ທະນາຄານແຫ່ງ ສປປ ລາວ (ທຫລ) ໄດ້ຈັດກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ທຫລ ສະໄໝທີ IV ຂຶ້ນໃນລະຫວ່າງວັນທີ 19-20 ກໍລະກົດ ນີ້. ໂດຍການໃຫ້ກຽດເຂົ້າຮ່ວມ ຊີ້ນໍາກອງປະຊຸມໂດຍ ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສະພາແຫ່ງຊາດ, ໂດຍການເປັນປະທານຂອງສະຫາຍ ບຸນເຫຼືອ ສິນໄຊວໍຣະວົງ ເລຂາຄະນະບໍລິຫານງານພັກ ຜູ້ວ່າການທະນາຄານ ແຫ່ງ ສປປ ລາວ ຊຶ່ງມີ ຄະນະປະຈໍາພັກ, ຄະນະພັກຮາກຖານ, ຄະນະໜ່ວຍພັກຮາກຖານ, ສະມາຊິກພັກ ເຂົ້າຮ່ວມ.
ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ທຫລ ໃນຄັ້ງນີ້ເປັນຂີດໝາຍສຳຄັນຢ່າງຍິ່ງ ໃນການປະຕິບັດໜ້າທີ່ການເມືອງຢູ່ ອົງຄະນະພັກ ທຫລ. ພ້ອມນັ້ນ, ກໍໄດ້ມີການເຊື່ອມຊຶມກຳແໜ້ນ ເອກະສານສຳຄັນ ຂອງສູນກາງພັກ ເປັນຕົ້ນແມ່ນຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 268/ຄລສພ ລົງວັນທີ 20 ມັງກອນ 2023 ວ່າດ້ວຍການດຳເນີນກອງປະຊຸມຄົບຄະນະກາງສະໄໝຂອງຄະນະບໍລິຫານງານພັກແຕ່ລະຂັ້ນ; ມາດຕະຖານ, ສິດ ແລະ ໜ້າທີ່ຂອງຄະນະບໍລິຫານງານພັກກະຊວງ-ອົງການ ແລະ ຂໍ້ຫ້າມສຳລັບສະມາຊິກພັກ;
ກອງປະຊຸມໄດ້ທາບທາມ ຄວາມໄວ້ວາງໃຈຕໍ່ການນຳພາລວມ ແລະ ບຸກຄົນໃນຄະນະບໍລິຫານງານພັກ ທຫລ ສະໄໝທີ IV. ພ້ອມກັນນີ້, ໄດ້ລົງເລິກຕີລາຄາ ແລະ ປະກອບຄວາມຄິດຄວາມເຫັນຕໍ່ບົດສະຫຼຸບ ການນໍາພາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IV ຂອງຕົນ ແລະ ຍຸດທະສາດພັດທະນາລະບົບສະຖາບັນການເງິນ-ເງິນຕາ 5 ປີ ຕິດພັນກັບການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໃນໄລຍະເຄິ່ງສະໄໝຜ່ານມາ ແລະ ການຈັດຕັ້ງປະຕິບັດ 2 ວາລະແຫ່ງຊາດ ໂດຍສະເພາະວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເພື່ອຍົກໃຫ້ເຫັນດ້ານດີ-ຜົນງານທີ່ຈະຕ້ອງເສີມຂະຫຍາຍ, ດ້ານອ່ອນ-ຂໍ້ຄົງຄ້າງທີ່ຈະຕ້ອງສຸມໃສ່ລົງເລິກ ປັບປຸງແກ້ໄຂ, ພ້ອມທັງຄົ້ນຄວ້າກຳນົດທິດທາງແຜນການຈັດຕັ້ງປະຕິບັດ ໃນອີກເຄິ່ງສະໄໝຕໍ່ໜ້າໃຫ້ແທດເໝາະກັບຄວາມສາມາດບົ່ມຊ້ອນ, ກຳລັງແຮງທີ່ມີ ແລະ ໃຫ້ບັນລຸແຜນການໄດ້ ເມື່ອຮອດທ້າຍສະໄໝ, ນອກຈາກນີ້, ຍັງຈະມີການດຳເນີນຊີວິດການເມືອງກາງສະໄໝ ພາຍໃນຄະນະບໍລິຫານງານພັກ ທຫລ ສະໄໝທີ IV ເພື່ອສຳຫຼວດກວດກາຄວາມຮັບຜິດຊອບລວມ ແລະ ຂອງບຸກຄົນໃນຄະນະບໍລິຫານງານພັກ ເພື່ອເປັນການເສີມຂະຫຍາຍດ້ານຕັ້ງໜ້າ ແລະ ປັບປຸງແກ້ໄຂ ດ້ານອ່ອນ-ຂໍ້ບົກຜ່ອງທີ່ມີ ໃຫ້ມີການຫັນປ່ຽນທີ່ຕັ້ງໜ້າ ແລະ ເປັນການປັບປຸງກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ຢ່າງແທ້ຈິງ.
