ແຫລ່ງຂ່າວຈາກ ແຂວງໄຊສົມບູນ ໃຫ້ຮູ້ວ່າ: ກອງບັນຊາການປ້ອງກັນຄວາມສະຫງົບ(ປກສ) ແຂວງໄຊສົມບູນ ນໍາໂດຍ ທ່ານ ພັອ ອິນປັນ ຍາດຕິວົງ ຮອງກອງບັນຊາການ ປກສ ແຂວງໄຊສົມບູນ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ ກອງບັນຊາການປ້ອງກັນຄວາມສະຫງົບ ແຂວງບັກຢາງ ສສ ຫວຽດນາມ ໂດຍການຕ້ອນຮັບຈາກ ທ່ານ ພັອ ໂດ ດຶກ ຈຶ ຮອງຫົວໜ້າກອງບັນຊາການ ປກສ ແຂວງບັກຢາງ ພ້ອມຄະນະ ເພື່ອສືບຕໍ່ເສີມຂະຫຍາຍການພົວພັນຮ່ວມມືໃຫ້ແໜ້ນແຟ້ນຍິ່ງຂຶ້ນ.
ເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງບັກຢາງ ໃນຄັ້ງນີ້, ກໍເພື່ອຜັນຂະຫຍາຍບັນດາເນື້ອໃນບົດບັນທຶກຊ່ວຍຈຳ ການຮ່ວມມືລະຫວ່າງຕຳຫລວດສອງແຂວງ ໃນການເພີ່ມທະວີການພົວພັນຮ່ວມມື ແລະ ມິດຕະພາບ ລະຫວ່າງ 2 ກຳລັງ ແລະ ລາຍງານການປະຕິໜ້າທີ່ວຽກງານວິຊາສະເພາະໃນໄລຍະຜ່ານມາ ໃຫ້ກັນຮັບຊາບ ເປັນຕົ້ນ ວຽກງານປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍທາງສັງຄົມ, ການຕ້ານສະກັດກັ້ນປະກົດການຫຍໍ້ທໍ້ດ້ານຕ່າງໆ, ພ້ອມທັງໄດ້ປຶກ ສາຫາລືທິດທາງແຜນການ ໃນການຮ່ວມມືປະສານສົມທົບວຽກງານປ້ອງຄວາມສະຫງົບ ລະຫວ່າງ ປກສ ແຂວງໄຊສົມບູນ ກັບ ປກສ ແຂວງບັກຢາງ ໃຫ້ນັບມື້ນັບໜັກແໜ້ນຂຶ້ນໄປເລື່ອຍໆ. ພ້ອມນີ້, 2 ກຳລັງ ກໍໄດ້ລົງນາມເຊັນບົດບັນທຶກຄວາມເຂົ້າໃຈຮ່ວມກັນ.
ໄລຍະຜ່ານມາ, ປກສ ແຂວງໄຊສົມບູນ ແລະ ປກສ ແຂວງ ບັກຢາງ ກໍໄດ້ມີພົວພັນການຮ່ວມມືກັນດ້ວຍດີຕະຫລອດມາ ໂດຍຈັດຕັ້ງຄະນະຜູ້ແທນມາຢ້ຽມຢາມ, ເຮັດວຽກ, ແລກປ່ຽນ ແລະ ຮຽນຮູ້ຈາກປະສົບການເຊິ່ງກັນ ແລະ ກັນ, ຮ່ວມມືພັດທະນາ, ຊຸກຍູ້ ແລະ ສະໜັບສະໜູນດ້ານເຕັກນິກວິຊາການຕ່າງໆ ຂອງວຽກງານປ້ອງກັນຄວາມສະຫງົບ ໃຫ້ມີຄວາມເຂັ້ມແຂງ.
ໃນໂອກາດນີ້, ທ່ານ ພັອ ອິນປັນ ຍາດຕິວົງ ພ້ອມຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບການນຳແຂວງ ໂດຍການຕ້ອນຮັບຂອງ ທ່ານ ຫງຽນ ເຢືອງ ວັນ ຖ່າຍ ກຳມະການສູນການພັກ, ເລຂາພັກແຂວງ, ເຈົ້້າແຂວງບັກຢາງ ຕື່ມອີກ.
ຂ່າວ-ພາບ: ຮອ ສອນເພັດ ອິນທະວົງ
