ວິທະຍຸກະຈາຍສຽງຫວຽດນາມລາຍງານວ່າ: ວັນທີ 20 ກໍລະກົດ ຜ່ານມາ ຢູ່ທຳນຽບປະທານປະເທດ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ເປັນປະທານພິທີຕ້ອນຮັບ ທ່ານ Anwar Ibrahim ນາຍົກລັດຖະມົນຕີ ມາເລເຊຍ ພ້ອມດ້ວຍພັນລະນາ ຊຶ່ງພວມຢ້ຽມຢາມ ຫວຽດນາມ ຢ່າງເປັນທາງການໃນລະຫວ່າງວັນທີ 20 – 21 ກໍລະກົດ ນີ້. ພິທີຕ້ອນຮັບໄດ້ຈັດຂຶ້ນຢ່າງສົມກຽດ ຕາມພິທີການແກ່ຜູ້ນຳລັດຖະບານຕ່າງປະເທດທີ່ເດີນທາງມາຢ້ຽມຢາມ ຫວຽດນາມ ຢ່າງເປັນທາງການ.
ຂ່າວລະບຸວ່າ: ໃນການພົບປະສອງຝ່າຍພາຍຫຼັງພິທີຕ້ອນຮັບ, ທ່ານ ຟ້າມມິງຈິງ ແລະ ທ່ານ Anwar Ibrahim ໄດ້ເຫັນດີເປັນເອກະພາບເພີ່ມທະວີການແລກປ່ຽນພົບປະຄະນະຜູ້ແທນທຸກຂັ້ນ ໃນຊ່ອງທາງພັກ, ລັດຖະ ບານ ແລະ ລັດຖະສະພາ; ແລກປ່ຽນກັນເປັນປະຈຳ ຫຼື ປະຈຳໄລຍະ ພາຍໃຕ້ຮູບການຕ່າງໆຕາມຄວາມເໝາະສົມ ຢູ່ເວທີປາໄສຫຼາຍຝ່າຍ; ຊຸກຍູ້ກັນຜັນຂະຫຍາຍບັນດາກົນໄກຮ່ວມມືທາງດ້ານວິຊາການທີ່ໄດ້ລົງນາມແລ້ວໂດຍໄວ; ສູ້ຊົນນຳວົງເງິນການຄ້າສອງຝ່າຍບັນລຸ 18 ຕື້ໂດລາ ໃນປີ 2025 ຕາມທິດດຸ່ນດ່ຽງສະເໝີກັນ; ຈຳກັດການຈັດວາງຮົ້ວກີດຂວາງດ້ານການຄ້າ; ສ້າງຄວາມສະດວກໃນການນຳເຂົ້າສົ່ງອອກສິນຄ້າປະເພດຕ່າງໆ ຊຶ່ງສອງຝ່າຍມີທ່າແຮງ ແລະ ມີກຳລັງບົ່ມຊ້ອນ.
ສອງຝ່າຍກໍເຫັນດີເພີ່ມທະວີໃນຂົງເຂດປ້ອງກັນຊາດ, ປ້ອງກັນຄວາມສະຫງົບ ແລະ ຂົງເຂດອື່ນໆ; ຊຸກຍູ້ການລົງນາມໃນເອກະສານສະບັບຕ່າງໆທີ່ກ່ຽວຂ້ອງ. ນາຍົກລັດຖະມົນຕີສອງທ່ານ ກໍເນັ້ນໜັກເຖິງຄວາມສຳຄັນຂອງການຮ່ວມມືໃນທະເລ ແລະ ມະຫາສະໝຸດ; ພິຈາລະນາການສ້າງຕັ້ງກົນໄກປຶກສາຫາລື ກ່ຽວກັບບັນດາບັນຫາຢູ່ທະເລ ແລະ ສ້າງລະບົບຕິດຕໍ່ສື່ສານຕ້ານການຂຸດຄົ້ນສິນໃນນ້ຳຢ່າງຜິດກົດໝາຍ, ບໍ່ລາຍງານ ແລະ ບໍ່ຖືກຕ້ອງຕາມຂໍ້ກຳນົດ (IUU).
ສອງຝ່າຍເຫັນດີສົມທົບກັບບັນດາປະເທດ ອາຊຽນ ເພື່ອຮັບປະກັນຄວາມສາມັກຄີ ແລະ ຄວາມເປັນເອກະພາບໃນ ອາຊຽນ; ພ້ອມກັນສະເໜີບັນດາຂໍ້ລິເລີ່ມທີ່ເໝາະສົມ ເພື່ອປະຕິບັດບັນດາບຸລິມະສິດຂອງ ອາຊຽນ ປີ 2023 ໃຫ້ປະກົດຜົນເປັນຈິງ.
ພາຍຫຼັງການພົບປະສອງຝ່າຍ, ນາຍົກລັດຖະມົນຕີສອງທ່ານ ໄດ້ພ້ອມກັນເປັນສັກຂີພິຍານໃນພິທີລົງນາມໃນເອກະສານ ສອງສະບັບ ຊຶ່ງລວມມີ: ບົດບັນທຶກຊ່ວຍຈຳວ່າດ້ວຍຂໍ້ຕົກລົງກອງປະຊຸມຄັ້ງທີ 7 ຄະນະກຳມະການປະສົມກ່ຽວກັບການຮ່ວມມືດ້ານເສດຖະກິດ, ວິທະຍາສາດ ແລະ ເຕັກນິກ ແລະ ບົດບັນທຶກຊ່ວຍຈຳລະຫວ່າງສະຫະພັນການຄ້າ ແລະ ອຸດສາຫະກຳ ຫວຽດນາມ ແລະ ຫ້ອງການການຄ້າ ແລະ ອຸດສາຫະກຳແຫ່ງຊາດ ມາເລເຊຍ.