ພ້ອມນີ້, ສະຫາຍ ໄຊສົມພອນ ພົມວິຫານ ກໍໄດ້ຍົກບາງບັນຫາເພື່ອເນັ້ນໜັກໃຫ້ ທຫລ ສືບຕໍ່ໃນການຈັດຕັ້ງປະຕິບັດໃນຕໍ່ໜ້າຄື:
ໜຶ່ງ: ໃນສະພາບເງື່ອນໄຂທີ່ມີທັງຄວາມຫຍຸ້ງຍາກ, ມີທັງສິ່ງທ້າທາຍທົດສອບ ຄະນະບໍລິຫານງານພັກ ທຫລ ຕ້ອງພ້ອມກັນສືບຕໍ່ເອົາໃຈໃສ່ ຢ່າງໃກ້ຊິດຕິດແທດ, ນໍາພາການສຶກສາອົບຮົມການເມືອງ-ແນວຄິດ ໃຫ້ຖັນແຖວ ພະນັກງານ-ສະມາຊິກພັກ ຂອງຕົນໃຫ້ເປັນປົກກະຕິຕໍ່ເນື່ອງ, ກຳແໜ້ນໄດ້ແນວທາງ, ນະໂຍບາຍ ຂອງພັກ, ກົດໝາຍຂອງລັດ, ມະຕິ, ຄໍາສັ່ງຕ່າງໆ ຂອງຂັ້ນເທິງ ກໍຄືລະບຽບການພາຍໃນ ແລະ ຫຼັກການວິຊາ ສະເພາະຂອງທະນາຄານ ບົນພື້ນຖານເຫັນໄດ້ບັນຫາ, ເຫັນໄດ້ທີ່ຕັ້ງ, ພາລະບົດບາດ ແລະ ຄວາມຮັບຜິດຊອບການເມືອງອັນສູງສົ່ງ ຂອງຕົນທີ່ພັກ-ລັດ ແລະ ປະຊາຊົນມອບໝາຍໃຫ້, ມີຄວາມທຸ່ນທ່ຽງຜ່ານຜ່າອຸປະສັກຕ່າງໆໃຫ້ໄດ້, ຮັບປະກັນຄຸນທາດການເມືອງໜັກແໜ້ນ, ນໍ້າໃຈຮັກຊາດ, ເສຍສະຫຼະເຫັນແກ່ຜົນປະໂຫຍດສ່ວນລວມ ເປັນທີ່ຕັ້ງ, ມີທັດສະນະຮັບໃຊ້ປະຊາຊົນຢ່າງຖືກຕ້ອງ. ຕີຖອຍ ແລະ ແກ້ໄຂບັນຫາການເສື່ອມຖອຍດ້ານແນວຄິດ, ປະກົດການຫຍໍ້ທໍ້, ພຶດຕິກໍາທີ່ເປັນການສໍ້ລາດບັງຫຼວງໃນຖັນແຖວສະມາຊິກພັກ-ພະນັກງານ ໃຫ້ເຂັ້ມງວດ, ຂາດຕົວ ແລະ ທັນການ; ເອົາໃຈໃສ່ແກ້ໄຂແນວຄິດຈຸ້ມເຈື້ອ-ເຊື້ອສາຍ, ຄວາມບໍ່ໂປ່ງໃສ, ຍົກສູງສະຕິເຄົາລົບ ແລະ ປະຕິບັດກົດໝາຍ, ລະບຽບການຂອງລັດໃນຖັນແຖວພະນັກງານການນຳ, ພະນັກງານ-ສະມາຊິກພັກ ຢູ່ແຕ່ລະຂັ້ນ;
