ໃນວັນທີ 28 ກໍລະກົດ 2023 ທີ່ໂຮງງານສີກາເຟ ແລະ ຫ້ອງທົດລອງ ບ້ານດອນໄລ່ ຫຼັກ 24 ເມືອງບາຈຽງຈະເລິນນສຸກ ແຂວງຈຳປາສັກ. ສະຫະກອນຜູ້ຜະລິດກາເຟເຂດພູພຽງບໍລະເວນ (ສຜກ) ໄດ້ເປີດກອງປະຊຸມປະຈຳປີ ຄັ້ງທີ 1 6 ຢ່າງເປັນທາງການ ເປັນກຽດເຂົ້າຮ່ວມຂອງທ່ານ ອຳນວຍ ເຮືອງວົງສາ, ຮອງເລຂາພັກເມືອງ ເມືອງບາຈຽງຈະເລີນສຸກ, ທ່ານ ຄຳ ນິລະວົງ, ຮອງຫົວໜ້າ ພະແນກກະສິກຳ ແລະ ປ່າໄມ້ແຂວງ, ທ່ານ ສີທອງ ເພັດລັງສີ ປະທານສະຫະກອນຜູ້ຜະລິດກາເຟເຂດພູພຽງບໍລະເວນ,ມິ ຫົວໜ້າ ຂະແໜງພັດທະນາຊົນນະບົດ ແລະ ສະຫະກອນ ແຂວງ, ມີສະມາຊິກທີ່ເປັນຕົວແທນມາຈາກຊາວສວນ ຂອງແຕ່ລະກຸ່ມຜະລິດ, ຊ່ຽວຊານທີ່ປຶກສາ, ຄະນະຜູ້ຈັດການ ແລະ ພະນັກງານ ເຂົ້າຮ່ວມ.
ທ່ານ ສີທອງ ເພັດລັງສີ ປະທານສະຫະກອນຜູ້ຜະລິດກາເຟເຂດພູພຽງບໍລະເວນ ໄດ້ກ້າວວ່າ:ກອງປະຊຸມສາມັນ ຫຼືວ່າ ກອງປະຊຸມປະຈຳປີ ຄັ້ງທີ 16 ຂອງ ສະຫະກອນ ຜູ້ຜະລິດກາເຟ ເຂດພູພຽງບໍລະເວນ ຫລື CPC ຂອງພວກເຮົາໃນຄັ້ງນີ້.ມິຄວາມສຳຄັນຫລາຍທີ່ສຸດ ຊຶ່ງໄດ້ຮັບຟັງ ແລະ ຮັບຮອງ ບົດສະຫຼຸບລາຍງານວຽກງານກິດຈະກຳສະຫະກອນເປັນຕົ້ນ: ບົດລາຍງານຜົນການກວດສອບບັນຊີຈາກອົງກອນກວດສອບພາຍນອກ, ຜົນການກວດສອບການຄ້າເປັນທຳ ແລະ ຜົນການກວດສອບວຽກງານກະສິກຳອິນຊີ ຫລື ອໍການິກ, ກິດຈະກຳພາກສະໜາມ, ກິດຈະກຳໂຮງງານ-ຫ້ອງທົດລອງ ແລະ ໂຮງງານຝຸ່ນ. ຮັບຟັງ ແລະ ຮັບຮອງ ບົດສະຫຼຸບລາຍງານວຽກງານການຕະຫຼາດ ພາຍໃນ ແລະ ສາກົນ, ຮັບຟັງ ແລະ ຮັບຮອງ ບົດລາຍງານ ບັນຊີ-ການເງິນ ຂອງລະດູການເກັບກ່ຽວທີ່ຜ່ານມາ ສົກ 2022-2023 ແລະ ແຜນກິດຈະກໍາ, ແຜນງົບປະມານໃນລະດູເກັບກ່ຽວ ສົກປີ 2023-2024 ຈະຕ້ອງໄດ້ຈັດຕັ້ງປະຕິບັດໃນສົກປີຕໍ່ໜ້າ.
ສະຫະກອນ ຜູ້ຜະລິດກາເຟ ເຂດພູພຽງບໍລະເວນ ມີຜົນສຳເລັດ ເປັນອົງກອນຕົວແບບໃນລະດັບປະເທດ ແລະ ສາກົນ ໃນການບໍລິການໃຫ້ແກ່ຊາວສວນຜູ້ຜະລິດ ແມ່ນລິເລີ້ມມາຈາກການຮ່ວມມື ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານຝຣັ່ງ, ໂດຍໄດ້ຮັບການອຸ້ມຊູຊວ່ຍເຫຼືອຢ່າງໄກ້ຊິດຕິດແທດ ແລະ ສະໜັບສະໜູນຈາກອົງການຈັດຕັ້ງ ພັກ-ລັດ ທີ່ກ່ຽວຂ້ອງ, ກໍ່ຄື ການນຳຂັ້ນ ກະຊວງ ກະສິກຳ ແລະ ປ່າໄມ້, ການນຳຂັ້ນແຂວງ ຂອງ 3 ແຂວງ ແລະ ຂອງ 4 ເມືອງ ໂດຍຕະຫລອດມາ.
