ລິໂອເນວ ເມສຊີ ມີຊື່ເຂົ້າຊີງລາງວັນ ນັກເຕະຍອດຢ່ຽມແຫ່ງປີຂອງ UEFA ຮ່ວມກັບ ເຄວິນ ເດີ ບຣອຍ ແລະ ເອລິງ ຮາລັນ ຈາກ ແມນເຊັສເຕີ ຊິຕີ້ ສ່ວນຜູ້ຈັດການຍອດຢ່ຽມມີ ເປບ ກວາດິໂອລາ ເປັນຕົວເກງ.
ສະຫະພັນບານເຕະເອີຣົບ (UEFA) ໄດ້ປະກາດຜູ້ສະໝັກລຸ້ນລາງວັນນັກເຕະຍອດຢ່ຽມປະຈໍາປີ 2023 ແລະ ຄູຝຶກຍອດຢ່ຽມ ແຫ່ງປີ ອອກມາແລ້ວເມື່ອວັນພະຫັດທີ່ຜ່ານມາ.
ໂດຍ 3 ນັກເຕະທີ່ມີຊື່ເຂົ້າຊິງລາງວັນນັກເຕະຍອດຢ່ຽມແຫ່ງປີ ປະກອບດ້ວຍ ລີໂອເນວ ເມສຊີ ທີ່ຫາກໍ່ຍ້າຍຈາກ ປາຣີ ແຊັງ-ແຊັກແມັງ ໄປຮ່ວມທີມ ອິນເຕີ ໄມອາມີ ແລະ ເຄວິນ ເດບຣອຍ ກັບ ເອຣິງ ຮາລັນ ຂອງທີມ ແມນເຊັສເຕີ ຊິຕີ ເຊິ່ງສື່ຕ່າງປະເທດຍົກໃຫ້ ລີໂອເນວ ເມສຊີ ເປັນຕົວເກງລາງວັນນີ້ ເພາະເຂົາພາທີມ ປາຣີ ແຊັງ-ແຊັກແມັງ ຄວ້າແຊ້ມລີກ 1 ລວມໄປເຖິງການພາທີມຊາດອາກຊັງຕິນ ຄວ້າແຊ້ມບານເຕະໂລກ 2022 ມາຄອງໄດ້.
ສ່ວນຮອງລົງມາຄື ເອີລິງ ຮາລັນ ແລະ ເຄວິນ ເດີ ບຣອຍ ທີ່ພາທີມ ແມນເຊັສເຕີ ຊິຕີ ຄວ້າ 3 ແຊັມຄື: ຢູຟາ ແຊມປ້ຽນລີກ, ພຣີເມຍລີກ ແລະ FA Cup ໃນລະດູການທີ່ຜ່ານມາ.
ສໍາລັບລາງວັນຜູ້ຈັດການຍອດຢ່ຽມແຫ່ງປີ ມີ 3 ຄົນທີ່ເຂົ້າຊີງລາງວັນຄື ເປບ ກວາດິໂອລາ ຜູ້ຈັດການທີມ ແມນເຊັສເຕີ ຊິຕີ, ລູຊາໂນ ສະປັນເລດຕີ ຜູ້ຈັດການທີມ ນາໂປລີ ແລະ ຊິໂມເນ່ ອິນຊາກິ ຂອງ ອິນເຕີ ມິລານ ໂດຍທີ່ຕົວເກງຄື ເປບ ກວາດິໂອລ່າ, ທີ່ນໍາພາທີມ ແມນເຊສເຕີ ຊີຕີ ຄວ້າ 3 ແຊັມໄດ້ນັ້ນເອງ.
ການປະກາດລາງວັນ ຈະມີຂຶ້ນໃນງານຈັບສະຫຼາກ ຢູຟາ ແຊັມປຽນລີກ ຮອບແບ່ງກຸ່ມ ໃນວັນພະຫັດທີ 31 ສິງຫານີ້.
