ກະຊວງສຶກສາທິການ ແລະ ກິລາ ຮ່ວມກັບ ອົງການອາຫານໂລກປະຈຳລາວ ຈັດເຜີຍແຜ່ດຳລັດ ວ່າດ້ວຍການສົ່ງເສີມອາຫານທ່ຽງໃນ ສປປ ລາວ ໃນວັນທີ 21 ກໍລະກົດ 2023 ທີ່ນະຄອນຫລວງວຽງຈັນ ໂດຍການເປັນປະທານຂອງ ທ່ານນາງ ຂັນທະລີ ສິຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີຜູ້ຕາງໜ້າຈາກພາກສ່ວນທີ່ກ່ຽວຂ້ອງ ເຂົ້າຮ່ວມ.
ດຳລັດ ວ່າດ້ວຍ ການສົ່ງເສີມອາຫານທ່ຽງໃນໂຮງຮຽນ ໄດ້ພັດທະນາ ແລະ ຮັບຮອງໃນວັນທີ 11 ສິງຫາ 2022 ແລະ ມີຜົນສັກສິດໃນການນຳໃຊ້ ໃນວັນທີ 15 ສິງຫາ 2023 ຊຶ່ງເປັນນິຕິກຳໜຶ່ງທີ່ສຳຄັນ ໃນການປະກອບສ່ວນລົງທຶນໃສ່ວຽກງານພັດທະນາຊັບພະຍາກອນມະນຸດ, ກະຊວງຍຸຕິທໍາ ໄດ້ອອກຈົດໝາຍເຫດໃນເວັບໄຊ ກ່ຽວກັບດຳລັດດັ່ງກ່າວ ໃນວັນທີ20 ຕຸລາ 2022, ມີໜັງສືອະນຸມັດການພິມ ໃນວັນທີ 16 ເດືອນພະຈິກ 2022, ໂດຍຕອບສະໜອງຕໍ່ການສະເໜີຂອງສູນສົ່ງເສີມການສຶກສາຮຽນຮ່ວມ, ກະຊວງສຶກສາທິການ ແລະ ກິລາ, ອົງການອາຫານໂລກ ປະຈຳ ສປປ ລາວ ໄດ້ດຳເນີນຂະບວນການຈັດຊື້ຈັດຈ້າງການພິມດຳລັດດັ່ງກ່າວ ແລະ ສຳເລັດໃນກາງເດືອນມີນາ 2023 ໂດຍໄດ້ຮັບການສະໜັບສະໜູນຈາກ ອົງການອາຫານໂລກ ແລະ ອົງການບັນເທົາທຸກກາໂຕລິກ ປະຈຳ ສປປ ລາວ. ນິຕິກຳດັ່ງກ່າວ, ເປັນບາດກ້າວໃໝ່ທີ່ສຳຄັນ, ເປັນການຢັ້ງຢືນ ເຖິງຄໍາໝັ້ນສັນຍາຂອງລັດຖະບານ ທີ່ເຮັດໃຫ້ວຽກງານການສົ່ງເສີມອາຫານທ່ຽງໃນໂຮງຮຽນມີຄວາມຍືນຍົງ ແລະ ເປັນການຮ່ວມມືລະຫວ່າງ ຄູ່ຮ່ວມພັດທະນາ ໃນການເສີມສ້າງຄວາມເຂັ້ມແຂງທາງດ້ານນິຕິກໍາ.
ການເຜີຍແຜ່ ເນື້ອໃນນິຕິກຳຄັ້ງນີ້, ຍັງເປັນຂີດໝາຍສໍາຄັນຍິ່ງໃນການຮ່ວມມືກັນ ລະຫວ່າງ ລັດຖະ ບານ ສປປ ລາວ ແລະ ຄູ່ຮ່ວມພັດທະນາທີ່ກ່ຽວຂ້ອງ ກ່ຽວກັບການສົ່ງເສີມການສຶກສາຮຽນຮ່ວມ, ອາຫານໂພຊະນາການໃນໂຮງຮຽນ ແລະ ໃຫ້ນັກຮຽນມີສຸຂະພາບແຂງແຮງ ໂດຍມີເປົ້າໝາຍຂະຫຍາຍໄປທົ່ວປະເທດໃນອະນາຄົດ, ພ້ອມນີ້ຍັງ ຊ່ວຍປັບປຸງບັນດາຕົວຊີ້ບອກຂອງການສຶກສາໄດ້ດີຂຶ້ນເທື່ອລະກ້າວ ລວມທັງການຊຸກຍູ້ ແລະ ແກ້ໄຂບັນຫາພຶດຕິກໍາການກິນໃຫ້ຖືກຫລັກໂພຊະນາການ ໂດຍຜ່ານການຊຸກຍູ້ສົ່ງເສີມໃຫ້ມີການຮຽນຮູ້ ດ້ານການຜະລິດກະສິກຳໃນໂຮງຮຽນ, ໃນຊຸມຊົນ, ການປຸງແຕ່ງໃຫ້ຖືກຫລັກໂພຊະນາການ, ການແປຮູບອາຫານ, ສຸຂາພິບານ, ສຸຂະອະນາໄມ ເພື່ອໃຫ້ນັກຮຽນ ໄດ້ຮຽນ ຮູ້ແຕ່ເຍົາໄວ ແລະ ແນໃສ່ຖ່າຍທອດການຮຽນຮູ້ຈາກນັກຮຽນ, ໂຮງຮຽນ ໄປສູ່ຄອບຄົວ ແລະ ຊຸມຊົນເທື່ອລະກ້າວ.
ຂ່າວ-ພາບ: ວຽງສະຫວັນ