ສອງ: ເພີ່ມທະວີຄວາມສາມັກຄີເປັນເອກະພາບພາຍໃນຄະນະພັກໃຫ້ໜັກແໜ້ນ ໂດຍສະເພາະຄວາມເປັນເອກະພາບ-ຄວາມຕັດສິນໃຈໃນການປັບປຸງກົງຈັກ, ແກ້ໄຂບັນຫາພະນັກງານ, ເອົາໃຈໃສ່ປັບປຸງລະບົບການເມືອງໃຫ້ໜັກແໜ້ນ, ຍົກສູງບົດບາດການນຳພາຂອງຄະນະພັກ, ກໍ່ສ້າງ ແລະ ປັບປຸງຮາກຖານພັກໃຫ້ປອດໃສ, ເຂັ້ມແຂງ, ໜັກແໜ້ນ ຕິດພັນກັບການປັບປຸງອົງການຈັດຕັ້ງມະຫາຊົນ ໃຫ້ຮູ້ເຄື່ອນໄຫວປະຕິບັດພາລະບົດບາດ ແລະ ໜ້າທີ່ຂອງຕົນ ໂດຍສະເພາະແມ່ນການປະຕິບັດຂໍ້ແຂ່ງຂັນ ຂອງຕົນຕິດພັນຂະບວນການແຂ່ງຂັນຮັກຊາດ ແລະ ພັດທະນາ ຂອງ ທຫລ ໃຫ້ສົມກັບເປັນແກນນໍາໃນລະບົບການເມືອງຢ່າງແທ້ຈິງ.
ສາມ: ເອົາໃຈໃສ່ປັບປຸງແບບແຜນນຳພາ-ວິທີເຮັດວຽກໃຫ້ຄ່ອງຕົວກວ່າເກົ່າ, ໃຫ້ມີການປະສົມປະສານລະຫວ່າງ ຫຼັກການລວມສູນປະຊາທິປະໄຕ ກັບຫຼັກການນໍາພາ ທີ່ແທດກັບສະພາບຈຸດພິເສດຕົວຈິງ ຂອງທະນາຄານ, ປັບປຸງການບໍລິຫານລັດໄປຕາມກົດໝາຍ ແລະ ລະບຽບການຢ່າງເຂັ້ມງວດ, ມີການຕິດຕາມ, ກວດກາ, ຊຸກຍູ້ຊີ້ນໍາການຈັດຕັ້ງປະຕິບັດ ແລະ ປະເມີນຜົນເປັນປະຈຳ. ປະຕິບັດລະບອບສ່ອງແສງລາຍງານ ໃນການເຄື່ອນໄຫວວຽກງານ ກໍຄືການແກ້ໄຂບັນຫາທີ່ເກີດຂຶ້ນຢູ່ແຕ່ລະຮາກຖານພັກ, ກົມກອງ ແລະ ໃນສັງຄົມໃຫ້ແທດເຖິງຕົວຈິງ ແລະ ທັນກັບສະພາບການ.