ໃນວາລະກອງປະຊຸມ ທ່ານ ໄຊຍະກອນ ອ່ອນນາລີ, ຜູ້ອຳນວຍການລາຍງານຜົນການກວດສອບ ບັນຊີພາຍນອກ, ຜົນການກວດສອບການຄ້າເປັນທຳ ແລະ ຜົນການກວດສອບອໍການິກ,ວຽກງານພາກສະໜາມ ແລະ ກິດຈະກຳຂອງໂຮງງານ-ຫ້ອງທົດລອງ.ທ່ານ ຄຳພັນ ແກ້ວທະວີ, ຮອງຜູ້ອຳນວຍການຫົວໜ້າການຕະຫຼາດໄດ້ຜ່ານບົດລາຍງານ ວຽກງານການຕະຫຼາດ,ທ່ານ ບຸນເຮືອງ ວົງມະນີຄູນ, ຮອງຜູ້ອຳນວຍການຫົວໜ້າບໍລິຫານການເງິນ ໄດ້ຜ່ານບົດລາຍງານການເງິນ ສຳລັບລະດູເກັບກ່ຽວທີ່ຜ່ານມາ ສົກ 2022-2023. ຍົກໃຫເຫັນ ໃນ 16 ປີ ທີ່ຜ່ານມາ ສະຫະກອນມີຜົນງານຫລາຍໆຢ່າງ, ມີຫລາຍເຫດການທີ່ພົ້ນເດັ່ນເກີດຂື້ນເຊັ່ນ: ສະຫະກອນ ຜູ້ຜະລິດກາເຟ ເຂດພູພຽງບໍລະເວນ ເປັນອົງການຈັດຕັ້ງຂອງຊາວສວນທີ່ສະມາຊິກສະຫະກອນເປັນເຈົ້າຂອງ 100% ມີໂຄງປະກອບການຈັດຕັ້ງຄົບຊຸດ ເປັນລະບົບ ໃນການຂັບເຄື້ອນອົງກອນ ຄື: ມີຄະນະບໍລິຫານງານ 8 ທ່ານ, ພະນັກງານ 38 ທ່ານໄດ້ທຸ້ມເທເຮື່ອແຮງ ແລະ ສະຕິປັນຍາເຂົ້າໃນວຽກງານການຊຸກຍູ້-ສົ່ງເສີມ ໃຫ້ກັບສະມາຊິກຂອງສະຫະກອນຢ່າງເຕັມສ່ວນ ແລະ ມີສະມາຊິກທັງໝົດ 968 ຄອບຄົວ.ເປັນຊາວສວນກາເຟຂະໜາດນ້ອຍທີ່ມີເນື້ອທີ່ການຜະລິດກາເຟນ້ອຍທັງໝົດ 4,604 ເຮັກຕາ ແລະ ກາເຟກາງທັງໝົດ 1.535 ເຮັກຕາ ໂດຍສະເລ່ຍ 4 ເຮັກຕາ/ຄອບຄົວ,ມີ 37 ກຸ່ມຜູ້ຜະລິດຍ່ອຍ ທີ່ນອນຢູ່ໃນ 35 ໝູ່ບ້ານຂອງ 3 ເມືອງໃນເຂດພູພຽງບໍລະເວນເຊັ່ນ: ເມືອງປາກຊ່ອງ ແຂວງຈຳປາສັກ; ເມືອງເລົ່າງາມ ແຂວງ ສາລະວັນ ແລະ ເມືອງທ່າແຕງ ແຂວງ ເຊກອງ. ສະຫະກອນພວກເຮົາ ມີຕະຫລາດຮອງຮັບທີ່ໝັ້ນຄົງ, ມີສະຖານບັນການເງິນ ແລະ ກອງທຶນທີ່ເຂັ້ມແຂງ.
