ຄະນະສຳມະນາກອນສູນກາງແນວລາວສ້າງຊາດ (ສນຊ) ໄດ້ສໍາເລັດການຝຶກອົບຮົມແລກປ່ຽນບົດຮຽນວຽກງານແນວໂຮມ ເມືອທ້າຍເດືອນ ກໍລະກົດ ຜ່ານມາ ທີ່ແຂວງກວາງຕຸ້ງ ສປ ຈີນ ໂດຍການເປັນກຽດເຂົ້າຮ່ວມຂອງທ່ານ ເສິນລູ້ນຢວນ ຮອງຜູ້ອຳນວຍການສະຖາບັນຝຶກອົບຮົມພະນັກງານການຄ້າສາກົນ ຂອງກະຊວງການຄ້າ ສປ ຈີນ, ມີທ່ານ ດາວຽງສັກ ຫວ່າງວິຈິດ ຫົວໜ້າຫ້ອງການ ສນຊ ພ້ອມດ້ວຍຄະນະ ເຂົ້າຮ່ວມ.
ໃນພິທີດັ່ງກ່າວ, ທ່ານ ເສິນລູ້ນຢວນ ໄດ້ມີຄໍາເຫັນສະຫຼຸບວຽກງານຝຶກອົບຮົມໃນຄັ້ງນີ້ ສໍາມະນາກອນໄດ້ຄົ້ນຄວ້າແລກປ່ຽນຄວາມຄິດ ຄວາມເຫັນຢ່າງຕັ້ງໜ້າ ຊຶ່ງເຮັດໃຫ້ການບັນຍາຍຂອງອາຈານຕໍ່ກັບບົດຮຽນໃນ 7 ຫົວຂໍ້ໄດ້ຮັບຜົນສໍາເລັດຢ່າງຈົບງາມ, ເພື່ອໃຫ້ບັນດາສະຫາຍນຳໄປຖອດຖອນບົດຮຽນ ຜັນຂະຫຍາຍ ແລະ ໝູນໃຊ້ເຂົ້າໃນວຽກງານຕົວຈິງໃຫ້ໄດ້ຮັບຜົນດີ.
ໂອກາດນີ້, ທ່ານ ດາວຽງສັກ ຫວ່າງວິຈິດ ໄດ້ຕາງໜ້າໃຫ້ຄະນະສໍາມະນາກອນ ມີຄໍາເຫັນກ່າວສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງຕໍ່ຄະນະສະພາປຶກສາການເມືອງແຫ່ງຊາດຈີນ, ສະຖາບັນຝຶກອົບຮົມພະນັກງານການຄ້າສາກົນຂອງກະຊວງການຄ້າ ສປ ຈີນ, ຫ້ອງການທີ່ປຶກສາເສດຖະກິດ-ການຄ້າສະຖານທູດຈີນ ປະຈຳລາວ ແລະ ຫ້ອງການຮ່ວມມືລາວ-ຈີນ ທີ່ໄດ້ອໍານວຍຄວາມສະດວກໃຫ້ແກ່ຄະນະສຳມະນາກອນ ສູນກາງແນວລາວສ້າງຊາດໄດ້ມາຝຶກອົບຮົມ ຢູ່ ສປ ຈີນ ແລະ ຕີລາຄາສູງຕໍ່ໝາກຜົນຂອງຊຸດຝຶກອົບຮົມໃນຄັ້ງນີ້ ຊຶ່ງເປັນການຈັດຕັ້ງຜັນຂະຫຍາຍ ສັນຍາການຮ່ວມມື ລະຫວ່າງ ສະພາປຶກສາການເມືອງປະຊາຊົນແຫ່ງຊາດຈີນ ແລະ ສູນກາງແນວລາວສ້າງຊາດ.
(ຂ່າວ: ສນຊ)
