ແຫລ່ງຂ່າວຈາກ ແຂວງຫລວງພະບາງ ໃຫ້ຮູ້ວ່າ: ເມື່ອບໍ່ດົນມານີ້, ພະແນກສຶກສາທິການ ແລະ ກິລາແຂວງຫຼວງພະບາງ ຈັດສອບເສັງຄັດເລືອກເອົາທຶນການສຶກສາ ຮຽນຕໍ່ທີ່ ສສ ຫວຽດນາມ ແລະ ສປ ຈີນ ປະຈຳສົກຮຽນ 2023-2024 ໂດຍກໍານົດສອບເສັງ 3 ວິຊາຄື: ພາສາລາວ-ວັນນະຄະດີ, ຄະນິດສາດ ແລະ ວິທະຍາສາດທຳມະຊາດ.
ທ່ານ ສົມພອນ ດີລີວົງ ຮັກສາການຫົວໜ້າຂະແໜງອາຊີວະ ແລະ ການສຶກສາຊັ້ນສູງ ພະແນກສຶກສາທິການ ແລະ ກິລາແຂວງຫລວງພະບາງ ໃຫ້ຮູ້ວ່າ: ພະແນກສຶກສາທິການ ແລະ ກິລາແຂວງ ໄດ້ອອກແຈ້ງການກ່ຽວກັບການສອບເສັງຄັດເລືອກດັ່ງກ່າວເຖິງເມືອງ, ໂຮງຮຽນ ໂດຍຜ່ານຊ່ອງທາງສື່ຕ່າງໆ ມາເຖິງວັນທີ 18 ກໍລະກົດ 2023 ໄດ້ມີຜູ້ເຂົ້າມາສະໝັກລົງທະບຽນສອບເສັງທັງໝົດ 250 ຄົນ, ຍິງ 116 ຄົນ. ໃນນີ້, ສະໝັກເສັງເອົາທຶນຂອງ ສປ ຈີນ ຈໍານວນ 198 ຄົນ, ກວມເອົາ 79,2% ແລະ ເສັງເອົາທຶນ ສສ ຫວຽດນາມ ຈຳນວນ 52 ຄົນ, ກວມ 20,8%, ໃນສົກຮຽນ 2023-2024 ນີ້ພະແນກສຶກສາທິການ ແລະ ກິລາແຂວງ ໄດ້ຮັບທຶນການສຶກສາຈາກ ສສ ຫວຽດນາມ ທັງໝົດ 106 ທຶນ ແລະ ສປ ຈີນ 128 ທຶນ, ລວມທຶນທີ່ໄດ້ຮັບທັງໝົດ 234 ທຶນ, ຊັ້ນກາງ 40 ທຶນ, ຊັ້ນສູງ 121 ທຶນ, ປະລິນຍາຕີ 63 ທຶນ, ເຊື່ອມຕໍ່ປະລິນຍາຕີ 6 ທຶນ, ປະລິນຍາໂທ 4 ທຶນ, ໃນນັ້ນທຶນໃນແຜນ 100% ຈຳນວນ 182 ທຶນ ແລະ ທຶນ 50% ຈຳນວນ 52 ທຶນ.
ໂອກາດນີ້, ທ່ານ ວົງເພັດ ອຸດົມລິດ ຫົວໜ້າພະແນກສິກສາທິການ ແລະ ກິລາແຂວງ ໄດ້ໃຫ້ ໄດ້ເນັ້ນໜັກຫລາຍບັນຫາຕໍ່ການສອບເສັງຄັດເລືອກເຂົ້າສາຍວິຊາຮຽນຕໍ່ວິຊາຊີບສາຍຕ່າງໆຂອງນ້ອງນັກຮຽນທັງພາຍໃນ ແລະ ຕ່າງປະເທດ ເພື່ອຮັບປະກັນໃນການປະກອບອາຊີບທີ່ໝັ້ນຄົງ ພາຍຫລັງທີ່ ຮຽນຈົບສາຍວິຊາຊີບວິຊາສະເພາະໃດໜຶ່ງທີ່ແນ່ນອນ.
ຂ່າວ: ສອນອາຄົມ
