El Pais, ສື່ມວນຊົນຝຣັ່ງ ໄດ້ເຜີຍແຜ່ຂ່າວວ່າ ຄີລຽນ ເອັມບັບເປ ກອງໜ້າຂອງ ປາຣີ ແຊງ-ແຊກແມງ (PSG) ຈະໄດ້ຮັບເງິນໂບນັດກວ່າ 51 ລ້ານປອນ ຫາກຕົກລົງທີ່ຈະຂະຫຍາຍສັນຍາກ່ອນທ້າຍເດືອນນີ້.
ເອັມບັບເປ ກໍາລັງຈະໝົດສັນຍາໃນລະດູຮ້ອນໜ້າ ແລະ ກ່ອນໜ້ານີ້, ເຂົາໄດ້ແຈ້ງໄປຍັງສະໂມສອນແລ້ວວ່າ ບໍ່ຕ້ອງການຂະຫຍາຍສັນຍາສະບັບໃໝ່.
ຕອນນີ້ ສະຖານະການຍັງຄົງບໍ່ມີຄວາມແນ່ນອນ ເພາະວ່າ “PSG” ກໍບໍ່ຕ້ອງການທີ່ຈະສູນເສຍເຂົາໄປແບບບໍ່ມີຄ່າຕົວ ໃນຂະນະທີ່ນັກເຕະອາດຈະລໍຖ້າຈົນກ່ວາໃຫ້ໝົດສັນຍາກ່ອນທີ່ຈະຍ້າຍໄປ ຣິວ ມາດຣິດ ແບບໄຮ້ສັງກັດໃນປີໜ້າ.
ແຕ່ບໍ່ວ່າຈະເລືອກທາງໃດ ກອງໜ້າທີມຊາດຝຣັ່ງ ກໍກຽມຮັບຊັບກ້ອນໃຫຍ່ ເພາະເຂົາຈະໄດ້ຮັບເງິນຫຼາຍກວ່າ 68 ລ້ານປອນເປັນຄ່າຄວາມພັກດີ ຫາກຢູ່ກັບທີມໃນປີໜ້າ.
ບໍ່ພຽງເທົ່ານັ້ນ ແຊັມລີກ 1 ພ້ອມທີ່ຈະຈ່າຍໂບນັດຫຼາຍກວ່າ 51 ລ້ານປອນ ຫາກດາວຍິງຊາວຝຣັ່ງລົງນາມໃນສັນຍາໃໝ່ກ່ອນວັນທີ 31 ກໍລະກົດ.
ຕອນນີ້ ທີມງານຈາກປາຣີ ກໍາລັງພະຍາຍາມຊຸກຍູ້ຢ່າງໜັກໃຫ້ອະດີດກອງໜ້າ ອາແອສ ໂມນາໂກ ເພື່ອຝາກອະນາຄົດຂອງເຂົາໄວ້ກັບສະໂມສອນ ແຕ່ກໍຍັງບໍ່ມີອັນໃດຄືບໜ້າຈົນເຖິງປັດຈຸບັນນີ້.
ເອັມບັບເປ ຈະກັບມາລາຍງານຕົວຝຶກຊ້ອມກ່ອນລະດູການ ພາຍໃຕ້ການນໍາທີມຂອງ ຫຼຸຍ ເອັນຣິເກ ຜູ້ຈັດການຄົນໃໝ່ໃນໄລຍະທ້າຍເດືອນ ເຊິ່ງຄາດວ່າສະຖານະການອາດມີພັດທະນາຫຼາຍຂື້ນໃນເວລານັ້ນ.