ສີ່: ເອົາໃຈໃສ່ປັບປຸງກົງຈັກການຈັດຕັ້ງທຸກຂັ້ນ ໄປຕາມທິດກະທັດຮັດ ແລະ ມີປະສິດທິພາບ; ເພີ່ມທະວີວຽກງານບຳລຸງກໍ່ສ້າງພະນັກງານ ໂດຍສະເພາະພະນັກງານວິຊາການ ໃນແຕ່ລະຂົງເຂດ, ແຕ່ລະຕໍາແໜ່ງງານ ໃຫ້ສອດຄ່ອງກັບການເລັ່ງທວງຂອງສະພາບການໃນໄລຍະໃໝ່; ເອົາໃຈໃສ່ຄຸ້ມຄອງ-ນຳໃຊ້ພະນັກງານໃຫ້ດີ, ນໍາໃຊ້ໃຫ້ຖືກກັບວິຊາສະເພາະ, ຖືກກັບຄວາມຮູ້-ຄວາມສາມາດ, ຖືກກັບພອນສະຫວັນ ຂອງແຕ່ລະຄົນຢ່າງເໝາະສົມ, ຊຸກຍູ້ສົ່ງເສີມພະນັກງານຜູ້ທີ່ມີຄຸນທາດການເມືອງໜັກແໜ້ນ, ມີຄວາມຕັ້ງຕໍ່ບໍລິສຸດຕໍ່ພັກ-ລັດ ແລະ ປະຊາຊົນ, ມີນໍ້າໃຈເສຍສະຫຼະສູງ, ມີຈິດໃຈຮັບໃຊ້ປະເທດຊາດ ແລະ ປະຊາຊົນ, ຜ່ານການທົດສອບຈາກຂະບວນວຽກງານຕົວຈິງ, ມີຫົວຄິດປະດິດສ້າງ ແລະ ມີຜົນງານຜົນສຳເລັດໃນໜ້າທີ່ໆຖືກມອບໝາຍໃຫ້ ເພື່ອສ້າງເປັນຜູ້ສືບທອດປ່ຽນແທນທີ່ມີຄຸນນະພາບ.
ຫ້າ: ສືບຕໍ່ເພີ່ມທະວີ ຄວາມເປັນເຈົ້າການຕິດຕາມ, ກວດກາ ແລະ ຊຸກຍູ້ການຜັນຂະຫຍາຍ ແລະ ຈັດຕັ້ງປະຕິບັດ ມະຕິ, ຄຳສັ່ງຂອງພັກ, ກົດໝາຍ ແລະ ລະບຽບການຂອງລັດຢ່າງໃກ້ຊິດ ແລະ ເປັນປະຈຳ ເອົາໃຈໃສ່ວຽກງານກວດກາ, ສະກັດກັ້ນ ແລະ ຕ້ານການສໍ້ລາດບັງຫຼວງ ກໍຄືແກ້ໄຂຜົນຂອງການກວດສອບ, ຜົນຂອງການກວດກາໃຫ້ທັນກັບສະພາບການ, ເຂັ້ມງວດ ແລະ ຂາດຕົວ.
