ຫວ່າງບໍ່ດົນມານີ້, ຂ່າວສານ AP ຂອງອາເມຣິກາໄດ້ເຜີຍແຜ່ບົດຄວາມທີ່ມີຊື່ວ່າ “ເງິນກູ້ຢືມຈາກຈີນເຮັດໃຫ້ປະເທດທຸກຍາກທີ່ສຸດຢູ່ໃນໂລກເກືອບລົ້ມລະລາຍ”, ເຊິ່ງໄດ້ໃສ່ຮ້າຍປ້າຍສີອີກເທື່ອໜຶ່ງວ່າຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນເຮັດໃຫ້ປະເທດຕ່າງໆຢູ່ລຽບຕາມເສັ້ນທາງຕົກຢູ່ໃນ “ກັບດັກໜີ້ສິນ”.
ຄວາມຈິງແມ່ນຫຍັງແທ້? ບົດຄວາມຈາກຂ່າວສານ AP ໄດ້ຕຳໜິຈີນສ້າງອັນທີ່ເອີ້ນວ່າ “ກັບດັກໜີ້ສິນ”, ໂດຍອ້າງວ່າປາກິດສະຖານ, ສີລັງກາ, ເຄັນຢາເປັນຕົ້ນ “ປະເທດໄດ້ຮັບເຄາະຮ້າຍ”, ແຕ່ວ່າຄວາມຈິງບໍ່ເປັນແນວນັ້ນ. ອີງຕາມຕົວເລກຂອງຝ່າຍທາງການ, ນັບມາຮອດເດືອນເມສາປີ 2023 ນີ້, ຍອດມູນຄ່າໜີ້ສິນພາຍນອກຂອງປາກິດສະຖານມີຈຳນວນ 125,702 ຕື້ໂດລາ, ໃນນັ້ນເງິນກູ້ຢືມຈາກຈີນແມ່ນ 20,375 ຕື້ໂດລາ, ກວມພຽງແຕ່ 16,2% ຂອງຍອດມູນຄ່າໜີ້ສິນພາຍນອກຂອງປາກິດສະຖານເທົ່ານັ້ນ;
ນັບມາຮອດເດືອນມີນາປີ 2023 ນີ້, ສີລັງກາມີໜີ້ສິນພາຍນອກຈຳນວນ 27,6 ຕື້ໂດລາ, ໃນນັ້ນເຈົ້າໜີ້ສ່ວນບຸກຄົນໄດ້ກວມອັດຕາສ່ວນຫຼາຍທີ່ສຸດ, ຢູ່ໃນລະດັບ 53,6%, ເຈົ້າໜີ້ຫຼາຍຝ່າຍໄດ້ກວດອັດຕາສ່ວນ 20,7%, ສ່ວນຈີນແມ່ນກວມ ພຽງແຕ່ 10,9% ເທົ່ານັ້ນ; ນັບມາຮອດເດືອນມີນາປີ 2023 ນີ້, ຍອດມູນຄ່າໜີ້ິ້ສິນພາຍນອກຂອງເຄັນຢາມີຈຳນວນ 36,66 ຕື້ໂດລາ, ໃນນັ້ນໜີ້ສິນ 46,3% ແມ່ນມາຈາກກອງທຶນການເງິນສາກົນຫຼື IMF ,ທະນາຄານໂລກແລະສະຖາບັນການເງິນຫຼາຍຝ່າຍອື່ນໆ, ສ່ວນໜີ້ສິນທີ່ມາຈາກອົງກອນຕ່າງໆຂອງຈີນແມ່ນກວມພຽງແຕ່ 17,2% ເທົ່ານັ້ນ.
