ຂ່າວຕ່າງປະເທດລາຍງານ ໃນວັນທີ 19 ກໍລະກົດ ຜ່ານມາ, ບໍລິສັດ ດັດຊະນີໜັງສືຜ່ານແດນເຮນລີ (Henley Passport Index : HPI) ຊຶ່ງເປັນບໍລິສັດທີ່ປຶກສາພົນລະເມືອງໂລກ ແລະ ບ່ອນຢູ່ອາໄສຂອງ ບໍລິສັດ Henley and Partner ແຫ່ງນະຄອນຫຼວງລອນດອນ ປະເທດອັງກິດ ໄດ້ປະກາດຜົນການຈັດອັນດັບໜັງສືຜ່ານແດນທີ່ມີອິດທິພົນຫຼາຍທີ່ສຸດໃນໂລກ ຄັ້ງຫຼ້າສຸດປະຈຳປີ 2023 ຊຶ່ງປະກົດວ່າ ໜັງສືຜ່ານແດນຂອງປະເທດສິງກະໂປຄອງແຊັມໜັງສືຜ່ານແດນທີ່ມີອິດທິພົນຫຼາຍທີ່ສຸດໃນໂລກປະຈຳປີ 2023.
ໂດຍຜູ້ທີ່ຖືໜັງສືຜ່ານແດນຂອງປະເທດສິງກະໂປ ກາຍມາເປັນໜັງສືຜ່ານແດນທີ່ມີອິດທິພົນອັນດັບທີ 1 ສາມາດເດີນທາງໄປຍັງ 193 ປະເທດ ທົ່ວໂລກ ຈາກທັງໝົດ 227 ປະເທດ ໂດຍບໍ່ຕ້ອງຂໍວີຊາ. ຫຼັກການໆຄັດເລືອກ ແລະ ຈັດອັນດັບຂອງ HPI ນັ້ນອາໄສຖານຂໍ້ມູນຈາກສະມາຄົມຂົນສົ່ງທາງອາກາດສາກົນ (IATA) ນຳມາຈັດອັນດັບໜັງສືຜ່ານແດນ 199 ອັນດັບຈາກທົ່ວໂລກ ໂດຍເນັ້ນໄປທີ່ຈຳນວນປະເທດທີ່ຜູ້ຖືໜັງສືຜ່ານແດນຂອງປະເທດໃດປະເທດໜຶ່ງສາມາດເຂົ້າເມືອງໄດ້ເລີຍ ໂດຍບໍ່ຕ້ອງຂໍວີຊາກ່ອນ ແລະ ຈະມີການອັບເດດຕະຫຼອດທັງປີ ເມື່ອມີການປ່ຽນແປງນະໂຍບາຍການຂໍວີຊາທີ່ສົ່ງຜົນກະທົບຕໍ່ການເຂົ້າປະເທດ.
ສຳລັບສິງກະໂປ ຊຶ່ງເປັນປະເທດທີ່ສາມາດຖືໜັງສືຜ່ານແດນສິງກະໂປເຂົ້າເມືອງໄດ້ເລີຍໂດຍບໍ່ຕ້ອງຂໍວີຊາອີກ 25 ປະເທດ. ສຳລັບ 10 ອັນດັບປະເທດທຳອິດຂອງໜັງສືຜ່ານແດນທີ່ມີອິດທິພົນທີ່ສຸດໃນໂລກຈາກການຈັດອັນດັບຂອງ HPI ໄດ້ແກ່: ໜຶ່ງ, ສິງກະໂປ; ສອງ, ເຢຍລະມັນ, ອີຕາລີ, ແອັສປາຍ; ສາມ, ໂອຕຣິດ, ແຟັງລັງ, ຝຣັ່ງ, ຍີ່ປຸ່ນ, ລຸກຊຳບວກ, ສ ເກົາຫຼີ, ຊູແອດ; ສີ່, ດານມາກ, ອຽກລັງ, ໂຮນລັງ, ອັງກິດ; ຫ້າ, ແບນຊິກ, ສ ເຊັກ, ມອນຕາ, ນູແວນເຊລັງ, ນອກແວ, ປັອກຕຸຍການ, ສະວິດ; ຫົກ, ອົສຕຣາລີ, ຮົງກາລີ, ໂປໂລຍ; ເຈັດ, ການາດາ, ເກຣັກ; ແປດ, ລິດຕົວນີ, ອາເມຣິກາ; ເກົ້າ, ລັດເວຍ, ສະໂລວາກີ, ສະໂລເວນີ ແລະ ສິບ, ເອສໂຕນີ, ອິດສະລັງ.
