ສຳນັກຂ່າວ ຕ່າງປະເທດ ລາຍງານຈາກ ນະຄອນຫລວງ ປັກກິ່ງ ປະເທດ ຈີນ ເມື່ອວັນທີ 5 ສິງຫາວ່າ: ກະຊວງບໍລິຫານ ຈັດການສະຖານະການ ສຸກເສີນຂອງ ຈີນ ລາຍງານວ່າ: ອຸທົກກະໄພ ຫລື ໄພພີບັດທາງທໍລະນີ ປະເພດອື່ນໆ ທີ່ເກີດຂຶ້ນ ເມື່ອເດືອນ ກໍລະກົດ ຜ່ານມາ ໄດ້ສົ່ງຜົນໃຫ້ມີ ປະຊາຊົນ ເສຍຊີວິດ ຫລື ສູນຫາຍລວມ 142 ຄົນ , ຂະນະທີ່ ໄພທຳມະຊາດ ແບບອື່ນໆເຊັ່ນ ໄພແຫ້ງແລ້ງ ສົ່ງຜົນໃຫ້ມີ ຜູ້ເສຍຊີວິດ ຫລື ສູນຫາຍ 5 ຄົນ ໃນໄລຍະ ເວລາດັ່ງກ່າວ.
ສຳລັບ ຄວາມເສຍຫາຍ ໂດຍກົງ ທາງເສດຖະກິດ ທີ່ເປັນຜົນ ຈາກ ໄພທຳມະຊາດ ຊຶ່ງເກີດຂຶ້ນ ຕະຫລອດໄລຍະ ເວລາ ດັ່ງກ່າວ ໂດຍມີ ມູນຄ່າ ປະມານ 15.800 ລ້ານຢວນ , ເຮືອນຊານ ແລະ ທີ່ຢູ່ອາໄສ ຂອງ ປະຊາຊົນ ໄດ້ຮັບ ຄວາມເສຍຫາຍ ຫລາຍ ກວ່າ 2.300 ຫລັງ. ໃນຂະນະດຽວກັນ, ປະຊາຊົນ ປະມານ 16 ລ້ານຄົນ ໄດ້ຮັບຄວາມເດືອນຮ້ອນ ຈາກ ອິດທິພົນ ຂອງ ຝົນຕົກ ລົງມາ ຢ່າງໜັກ ໃນໄລຍະນີ້. ຍ້ອນຄວາມຮຸນແຮງ ທີ່ຍັງເຫລືອຢູ່ ຂອງ ໄຕ້ຝຸ່ນ ທົກຊູຣີ.
ສ່ວນຍອດຜູ້ເສຍຊີວິດ ຈາກເຫດດິນເຈື່ອນ ຢູ່ ເມືອງທ່ອງທ່ຽວຕາກອາກາດ ຊື່ວ່າ ໂຊວີ ໃນບໍລິເວນເຂດພູ ທາງພາດ ຕາເວັນຕົກ ສຽງເໜືອ ຂອງ ປະເທດ ຊອກຊີ ເພີ່ມຂຶ້ນເປັນ ຢ່າງໜ້ອຍ 11 ຄົນ , ນອກນັ້ນ ກອງທັບ ຊອກຊີ ພວມລະດົມກຳລັງ ແລະ ເຄື່ອງມື ເພື່ອສົ່ງໄປ ຊ່ວຍເຫລືອ ແລະ ປະຕິບັດການ ຄົ້ນຫາ ຜູ້ສູນຫາຍ ຈຳນວນໜຶ່ງ ຫລັງຈາກ ມີການ ອົບພະຍົບ ປະຊາຊົນ ດ້ວຍເຮລິກົບແຕ້ ຈຳນວນ 100 ຄົນ ແລະ ຟື້ນຟູພື້ນທີ່ເກີດເຫດດັ່ງກ່າວ.
