ຂ່າວສານຊີອາໄອລາຍງານ ໃນວັນທີ 17 ກໍລະກົດ ຜ່ານມາ, ໃນກອງປະຊຸມຖະແຫຼງຂ່າວທີ່ ຄະນະລັດຖະບານຈີນຈັດຂຶ້ນ ທ່ານ ຟູ້ຫຼີງຮຸ່ຍ ໂຄສົກອົງການສະຖິຕິແຫ່ງຊາດຈີນໃຫ້ຮູ້ວ່າ: ນັບແຕ່ຕົ້ນປີ 2023 ເປັນຕົ້ນມາ, ຄຽງຄູ່ກັບເສດຖະກິດ-ສັງຄົມ ໄດ້ຟື້ນຟູການເຄື່ອນໄຫວເປັນປົກກະຕິຢ່າງຮອບດ້ານ, ປະສິດທິຜົນນະໂຍບາຍທີ່ຮັກສາຄວາມໝັ້ນທ່ຽງດ້ານການເຕີບໂຕ, ການປະກອບອາຊີບ ແລະ ລາຄາສິນຄ້າໄດ້ປະກົດອອກເທື່ອລະກ້າວ, ຄວາມຕ້ອງການຂອງຕະຫຼາດໄດ້ຮັບການຟື້ນຟູ, ການສະໜອງດ້ານການຜະລິດເພີ່ມຂຶ້ນຢ່າງຕໍ່ເນື່ອງ, ຄຸນນະພາບການພັດທະນາດ້ານເສດຖະກິດຂອງຈີນໄດ້ສືບຕໍ່ຍົກສູງຂຶ້ນ, ເສດຖະກິດແຫ່ງຊາດໄດ້ຮັບການຟື້ນຕົວຂຶ້ນຕາມທິດທາງທີ່ດີ.
ໃນ 6 ເດືອນຕົ້ນປີ 2023 ນີ້, ການເຕີບໂຕດ້ານເສດຖະກິດຂອງຈີນໄດ້ຟື້ນຄືນໂດຍລວມ ຊຶ່ງໂຕເລກລວມຍອດຜະລິດຕະພັນພາຍໃນ (GDP) ຂອງປະເທດ ໄດ້ເພີ່ມຂຶ້ນ 5,5% ເມື່ອທຽບໃສ່ໄລຍະດຽວກັນຂອງປີ 2022 ຊຶ່ງໄວກວ່າຈັງຫວະການເຕີບໂຕດ້ານເສດຖະກິດລະດັບ 3% ຂອງທັງໝົດປີ 2022 ແລະ ໄວກວ່າຈັງຫວະການເຕີບໂຕລະດັບ 4,5% ໃນໄຕມາດທີ 1 ຂອງປີ 2023 ນີ້. ທ່ານ ຟູ້ຫຼີງຮຸ່ຍ ໂຄສົກອົງການສະຖິຕິແຫ່ງຊາດຈີນໃຫ້ຮູ້ຕື່ມວ່າ: ນັບແຕ່ຕົ້ນປີ 2023 ເປັນຕົ້ນມາ, ການຟື້ນຟູດ້ານເສດຖະກິດຂອງໂລກອ່ອນແອ, ລະດັບເງິນເຟີ້ທົ່ວໂລກເພີ່ມສູງຂຶ້ນສົມຄວນ, ຜົນກະທົບຂະຫຍາຍອອກສູ່ພາຍນອກຈາກນະໂຍບາຍຮັດກຸມເງິນຕາຂອງອົງກອນເສດຖະກິດຕົ້ນຕໍມີຄວາມພົ້ນເດັ່ນຂຶ້ນ. ພາຍໃຕ້ສະພາບການພາຍນອກທີ່ຂ້ຽວຂາດ ແລະ ສະຫຼັບສັບຊ້ອນ, ຈັງຫວະການເຕີບໂຕຂອງເສດຖະກິດຈີນແມ່ນໄວກວ່າອົງກອນເສດຖະກິດຕົ້ນຕໍຂອງໂລກ ຊຶ່ງໄດ້ສະແດງໃຫ້ເຫັນເຖິງຄວາມໝັ້ນໜຽວຢ່າງແຂງແຮງໃນດ້ານການພັດທະນາຂອງເສດຖະກິດຈີນ.
