ໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 17 ກໍລະກົດ 2023 ນີ້ ໂດຍການເປັນປະທານຂອງທ່ານ ໄຊສົມພອນ ພົມວິຫານ ປະ ທານສະພາແຫ່ງຊາດ, ບັນດາສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງຕ່າງໆ ໄດ້ສຸມໃສ່ພິຈາລະນາ, ປະກອບຄຳຄິດ ຄຳເຫັນ ຢ່າງກົງໄປກົງມາ ແລະ ລົງ ຄະ ແນນສຽງຮັບຮອງເອົາຮ່າງກົດໝາຍ ຈຳນວນ 10 ສະບັບ ຂອງລັດຖະບານ, ດ້ວຍຄະແນນສຽງເຫັນດີເປັນສ່ວນຫລາຍ. ໃນນັ້ນ, ກົດໝາຍສະບັບສ້າງຂຶ້ນໃໝ່ 4 ສະບັບ ແລະ ກົດໝາຍສະບັບປັບປຸງ 6 ສະບັບ ເຊິ່ງໂດຍລວມແລ້ວ ບັນດາ ສສຊ ແມ່ນເຫັນດີເປັນເອກະພາບຕໍ່ໂຄງສ້າງ ແລະ ເນື້ອໃນ ຂອງບັນດາກົດໝາຍດັ່ງກ່າວ, ພ້ອມທັງເຫັນວ່າຖືກຕ້ອງ, ຄົບຖ້ວນ, ຮັດກຸມ ແລະ ສາມາດນຳໄປຈັດຕັ້ງປະຕິບັດ ຢ່າງມີປະສິດທິພາບ ແລະ ປະສິດທິຜົນ ໃນຕໍ່ໜ້າ.
ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ ໄດ້ຖະແຫລງຜົນການພິຈາລະນາ ຮັບຮອງເອົາກົດໝາຍ ຈໍານວນ 10 ສະບັບດັ່ງກ່າວ ເຊິ່ງປະກອບມີກົດໝາຍສ້າງໃໝ່ 4 ສະບັບ ຄື: ກົດໝາຍ ວ່າດ້ວຍອາກອນທີ່ດິນ, ກົດ ໝາຍ ວ່າດ້ວຍເຍົາວະຊົນລາວ, ກົດໝາຍ ວ່າດ້ວຍການຈັດຫາງານ ແລະ ກົດໝາຍ ວ່າດ້ວຍສາທາລະນະສຸກ. ສຳລັບ ກົດໝາຍປັບປຸງ 6 ສະບັບ ປະກອບມີ: ກົດໝາຍວ່າດ້ວຍທະນາຄານທຸລະກິດ, ກົດໝາຍ ວ່າດ້ວຍສານທະຫານ, ກົດໝາຍ ວ່າດ້ວຍສັດນໍ້າ ແລະ ການປະມົງ, ກົດໝາຍ ວ່າດ້ວຍສັດປ່າ, ກົດໝາຍ ວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ ແລະ ກົດໝາຍ ວ່າດ້ວຍການພິມຈໍາໜ່າຍ.
ການພິຈາລະນາ ແລະ ຮັບຮອງເອົາກົດໝາຍ 10 ສະ ບັບນີ້ ແມ່ນຜົນສໍາເລັດທີ່ສໍາຄັນໃນການ ຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ ແຕ່ປີ 2023-2025, ທັງເປັນການປະກອບສ່ວນສໍາຄັນ ໃນການປັບປຸງ ແລະ ເພີ່ມທະວີພາຫະນະໃນການຄຸ້ມຄອງລັດ, ຄຸ້ມຄອງເສດຖະ ກິດ-ສັງຄົມ ຂອງປະເທດເຮົາ ໃຫ້ເປັນລະບົບຄົບຊຸດຂຶ້ນຕື່ມ ເພື່ອຮັບປະກັນປົກປ້ອງສິດ ແລະ ຜົນປະໂຫຍດຂອງຊາດ, ຂອງລັດ, ລວມໝູ່, ບຸກຄົນ, ນິຕິບຸກຄົນ ແລະ ປະຊາ ຊົນລາວບັນດາເຜົ່າ; ສະກັດກັ້ນ ແລະ ຕ້ານບັນດາປະກົດ ການຫຍໍ້ທໍ້ ທີ່ເປັນພຶດຕິກໍາລະເມີດກົດໝາຍ ຢູ່ໃນສັງຄົມ, ປະກອບສ່ວນໃນການສ້າງລັດເຮົາໃຫ້ເປັນລັດປະຊາທິປະ ໄຕ ທີ່ປົກຄອງດ້ວຍກົດໝາຍໃຫ້ເຂັ້ມງວດຂຶ້ນ. ບັນດາກົດ ໝາຍເຫລົ່ານັ້ນ ເຖິງວ່າໄດ້ຮັບຮອງເອົາແລ້ວກໍຕາມ ກໍາມາທິການກົດໝາຍ ຍັງຈະໄດ້ສືບຕໍ່ສົມທົບກັບບັນດາກໍາມາທິການທີ່ກ່ຽວຂ້ອງ ຂອງສະພາແຫ່ງຊາດ, ຄະນະຮັບຜິດ ຊອບແຕ່ລະກົດໝາຍ ແລະ ພາກສ່ວນທີ່ກ່ຽວຂ້ອງ ປັບປຸງ, ຮຽບຮຽງໃຫ້ສໍາເລັດສົມບູນ ເພື່ອລາຍງານຄະນະປະຈໍາສະ ພາແຫ່ງຊາດ ກ່ອນສະເໜີທ່ານປະທານປະເທດ ພິຈາລະ ນາ ອອກລັດຖະດໍາລັດປະກາດໃຊ້ ຢ່າງເປັນທາງການ ຕາມລະບຽບການທີ່ກໍານົດໄວ້.
ພາຍຫລັງກົດໝາຍຈຳນວນ 10 ສະບັບນີ້, ຖືກປະກາດໃຊ້ຢ່າງເປັນທາງການ ຈະເປັນຜົນດີ ແລະ ເປັນບ່ອນອີງທີ່ສຳ ຄັນ ໃຫ້ແກ່ການຈັດຕັ້ງປະຕິບັດ ວຽກງານຕ່າງໆຂອງບັນ ດາກະຊວງ, ຂະແໜງການ ທີ່ກ່ຽວຂ້ອງ ດຳເນີນໄປຢ່າງໂລ່ງລ່ຽນ, ສອດຄ່ອງກັບສະພາບຄວາມເປັນຈິງໃນປັດຈຸ ບັນ ແລະ ແນວທາງນະໂຍບາຍທີ່ ພັກ, ລັດ ວາງອອກ.
ຂ່າວ: ທະນູທອງ ພາບ: ອ່າຍຄຳ
