ກອງປະຊຸມທາບທາມຄວາມເຊື່ອໝັ້ນໄວ້ວາງໃຈ ຕໍ່ການນຳພາລວມ ຂອງບັນດາສະຫາຍຄະນະບໍລິຫານງານສູນກາງພັກ ກາງສະໄໝທີ XI ຈຸດທາບທາມຂົງເຂດເສດຖະກິດ ໄດ້ຈັດຂຶ້ນໃນວັນທີ 28 ກໍລະກົດ ນີ້ ທີ່ທະນາຄານແຫ່ງ ສປປ ລາວ ພາຍໃຕ້ການເປັນປະທານຂອງສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ, ມີບັນດາກໍາມະການສູນກາງພັກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມໃນຄັ້ງນີ້ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນ ຕໍ່ການນຳພາລວມຂອງຄະນະບໍລິຫານງານສູນກາງພັກ ແລະ ບັນດາສະຫາຍ ໃນຄະນະບໍລິຫານງານສູນກາງພັກ ໃນກາງສະໄໝຜ່ານມາ ແລະ ເພື່ອຕີລາຄາຄືນການນໍາພາລວມໃນການຈັດຕັ້ງຜັນຂະຫຍາຍປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ກາງສະໄໝຜ່ານມາ ຕໍ່ຂົງເຂດເສດຖະກິດ ໂດຍຍົກໃຫ້ເຫັນດ້ານຕັ້ງໜ້າ, ຂໍ້ຄົງຄ້າງ ເພື່ອໃຫ້ຄະນະບໍລິຫານງານສູນກາງພັກ ສືບຕໍ່ປັບປຸງແກ້ໄຂໃນຕໍ່ໜ້າ; ເພື່ອພ້ອມກັນຄົ້ນຄວ້າ ມີຄວາມເຫັນ ຕໍ່ບັນດາສະຫາຍຄະນະບໍລິຫານງານສູນກາງພັກ ເພື່ອເບິ່ງຄືນ ແລະ ຕີລາຄາບັນຫາຕ່າງໆ ທີ່ພົວພັນເຖິງຄຸນລັກສະນະ, ມາດຖານຂອງພະນັກງານນຳພາຄຸ້ມຄອງ (ມາດຖານຂອງສູນກາງພັກ).
ສະຫາຍ ບຸນທອງ ຈິດມະນີ ໄດ້ກ່າວວ່າ: ການປະກອບຄຳເຫັນຕໍ່ການນຳພາລວມ: ສະເໜີໃຫ້ບັນດາສະຫາຍຜູ້ແທນກອງປະຊຸມ ອີງໃສ່ຈິດໃຈຊີ້ນໍາ “ສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ” ຂອງກອງປະຊຸມໃຫຍ່ ຄັ້ງທີ XI ຂອງພັກ, ອີງຕາມຜົນໄດ້ຮັບໃນການຫັນເອົາມະຕິດັ່ງກ່າວເຂົ້າສູ່ການຈັດຕັ້ງປະຕິບັດ ແລະ ການຫັນປ່ຽນທີ່ເກີດຂຶ້ນຕົວຈິງ ຈາກການນຳພາ-ຊີ້ນຳ ໃນການເຄື່ອນໄຫວຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໃນກາງສະໄໝ ແລະ ການປະຕິບັດ 2 ວາລະແຫ່ງຊາດ; ສ່ວນການປະກອບຄໍາເຫັນ ຕໍ່ແຕ່ລະສະຫາຍໃນຄະນະບໍລິຫານງານສູນກາງພັກ, ໃຫ້ເບິ່ງ ແລະ ຕີລາຄາຄືນ ດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ຄວາມຮັບຜິດຊອບ ຕໍ່ໜ້າທີ່ການເມືອງລວມ ຂອງສູນກາງພັກ; ເບິ່ງແບບແຜນນໍາພາ ແລະ ວິທີເຮັດວຽກ, ການເຄົາລົບ ແລະ ປະຕິບັດຫຼັກການນໍາພາຂອງພັກ; ເບິ່ງແນວຄິດ ແລະ ທັດສະນະ ໃນການຄົ້ນຄວ້າເບິ່ງບັນຫາຕ່າງໆ ມີຄວາມຮອບຄອບ, ຢ່າງເລິກເຊິ່ງ, ພາວະວິໄສ; ເບິ່ງຄວາມເອົາໃຈໃສ່ ແລະ ຖືສໍາຄັນຕໍ່ວຽກງານກໍ່ສ້າງພັກ, ພະນັກງານ, ວຽກງານຕິດຕາມ, ກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ໃນຂະແໜງການ ແລະ ທ້ອງຖິ່ນ ທີ່ຕົນຮັບຜິດຊອບ.
ຂ່າວ: ແສງຄຳ – ພາບ: ວິລະສະໄໝ
