ຂ່າວສານຊີອາໄອລາຍງານ ເມື່ອບໍ່ດົນມານີ້, ພິທີສະເຫຼີມສະຫຼອງຜົນສຳເລັດການກໍ່ສ້າງໂຮງງານບຳບັດນ້ຳເປື້ອນດາເຊີຄານດີ ຊຶ່ງເປັນໂຮງງານບຳບັດນ້ຳເປື້ອນແບບທັນສະໄໝຂະໜາດໃຫຍ່ແຫ່ງທຳອິດຂອງປະເທດບັງກລາເທດ ຈັດຂຶ້ນໂດຍເຈົ້າໜ້າທີ່ອາວຸໂສຂອງລັດຖະບານບັງກລາເທດ ໄດ້ຕີລາລາສູງຕໍ່ຈີນທີ່ຈັດຕັ້ງປະຕິບັດຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຊຶ່ງໄດ້ປະກອບສ່ວນເຂົ້າໃນການປັບປຸງສິ່ງແວດລ້ອມນິເວດກໍຄືຍົກສູງລະດັບຊີວິດການເປັນຢູ່ຂອງປະຊາຊົນບັງກລາເທດ.
ທ່ານນາງ ເໝົາໜິງ ໂຄສົກກະຊວງການຕ່າງປະເທດຈີນໄດ້ກ່າວຢືນຢັນໃນວັນທີ 19 ກໍລະກົດຜ່ານມາວ່າ: ສິ່ງນີ້ເປັນຕົວຢ່າງອີກອັນໜຶ່ງທີ່ຢັ້ງຢືນໃຫ້ເຫັນວ່າຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ໄດ້ສ້າງຜົນປະໂຫຍດໃຫ້ກັບປະເທດຄູ່ຮ່ວມມື. ທ່ານນາງ ເໝົາໜິງ ໃຫ້ຮູ້ວ່າ: ໂຮງງານບຳບັດນ້ຳເປື້ອນດາເຊີຄານດີ ເປັນໂຮງງານບຳບັດນ້ຳເປື້ອນແບບທັນສະໄໝຂະໜາດໃຫຍ່ແຫ່ງທຳອິດຂອງປະເທດບັງກລາເທດ ຍັງເປັນໂຮງງານບຳບັດນ້ຳເປື້ອນຈາກແຫຼ່ງນ້ຳເປື້ອນປະເພດດຽວທີ່ໃຫຍ່ທີ່ສຸດຢູ່ເຂດອາຊີໃຕ້ ນັບມາຮອດປັດຈຸບັນ ໂດຍສາມາດບຳບັດນ້ຳເປື້ອນຈາກຊີວິດປະຈຳວັນຂອງຊາວນະຄອນຫຼວງດາກາ ຈຳນວນ 5.000.000 ຄົນ ຊຶ່ງໄດ້ປັບປຸງຄຸນນະພາບຊີວິດຂອງປະຊາຊົນທ້ອງຖິ່ນແຫ່ງນີ້ໃຫ້ສູງຂຶ້ນຢ່າງຫຼວງຫຼາຍ. ທ່ານນາງ ເໝົາໜິງ ໃຫ້ຮູ້ຕື່ມວ່າ: ນັບແຕ່ຂໍ້ລິເລີ່ມໜຶ່ງແລວໜຶ່ງເສັ້ນທາງຖືກສະເໜີອອກມາເປັນເວລາ 10ປີມານີ້, ໄດ້ສ້າງວຽກເຮັດງານທຳຈຳນວນ 420.000 ຕຳແໜ່ງໃຫ້ກັບປະເທດຄູ່ຮ່ວມມື ແລະ ເຮັດໃຫ້ປະຊາຊົນເກືອບ 40.000.000 ຄົນ ໄດ້ຫຼຸດພົ້ນອອກຈາກຄວາມທຸກຍາກ. ບົດລາຍງານຄົ້ນຄວ້າຂອງທະນາຄານໂລກໄດ້ສະແດງໃຫ້ເຫັນວ່າ: ເມື່ອຮອດປີ 2030, ການຮ່ວມກັນສ້າງໜຶ່ງແລວໜຶ່ງເສັ້ນທາງ ຈະເຮັດໃຫ້ມູນຄ່າການຄ້າຂອງປະເທດທີ່ມີສ່ວນຮ່ວມເພີ່ມຂຶ້ນ 2,8%-9,7%, ມູນຄ່າການຄ້າທົ່ວໂລກຈະເພີ່ມຂຶ້ນ 1,7%-6,2% ແລະ ລາຍໄດ້ຂອງທົ່ວໂລກຈະເພີ່ມຂຶ້ນ 0,7%-2,9%.
