ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງວຽງຈັນ ວັນທີ 25-26 ກໍລະກົດ 2023 ເພື່ອຊຸກຍູ້ການຈັດຕັ້ງປະຕິບັດວຽກງານຍຸຕິທໍາຮາກຖານ ປະຈໍາປີ 2023 ແລະ ການຈັດຕັ້ງປະຕິບັດຄໍາຕັດສີນຂອງສານ.
ໃນໂອກາດນີ້ ທ່ານ ລັດຖະມົນຕີກະຊວງຍຸຕິທຳ ພ້ອມດ້ວຍຄະນະໄດ້ເຂົ້າພົບ ທ່ານ ຄໍາພັນ ສິດທິດໍາພາ ເຈົ້າແຂວງວຽງຈັນ ຈາກນັ້ນ ກໍໄດ້ລົງເຄື່ອນໄຫວຕິດຕາມ ຊຸກຍູ້ ແລະ ຊີ້ນຳ ການຈັດຕັ້ງປະຕິບັດວຽກງານຍຸຕິທໍາຮາກຖານ ຢູ່ແຂວງວຽງຈັນ ມີຫົວໜ້າພະແນກ ຮອງຫົວໜ້າພະແນກຍຸຕິ ທໍາແຂວງ ຫົວໜ້າຂະແໜງ ຮອງຂະແໜງ ບັນດາຫົວໜ້າຫ້ອງການຍຸຕິທຳ 11 ເມືອງ ແລະ ພະນັກງານຂອງກະຊວງຍຸຕິທຳ ທີ່ລົງຮາກຖານຢູ່ແຂວງວຽງຈັນ ເຂົ້າຮ່ວມ.
ໃນກອງປະຊຸມ ທ່ານ ນາງ ຈັນສອນ ກົງດາລາ ຮອງເລຂາໜ່ວຍພັກ ຮັກສາການຫົວໜ້າພະແນກຍຸຕິທຳແຂວງວຽງຈັນ ໄດ້ລາຍງານສະພາບການເຄື່ອນໄຫວວຽກງານຍຸຕິທຳຮາກຖານໃນໄລຍະ 6 ຕົ້ນປີ ແລະ ທິດທາງແຜນ ການ 6 ເດືອນທ້າຍປີ 2023 ເປັນຕົ້ນ ການເຮັດວຽກງານການເມືອງ-ແນວຄິດ ວຽກງານຈັດຕັ້ງ ແລະ ພະນັກງານ ວຽກງານສ້າງ ແລະ ປັບປຸງນິຕິກຳ ວຽກງານໂຄສະນາເຜີຍແຜ່ກົດໝາຍ ວຽກງານການສ້າງບ້ານ ແລະ ຄອບຄົວແບບຢ່າງປະຕິບັດກົດໝາຍ ວຽກງານໄກ່ເກ່ຍຂໍ້ຂັດແຍ່ງຂັ້ນບ້ານ ວຽກງານຍຸຕິທຳເດັກ ວຽກງານສ້າງບຸກຄະລາກອນທາງດ້ານກົດໝາຍ ວຽກງານປະຕິບັດຄຳຕັດສີນຂອງສານ ໄດ້ຍົກໃຫ້ເຫັນດ້ານດີ ດ້ານອ່ອນ ແລະ ບັນດາຂໍ້ຄົງຄ້າງທີ່ຈະຕ້ອງໄດ້ເອົາໃຈໃສ່ປັບປຸງແກ້ໄຂໃນຕໍ່ໜ້າ ຈາກນັ້ນ ທ່ານ ນາງ ສີສຸດາ ໂສພາວັນດີ ຫົວໜ້າກົມໂຄສະນາເຜີຍແຜ່ກົດໝາຍ ກະຊວງຍຸຕິທຳ ພະນັກງານລົງກໍ່ສ້າງຮາກຖານ ປະຈຳຢູ່ພະແນກຍຸຕິທຳ ແຂວງວຽງຈັນ ໄດ້ຂຶ້ນແນະນຳຕົນເອງ ພ້ອມທັງລາຍງານການເຄື່ອນໄຫວວຽກງານຂອງຕົນໃນ ໄລຍະລົງກໍ່ສ້າງຮາກຖານ 2 ເດືອນຜ່ານມາ ຍົກໃຫ້ເຫັນຜົນສຳເລັດ ຂໍ້ຄົງຄ້າງ ແລະ ທິດທາງແຜນການຂອງການຈັດຕັ້ງປະຕິບັດວຽກງານຍຸຕິທໍາຮາກຖານ ໃນຕໍ່ໜ້າ.
ໃນຕອນທ້າຍຂອງກອງປະຊຸມ ທ່ານ ໄພວີ ສີບົວລິພາ ໄດ້ມີຄຳເຫັນໂອ້ລົມໂດຍໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນ ງານທີ່ພະແນກຍຸຕິທໍາແຂວງ ແລະ ຫ້ອງການຍຸຕິທໍາເມືອງ ຍາດມາໄດ້ໃນໄລຍະຜ່ານມາ ພ້ອມນັ້ນ ກໍໄດ້ເນັ້ນ ໜັກ ໃຫ້ຄະນະພັກ-ຄະນະນໍາຂອງພະແນກຍຸຕິທໍາ ເຊີດຊູບົດບາດການນໍາພາຂອງພັກ ເອົາໃຈໃສ່ເພີ່ມທະວີສຶກສາ ອົບຮົມການເມືອງ-ນຳພາແນວຄິດ ໃຫ້ກວ້າງຂວາງ ເລິກເຊິ່ງ ຄົ້ນຄວ້າ ເຊື່ອມຊຶມ ແນວທາງນະໂຍບາຍຂອງພັກ ກົດໝາຍ ແລະ ລະບຽບການຂອງລັດ ໃນແຕ່ລະໄລຍະໃຫ້ແກ່ສະມາຊິກພັກ ພະນັກງານພາຍໃນພະແນກ ໃຫ້ເປັນປົກກະຕິເອົາໃຈໃສ່ເຄື່ອນໄຫວຈັດຕັ້ງປະຕິບັດຄຳແນະນໍາຂອງລັດຖະມົນຕີກ່ຽວກັບການຈັດຕັ້ງປະຕິບັດວຽກງານຍຸຕິທຳຮາກຖານ ປະຈຳປີ 2023 ຢ່າງແຂງແຮງ ແລະ ເປັນຂະບວນການຟົດຟື້ນ ຍົກສູງຄວາມເປັນແບບຢ່າງນຳໜ້າໃນການປະຕິບັດໜ້າທີ່ ທີ່ພັກ-ລັດ ແລະ ປະຊາຊົນມອບໝາຍໃຫ້ເປັນຢ່າງດີ ມີຜົນສຳເລັດໃໝ່ໃຫຍ່ຫຼວງກວ່າເກົ່າ.
