ເຂົ້າໜົມແມ່ປຸ ແມ່ນເຂົ້າໜົມຊະນິດໜຶ່ງທີ່ກໍາລັງໄດ້ຮັບຄວາມນິຍົມຫລາຍ ໂດຍສະເພາະໃນສື່ອອນລາຍເພາະບັນດາ ຜູ້ປະກອບການທີ່ເຮັດອາຊີບຂາຍເຂົ້າໜົມ ໄດ້ມີການນໍາສະເໜີວິທີການ ແລະ ແນວທາງແບບຕື່ນເຕັ້ນດຶງດູດ ເພື່ອໃຫ້ລູກຄ້າຄິດຢາກສໍາຜັດ ແລະ ສາມາດສັ່ງຈອງ ຜ່ານສື່ອອນລາຍ ໂດຍບໍ່ ຕ້ອງເສຍເວລາອອກຈາກເຮືອນ ມີແຕ່ຖ້າຮັບເຄື່ອງຈາກບໍລິການຂົນສົ່ງກໍ່ໄດ້ກິນແລ້ວ ໂດຍເຂົ້າໜົມບ້າບິ່ນ ແມ່ນເຂົ້າໜົມທີ່ເຮັດມາຈາກແປ້ງເຂົ້າໜຽວ ແລະ ແປ້ງເຂົ້າຈ້າວຄືເຂົ້າໜົມທົ່ວໄປ ແຕ່ສິ່ງທີ່ແຕກຕ່າງຄືໄສ້ເຂົ້າໜົມທີ່ເຮັດ ຈາກໝາກພ້າວອ່ອນ, ສາລີ,ຕາວ, ເຜືອກ, ມັນ ແລະ ອື່ນໆ ທີ່ດຶງດູດລູກຄ້າ ໄດ້ຢ່າງຫລວງຫລາຍ ໃນຂະນະດຽວກັນ ຜູ້ທີ່ເຮັດອາຊີບຂາຍເຂົ້າໜົມບ້າບິ່ນ ກໍຫລາຍເຊັ່ນດຽວກັນ. ສະນັ້ນ, ຄໍລໍາ ສົ່ງເສີມທຸລະກິດສະບັບນີ້ ຈະພາທ່ານມາຮູ້ຈັກ ຮ້ານເຂົ້າໜົມບ້າບິ່ນອີກໜຶ່ງຮ້ານດັງ ໃນເຂດເມືອງນາຊາຍທອງ ນະຄອນຫລວງວຽງຈັນ ຄືຮ້ານ ເຂົ້າໜົມບ້າບິ່ນແມ່ປຸ ທີ່ຄົນກໍາລັງໃຫ້ຄວາມສົນໃຈ ດ້ວຍລົດຊາດ ແລະ ການນໍາໃຊ້ວັດຖຸດິບ ທີ່ມີຄຸນນະພາບຈຶ່ງມັດໃຈຜູ້ບໍລິໂພກ ໄດ້ໃນເວລາພຽງສອງປີ ແຕ່ສາມາດເປີດສາຂາທີ່ສອງຂອງຮ້ານເຂົ້າໜົມບ້າບິ່ນແມ່ປຸໄດ້ແລ້ວ.