ຫົກ: ສືບຕໍ່ສຸມໃສ່ແກ້ໄຂບັນຫາ-ຂໍ້ຄົງຄ້າງຕ່າງໆໃນການປະຕິບັດວຽກງານວິຊາສະເພາະ ທີ່ໄດ້ຍົກຂຶ້ນໃນກອງປະຊຸມກາງສະໄໝ ຂອງຄະນະທະນາຄານ ໃນຄັ້ງນີ້ ເປັນຕົ້ນແມ່ນ: ວຽກງານນະໂຍບາຍເງິນຕາ ແລະ ຄຸ້ມຄອງເງິນຕາຕ່າງປະເທດ ໂດຍສະເພາະຄວາມຜັນຜວນຂອງອັດຕາແລກປ່ຽນ, ເງິນກີບອ່ອນຄ່າຢ່າງຕໍ່ເນື່ອງ ແລະ ຢູ່ໃນຈັງຫວະທີ່ໄວ ຊຶ່ງເຮັດໃຫ້ເງິນເຟີ້ເພີ່ມຂຶ້ນໃນລະດັບທີ່ສູງສຸດ ໃນຮອບ 2 ທົດສະວັດ, ພວກສະຫາຍ ຕ້ອງໄດ້ສົມທົບກັບກະຊວງ ປ້ອງກັນຄວາມສະຫງົບ ແລະ ພາກສ່ວນກ່ຽວຂ້ອງ ເຂັ້ມງວດການປະຕິບັດກົດ ໝາຍຄຸ້ມຄອງເງິນຕາຕ່າງປະເທດ, ເຂັ້ມງວດໃນການຕິດຕາມ, ກວດກາ ແລະ ເດັດຂາດປະຕິບັດມາດຕະການ ຕໍ່ຜູ້ລະເມີດລະບຽບການ, ການແລກປ່ຽນຊະຊາຍ, ການເກັງກຳໄລ ແລະ ອື່ນໆ ຢ່າງເຂັ້ມງວດ, ເດັດຂາດ, ບໍ່ຍົກເວັ້ນ. ພ້ອມນັ້ນ, ໃຫ້ເພີ່ມທະວີປະສານສົມທົບກັບບັນດາຂະແໜງການກ່ຽວຂ້ອງ ເພື່ອຮ່ວມກັນຄົ້ນຄວ້າ, ແກ້ໄຂຄວາມຫຍຸ້ງຍາກທາງດ້ານເສດຖະກິດ, ການເງິນ-ເງິນຕາ ໃຫ້ສອດຄ່ອງກົມກຽວກັນ ແລະ ເປັນລະບົບ ເພື່ອສ້າງພື້ນຖານໃຫ້ແກລະບົບເສດຖະກິດແຫ່ງຊາດ ມີຄວາມໜັກແໜ້ນ ແລະ ໃຫ້ໄດ້ຕາມມະຕິຂອງກອງປະຊຸມສະພາແຫ່ງຊາດ ໃນແຕ່ລະໄລຍະ ແລະ ແຜນງານ, ໂຄງການຂອງທະນາຄານວາງອອກ. ນອກຈາກນີ້ກໍມີວຽກງານອື່ນໆ ທີ່ປິ່ນອ້ອມໃນວຽກງານທະນາຄານ.
ເຈັດ: ສືບຕໍ່ເພີ່ມທະວີການພົວພັນຮ່ວມມືກັບຕ່າງປະເທດ, ຍາດແຍ່ງດຶງດູດການຊ່ວຍເຫຼືອ, ຮ່ວມມື ແລະ ລົງທຶນ ຈາກບັນດາຄູ່ຮ່ວມພັດທະນາ, ປະເທດເພື່ອນມິດ ກໍຄືອົງການຈັດຕັ້ງສາກົນຕ່າງໆ, ທຸກພາກສ່ວນທຸລະກິດທັງພາຍໃນ ແລະ ຕ່າງປະເທດ ໃຫ້ນັບມື້ເພີ່ມຂຶ້ນຕິດພັນກັບການແກ້ໄຂບັນດາຂອດຂັ້ນການບໍລິການ, ສ້າງເງື່ອນໄຂເອື້ອອຳນວຍຄວາມສະດວກ ແລະ ນະໂຍບາຍຊຸກຍູ້ສົ່ງເສີມການດຶງດູດເອົາການລົງທຶນໃຫ້ແຂງແຮງ ແລະ ສືບຕໍ່ຍາດແຍ່ງການຊ່ວຍເຫຼືອດ້ານວິຊາການ ໃນຂອບສອງຝ່າຍ, ຫຼາຍຝ່າຍ ແນ່ໃສ່ສ້າງກໍາລັງແຮງ ໃນການຈັດຕັ້ງປະຕິບັດຍຸດທະສາດພັດທະນາລະບົບສະຖາບັນການເງິນ ຂອງ ທຫລ ກໍຄື ນະໂຍບາຍເຊື່ອມໂຍງເສດຖະກິດ ຂອງ ສປປ ລາວ ໃຫ້ບັນລຸຜົນສຳເລັດ.
ຂ່າວ-ພາບ: ທຫລ