ສະຫະກອນໄດ້ໃຫ້ການຊ່ວຍເຫຼືອສັງຄົມ-ຊຸມຊົນໃນຫຼາຍໆດ້ານເປັນຕົ້ນ: ວຽກງານການສຶກສາ-ສາທາລະນະສຸກ, ສິງແວດລ້ອມ ແລະ ໄຟບິບັດ ແລະ ໄພທຳມະຊາດ, ຄົມມະນາຄົມອື່ນໆ ພິເສດເຮັດໃຫ້ນັກຮຽນຈຳນວນຫຼາຍກວ່າ 1.000 ຄົນ ໃນເຂດພູພຽງບໍລະເວນ ໄດ້ເຂົ້າເຖິງການສຶກສາທີ່ສະດວກຂື້ນ. ການຊ່ວຍເຫຼືອດ້ານສາທາລະນະສຸກ: ໄດ້ປຸກສ້າງ ສຸກສາລາ, ອຸປະກອນການແພດ ແລະ ເຮືອນຍາມແພດ ທີ່ ບ້ານ ໃໝ່ໄຊສົມບູນ ເມືອງປາກຊ່ອງ (2015) ເປັນມູນຄ່າ 650ລ້ານກີບ, ປະຊາຊົນຫຼາຍກວ່າ 3.568 ຄົນ ຈາກ4ບ້ານ ທີ່ສາມາດນຳໃຊ້ບໍລິການ. ມີນັກຮຽນຫຼາຍກວ່າ 7.000ຄົນ ໄດ້ນຳໃຊ້ນ້ຳສະອາດໃນໂຮງຮຽນ: ສະຫະກອນໄດ້ເຈາະນ້ຳບາດານ 15 ບໍ່ ແລະ ເຄື່ອງກອງນ້ຳດື່ມສະອາດ 222 ເຄື່ອງ ມອບໃຫ້ 42 ໂຮງຮຽນ, ນອກຈາກນີ້ສະຫະກອນຍັງໄດ້ປະກອບສ່ວນອຸປະກອນໃຫ້ກັບຂະແໜງແມ່ ແລະ ເດັກ ໂຮງໝໍແຂວງຈຳປາສັກ. ນອກນີ້ສະຫະກອນຍັງໄດ້ສືບຕໍ່ພັດທະນາຖະໜົນຫົນທາງໂດຍປະຊາຊົນບ້ານໃໝ່, ບ້ານໜອງກາ ເມືອງປາກຊ່ອງ ມີສ່ວນຮ່ວມສ້າງທາງເບຕົງ ໃຫ້ປະຊາຊົນໄດ້ນຳໃຊ້ມີຄວາມສະດວກຍິ່ງຂື້ນ.
ສະຫະກອນຜູ້ຜະລິດກາເຟພູພຽງບໍລິເວນ, ຊາວສວນກາເຟຂະໜາດນ້ອຍ ສຸດທີ່ມີຄວາມເອກອ້າງທະນົງໃຈ ທີ່ໄດ້ເປັນສ່ວນໜຶ່ງ ປະກອບເຂົ້າໃນຜົນສໍາເລັດລວມ ໃນພາລະກິດປົກປັກຮັກສາ ແລະ ພັດທະນາເສດຖະກິດ-ສັງຄົມຂອງຊາດ.ໃນປີນີ້ ເຖິງແມ່ນວ່າຈະມີຄວາມຫຍຸ້ງຍາກນາໆປະການ ແລະ ຜົນກະທົບຈາກຫລາຍໆປັດໃຈ ທັງພາຍໃນ ແລະ ພາຍນອກ ເຊັ່ນວ່າ: ບັນຫາການແຜ່ລະບາດຂອງພະຍາດໂຄວິດ-19, ບັນຫາອັດຕາແລກປ່ຽນ ເງິນກີບອ່ອນຄ່າ, ບັນຫາການແຂ່ງຂັນດ້ານການຄ້າ ລາຄາກາເຟທີ່ບໍ່ເປັນໄປຕາມຕະຫລາດໂລກ ແລະ ບັນຫາຂາດແຄນແຮງງານໃນການບົວລະບັດຮັກສາສວນ ແລະ ເກັບກາເຟ ສະມາຊິກຊາວສວນກາເຟຂອງພວກເຮົາກໍ່ຍັງໄດ້ຕາມເປົ້າໝາຍ ແລະ ຈຸດປະສົງທີ່ວາງໄວ້. ກອງປະຊຸມຍັງໄດ້ຮັບຟັງຄຳເຫັນໂອ້ລົມຂອງຄະນະປະທານກອງປະຊຸມ ເພື່ຶອເປັນທິດທາງໃນການເພີ່ມປະສິດທິພາບໃນການຜະລິດກາເຟ ອໍການິກ ແລະ ການບໍລິຫານຈັດການຂອງສະຫະກອນຜະລິດກາເຟເຂດພູພຽງບໍລະເວນຕື່ມອີກ.
ເກດສະໜາ ແກ້ວສຸວັນນະແສງ