ແມ່ປຸ ເຈົ້າຂອງຮ້ານເຂົ້າໜົມບ້າບິ່ນ ເວົ້າສູ່ຟັງວ່າ: ຈຸດເລີ່ມຕົ້ນທີ່ມາເຮັດອາຊີບນີ້ ແມ່ນມັກກິນເຂົ້າໜົມບ້າບິ່ນ ຈຶ່ງຕັດສິນໃຈສຶກສາຮຽນຮູ້ ກ່ຽວກັບວິທີການຜະລິດຜ່ານຫລາຍຊ່ອງທາງ ເມື່ອເປັນແລ້ວ ຈຶ່ງໄດ້ນໍາມາປະຕິບັດໂຕຈິງ ຄືເຮັດ ແຈກຢາຍໃຫ້ຄົນໃນຄອບຄົວ ,ອ້ອມຂ້າງໄດ້ຊີມ ເມື່ອໄດ້ຊີມແລ້ວຫລາຍຄົນກໍ່ມັກໃນລົດຊາດ ຈຶ່ງແນະນໍາວ່າບໍ່ເປີດຮ້ານບໍ່ ເມື່ອໄດ້ຍິນແບບນີ້ ກໍ່ມີແນວຄວາມຄິດເພາະຕົນເອງ ກໍ່ຢາກຫາອາຊີບເສີມຢູ່ແລ້ວ ໂດຍສາຂາທໍາອິດເປີດແມຢູ່ເມືອງນາຊາຍທອງ ແຕ່ປີ 2021 ພາຍຫລັງທີ່ເປີດມາເຫັນວ່າຜົນຕອບຮັບດີ ຫລາຍຄົນກໍ່ມາອຸດໝູນ ແລະ ເປັນກະບອກສຽງບອກຕໍ່ ຜ່ານຫລາຍຊ່ອງທາງ ໂດຍສະເພາະ ແມ່ນ ແອັບຕິກຕ໋ອກ ແລະ ເຟສບຸກ ຈຶ່ງເຮັດໃຫ້ຄົນຮູ້ຈັກເຂົ້າໜົມບ້າບີ່ນສູດແມ່ປຸຫລາຍຂຶ້ນ ກໍ່ແນະນໍາໃຫ້ເປີດຫລາຍສາຂາ ເພື່ອສະດວກໃຫ້ລູກຄ້າເອງ. ສະນັ້ນ, ຈຶ່ງຕັດສິນໃຈ ເປີດສາຂາທີ່ສອງຢູ່ຕະຫລາດລາວອົກຊີ ກໍ່ຍ້ອນສຽງຕອບຮັບທີ່ດີຈາກລູກຄ້າທຸກໆທ່ານ ຈຶ່ງເຮັດໃຫ້ເຂົ້າໜົມຮ້ານນ້ອຍໆ ສາມາດຫຍາຍຕົວຢ່າງວ່ອງໄວ ແລະ ເປີດສາຂາທີ່ສອງໄດ້ກໍຍ້ອນ ການສະໜັບສະໜູນ ແລະ ຄໍາຕໍານິຕິຊົມ ກ່ຽວກັບລົດຊາດເຂົ້າໜົມ ຈຶ່ງມີການປັບປຸງຕະຫລອດມາຈົນ ໄດ້ສູດທີ່ລົງໂຕໃຜກິນກໍຕ້ອງຕິດໃຈ ເພາະເຂົ້າໜົມບ້າບິ່ນສູດແມ່ປຸ ຈະບໍ່ປະຢັດໄສ້ພ້ອມດຽວກັນ ກໍມີຫລາຍໄສ້ໃຫ້ເລືອກບໍ່ວ່າຈະເປັນໄສ້ໝາກພ້າວອ່ອນ, ສາລີ,ມັນດ້າງ,ຕາວ ແລະ ອື່ນໆອີກໂດຍລາຄາຂາຍແມ່ນກ້ອນໜຶ່ງ 10.000 ກີບເທົ່ານັ້ນ.
ແມ່ປຸ ຍັງເວົ້າຕື່ມວ່າ: ໃນປັດຈຸບັນ ເນື່ອງຈາກລູກຄ້າຮຽກຮ້ອງເຂົ້າມາຫລາຍເລື່ອງການສອນ ເຮັດເຂົ້າໜົມຈຶ່ງໄດ້ເປີດຮັບສອນເຮັດເຂົ້າໜົມບ້າບິ່ນ ສໍາລັບທ່ານໃດທີ່ຄິດຢາກຫາອາຊີບເສີມ ແມ່ນເຮົາຈະສອນໃຫ້ໝົດ ບໍ່ຫວງສູດເລີຍເພາະວ່າ ຢາກແບ່ງປັນອາຊີບດີໆ ທີ່ມີລາຍຮັບໃຫ້ທຸກຄົນ ໂດຍລາຄາສອນເລີ່ມຕົ້ນແມ່ນ 1.500.000 ກີບຂຶ້ນໄປໃນລາຄານີ້ ແມ່ນຈະມີໝໍ້ເຮັດເຂົ້າໜົມລຸ້ນນ້ອຍໃຫ້ ສ່ວນລາຄາອື່ນໆກໍ່ຈະມີອຸປະກອນແຕກຕ່າງກັນອອກໄປ ສໍາລັບທ່ານໃດທີ່ສົນໃຈເຂົ້າໜົມ ບ້າບິ່ນແຊບໆ ກໍ່ສາມາດຊື້ກິນໄດ້ ຮ້ານເປີດຢູ່ຕະຫລາດລາວອົກຊີ ຫລື ທ່ານໃດທີ່ຢູ່ໄກແຕ່ຢາກຊີມ ກໍ່ສາມາດສັ່ງໄດ້ຜ່ານເບີໂທ 02098251928 ເພາະເຮົາສົ່ງຮອດບ້ານ.
ຂຽນໂດຍ: ມາລີດາ
