ໃນພາກເຊົ້າ ຂອງການດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 18 ກໍລະກົດ 2023 ໂດຍການເປັນປະທານ ຂອງທ່ານ ໄຊສົມພອນ ພົມ ວິຫານ ປະທານສະພາແຫ່ງຊາດ, ບັນດາສະ ມາຊິກສະພາແຫ່ງຊາດ(ສສຊ) ໄດ້ສຸມໃສ່ປະກອບຄຳເຫັນຢ່າງກົງໄປກົງມາ ແລະ ລົງຄະແນນສຽງ ຮັບຮອງເອົາ 3 ຮ່າງຍຸດທະສາດສຳຄັນຂອງລັດຖະບານ ຄື: ຮ່າງຍຸດທະ ສາດພັດທະນາແຮ່ທາດ 10 ປີ(2021-2023) ແລະ ວິໄສທັດຮອດປີ 2035; ຍຸດທະສາດການຄຸ້ມຄອງນ້ຳ ແລະ ຊັບ ພະຍາກອນນ້ຳແຫ່ງຊາດ ຮອດປີ 2030; ການຈັດຕັ້ງປະຕິ ບັດຍຸດທະສາດການປົກປ້ອງສັງຄົມ ດ້ວຍຄະແນນສຽງເຫັນດີ ເປັນສ່ວນຫລາຍ. ພ້ອມນັ້ນ ຍັງໄດ້ຮັບ ຮອງເອົາຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບ ຮອງເອົາບົດລາຍງານ ຂອງຄະນະປະຈຳສະພາແຫ່ງຊາດ ກ່ຽວກັບການຈັດຕັ້ງປະຕິບັດ ແຜນການເຄື່ອນໄຫວວຽກ ງານໄລຍະ 2 ກອງປະຊຸມທີ່ຜ່ານມາ ແລະ ທິດທາງແຜນ ການ 6 ເດືອນ, ແຕ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX ຮອດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ IX.
ສຳລັບ ພາກບ່າຍຈະມີການສະເໜີ ຮ່າງມະຕິກອງປະຊຸມສະພາແຫ່ງຊາດ 2 ສະບັບ ຄື: ລາຍງານການປັບປຸງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023, ທິດທາງການລົງທຶນຂອງລັດ ປະຈຳປີ 2024 ແລະ ລາຍງານກ່ຽວກັບການປັບ ປຸງຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2023.
ຫລັງຈາກນັ້ນ ປະທານກອງປະຊຸມ ຈະໄດ້ສະຫລຸບສັງລວມການປະກອບຄຳເຫັນຂອງ ສສຊ ແລະ ສະເໜີລົງຄະແນນສຽງ ຮັບຮອງເອົາ 2 ຮ່າງມະຕິ ກອງປະຊຸມສະພາແຫ່ງຊາດ ແລະ ກ່າວສູນທອນພົດ ປິດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ຢ່າງເປັນທາງການ.
ຂ່າວ: ທະນູທອງ ພາບ: ອ່າຍຄຳ
