທີ 2 ສາຂາດຽວ ເພາະສາຂາທີ 1 ໃກ້ຈະໝົດສັນຍາເຊົ້າແລ້ວ ບວກກັບເສດຖະກິດໃນປັດຈຸບັນ ອັດຕາເງີນເຟີ້ສູງ ຄ່າເຊົ້າກໍແພງຂຶ້ນ ແຕ່ການຂາຍຈະຂາຍລາສູງຫລາຍກໍ່ບໍ່ໄດ້ ສະນັ້ນ, ຈຶ່ງຕັດສິນໃຈເປີດແຕ່ສາຂາດຽວ ເພາະຢູ່ນີ້ເປັນຮ້ານເຮົາເອງບໍ່ໄດ້ເຊົ້າ ກໍ່ພໍ່ຢູ່ໄດ້. ແຕ່ແນວໃດກໍດີ ກໍຢາກຝາກເຖິງ ພັກ-ລັດ ແກ້ໄຂເລື່ອງອັດຕາເງິນເຟີ້ ແລະ ຄ່າຄອງຊີບ ເພາະສົ່ງຜົນກະທົບໂດຍກົງ ຕໍ່ການປະກອບອາຊີບ ແລະ ການດໍາລົງຊີວິດຂອງປະຊາຊົນ .
ສໍາລັບທ່ານໃດ ທີ່ຢາກກິນພິດຊ່າ ແຊບໆໃນລາຄາສຸດຄຸ້ມ ຮ້ານພິດຊ່າໄວລຸ້ນ ເປັນອີກຮ້ານໜຶ່ງທີ່ຢາກແນະນໍາ ເພາະເປັນຮ້ານຂອງຄົນລາວເຮົາເອງ ແຕ່ລົດຊາດແຊບບໍ່ແພ້ຕົ້ນສະບັບເລີຍ ໂດຍຮ້ານຕັ້ງຢູ່ບ້ານຮ່ອງຄ້າ ເມືອງຈັນທະບູລີ ນະຄອນຫລວງວຽງຈັນ ຫລື ຕິດຕໍ່ສອບຖາມສັ່ງໄດ້ທີ ເບີ 020 99818133 ຫລື ເຟສບຸກ Pizzaໄວລຸ້ນ.
ຂຽນໂດຍ: ມາລີດາ