ການດຳເນີນນະໂຍບາຍເງິນຕາທີ່ບໍ່ມີຄວາມຮັບຜິດຊອບຂອງອາເມຣິກາແມ່ນສາເຫດທີ່ແທ້ຈິງໃນການເກີດບັນຫາໜີ້ສິນແບບໂຮມສູນຂອງບັນດາປະເທດພວມພັດທະນາ. ອາເມຣິກາດຳເນີນນະໂຍບາຍຜ່ອນຄາຍທາງປະລິມານຂອງເງິນຕາກ່ອນ, ເຮັດໃຫ້ເງິນໂດລາທີ່ມີດອກເບ້ຍຕ່ຳໄຫຼເຂົ້າໄປໃນທະວີບອາຟຣິກາແລະປະເທດຕະຫຼາດຈະເລີນໃໝ່ຢ່າງຫຼວງຫຼາຍ, ແລ້ວຂຶ້ນດອກເບ້ຍຢ່າງໄວວາ, ດຶງດູດໃຫ້ເງິນໂດລາກັບຄືນສູ່ອາເມຣິກາ, ເຮັດໃຫ້ສະພາບຄ່ອງຂອງເງິນຕາຢູ່ປະເທດພວມພັດທະນາບໍ່ພຽງພໍ, ຕ່ອງໂສ້ທຶນຖືກຕັດຂາດ, ເງິນຕາອ່ອນຄ່າ, ຄວາມກົດດັນດ້ານການໄຊ້ໜີ້ສິນທີ່ຄິດໄລ່ດ້ວຍເງິນໂດລາສູງຂຶ້ນຢ່າງວ່ອງໄວ.
ເວົ້າເຖິງກົກເຫງົ້າແລ້ວ, ການໄຊ້ໜີ້ສິນຍັງຕ້ອງອາໄສການພັດທະນາເສດຖະກິດ. ການແກ້ໄຂບັນຫາໜີ້ສິນຂອງປະເທດພວມພັດທະນາບໍ່ພຽງແຕ່ຕ້ອງໃຊ້ມາດຕະການຊຳລະໜີ້ສິນເທົ່ານັ້ນ, ຍິ່ງຕ້ອງຍົກສູງຄວາມສາມາດພັດທະນາແບບຍືນຍົງຂອງຕົນ. ພາຍໃຕ້ຂອບການຮ່ວມມື “ໜຶ່ງແລວໜຶ່ງເສັ້ນທາງ”, ຈີນໄດ້ສະໜອງເງິນກູ້ໃຫ້ກັບປະເທດພວມພັດທະນາ, ຕົ້ນຕໍໃຊ້ເຂົ້າໃນການກໍ່ສ້າງພື້ນຖານໂຄງລ່າງ ແລະ ການພັດທະນາອຸດສາຫະກຳຂອງປະເທດພວມພັດທະນາ, ເຊິ່ງມີຜົນດີຕໍ່ການປັບປຸງເງື່ອນໄຂພື້ນຖານຂອງການພັດທະນາເສດຖະກິດ, ເພີ່ມຄວາມສາມາດ “ສ້າງເລືອດ”ໃນເສດຖະກິດ.
ຕາມຜົນການສຳຫຼວດທີ່ກ່ຽວຂ້ອງສະແດງໃຫ້ເຫັນວ່າ, ນັບແຕ່ການສະເໜີຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ເປັນເວລາ 10 ປີມານີ້, ໄດ້ຊຸກຍູ້ການລົງທຶນເປັນມູນຄ່າເກືອບ 1000 ຕື້ໂດລາສະຫະລັດ, ສ້າງໂຄງການຮ່ວມມື 3000 ກວ່າໂຄງການ, ສ້າງຕຳແໜ່ງວຽກເຮັດງານທຳ 420.000 ຕຳແໜ່ງໃຫ້ກັບປະເທດທີ່ຢູ່ລຽບຕາມໜຶ່ງແລວໜຶ່ງເສັ້ນທາງ, ເຮັດໃຫ້ເກືອບ 40 ລ້ານຄົນຫຼຸດພົ້ນອອກຈາກຄວາມທຸກຍາກ.
ຂ່າວ;ພາບ: cri
