ວິທະຍຸກະຈາຍສຽງຫວຽດນາມລາຍງານວ່າ: ວັນທີ 19 ກໍລະກົດ ຜ່ານມານີ້ ຢູ່ສຳນັກງານລັດຖະບານ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ຫົວໜ້າຄະນະຊີ້ນຳການປະຕິຮູບບໍລິຫານຂອງລັດຖະບານ (ຄະນະຊີ້ນຳ) ເປັນປະທານກອງປະຊຸມຄັ້ງທີ 5 ຂອງຄະນະຊີ້ນຳ.
ທ່ານ ຟ້າມມິງຈິງ ກ່າວຄຳເຫັນໃນກອງປະຊຸມເນັ້ນໜັກວ່າ: ຕ້ອງຊຸກຍູ້ການປະຕິຮູບບໍລິຫານ, ເພີ່ມທະວີການຈັດແບ່ງຂັ້ນ, ຈັດແບ່ງສິດອຳນາດ, ສ້າງກົງຈັກການຈັດຕັ້ງລັດໃຫ້ກະທັດຮັດ, ເຄື່ອນໄຫວຢ່າງມີປະສິດທິພາບ, ປະສິດທິຜົນ, ສືບຕໍ່ເປັນຈຸດສຸມ, ບຸກທະລຸຍຸດທະສາດໃນການສ້າງລັດແຫ່ງກົດ ໝາຍສັງຄົມນິຍົມ ຢູ່ ຫວຽດນາມ ໃນໄລຍະໃໝ່.
ໄລຍະຜ່ານມາ, ວຽກງານປະຕິຮູບດ້ານການບໍລິຫານ ໄດ້ຜັນຂະຫຍາຍຢ່າງຕັ້ງໜ້າ, ຄົບຊຸດ. ໝາກຜົນທີ່ບັນລຸໄດ້ ໄດ້ປະກອບສ່ວນສຳຄັນເຂົ້າໃນການຮັກສາສະຖຽນລະພາບ, ຟື້ນຟູ, ພັດທະນາເສດຖະກິດ – ສັງຄົມ ຂອງປະເທດຊາດ.
ໃນໄລຍະຈະມາເຖິງ, ທ່ານ ຟ້າມມິງຈິງ ຮຽກຮ້ອງໃຫ້ປະຕິບັດ 3 ຂົງເຂດບຸລິມະສິດ ໃນການປະຕິຮູບດ້ານການບໍລິຫານ, ລວມມີ ສຳຫຼວດກວດກາຄືນລະບົບເອກະສານນິຕິກຳ, ສຳຫຼວດກວດກາຄືນບັນດາລະບຽບການບໍລິຫານ, ສ້າງເງື່ອນໄຂໃຫ້ແກ່ການຊຸກຍູ້ການຜະລິດດຳເນີນທຸລະກິດ, ການທຳມາຫາກິນຂອງປະຊາຊົນ, ຖືປະຊາຊົນ, ວິສາຫະກິດເປັນໃຈກາງເພື່ອສຸມໃສ່ແກ້ໄຂບັນດາບັນຫາຕິດຂັດໃນປັດຈຸບັນ.
ທ່ານນາຍົກລັດຖະມົນຕີ ຍັງໄດ້ມອບໜ້າທີ່ລະອຽດໃຫ້ແກ່ບັນດາກະຊວງ, ຂະແໜງການ ແລະ ຫົວໜ່ວຍທີ່ກ່ຽວຂ້ອງເພື່ອຈັດຕັ້ງປະຕິບັດໂຄງການປະຕິຮູບດ້ານບໍລິຫານແຫ່ງລັດ ໄລຍະ 2021 – 2030 ຢ່າງມີປະສິດທິຜົນ, ເປັນຕົ້ນແມ່ນການປະຕິຮູບລະບຽບການບໍລິຫານຕິດພັນກັບການຫັນເປັນດີຈີຕອນ ໄດ້ຮັບການຊຸກຍູ້, ປະກອບສ່ວນປະຕິບັດບັນດາເປົ້າໝາຍ, ໜ້າທີ່ການເມືອງ, ເສດຖະກິດ – ສັງຄົມ ປີ 2023 ແລະ ໃນໄລຍະຈະມາເຖິງຢ່າງມີໄຊ.
