ຂ່າວສານຊີອາໄອລາຍງານ ເມື່ອບໍ່ດົນມານີ້, ໃນກອງປະຊຸມຖະແຫຼງຂ່າວກ່ຽວກັບນະໂຍບາຍຂອງລັດຖະບານທີ່ຫ້ອງການຖະແຫຼງຂ່າວຄະນະລັດຖະບານຈີນຈັດຂຶ້ນໃນວັນດຽວກັນ ຜູ້ຮັບຜິດຊອບທີ່ກ່ຽວຂ້ອງຂອງກະຊວງການຄ້າຈີນແຈ້ງໃຫ້ຮູ້ວ່າ: ຄຽງຄູ່ກັບການປ້ອງກັນ ແລະ ຄວບຄຸມພະຍາດໂຄວິດ-19 ກ້າວໄປສູ່ສະພາບໝັ້ນຄົງ ແລະ ການຈັດຕັ້ງປະຕິບັດນະໂຍບາຍຊຸກຍູ້ການບໍລິໂພກຢ່າງມີປະສິດທິຜົນ, ຕະຫຼາດບໍລິໂພກຈີນມີທ່ວງທ່າຟື້ນຟູຄືນໃໝ່ຢ່າງໝັ້ນທ່ຽງ.
ໃນ 6 ເດືອນຕົ້ນປີ 2023 ນີ້, ຍອດມູນຄ່າຂາຍຍ່ອຍເຄື່ອງບໍລິໂພກໃນຈີນ ມີເຖິງ 22.760 ຕື້ຢວນ ເພີ່ມຂຶ້ນ 8,2% ເມື່ອທຽບໃສ່ໄລຍະດຽວກັນຂອງປີ 2022, ມີຈັງຫວະໄວກວ່າໄຕມາດທີ 2 ເຖິງ 2,4%, ມູນຄ່າຂາຍຍ່ອຍຜ່ານທາງອິນເຕີເນັດມີເຖິງ 7.160 ຕື້ຢວນ ເພີ່ມຂຶ້ນ 13,1% ເມື່ອທຽບໃສ່ໄລຍະດຽວກັນຂອງປີຜ່ານມາ. ທ່ານ ເຊີ້ງຊິ່ວຜິງ ຮອງລັດຖະມົນຕີກະຊວງການຄ້າຈີນກ່າວວ່າ: ຄຽງຄູ່ກັບການຈັດຕັ້ງປະຕິບັດນະໂຍບາຍຕ່າງໆດ້ານການເປີດກວ້າງຄວາມຕ້ອງການພາຍໃນ ແລະ ການຊຸກຍູ້ການບໍລິໂພກຄາດວ່າໃນ 6 ເດືອນທ້າຍປີນີ້, ການບໍລິໂພກຈະສືບຕໍ່ມີທ່ວງທ່າຟື້ນຟູດີຂຶ້ນ ຈະເປັນບົດບາດພື້ນຖານຫຼາຍກວ່າເກົ່າຕໍ່ການພັດທະນາເສດຖະກິດ.
