ໃນພາກບ່າຍ ຂອງການດຳເນີນ ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ວັນທີ 12 ກໍລະກົດ 2023 ພາຍໃຕ້ການເປັນປະທານຂອງ ທ່ານ ພົທ ສຸວອນ ເລືອງບຸນມີ ຮອງປະທານສະພາແຫ່ງຊາດ, ທ່ານ ພົທ ທອງລອຍ ສິລິວົງ ຮອງລັດຖະມົນຕີກະຊວງປ້ອງກັນປະເທດ ໄດ້ສະເໜີຮ່າງກົດໝາຍ ວ່າດ້ວຍສານທະຫານ ສະບັບປັບປຸງ ເພື່ອໃຫ້ສະມາຊິກສະພາແຫ່ງຊາດ ຄົ້ນຄວ້າ, ປະກອບຄຳຄິດເຫັນໃສ່ ຮ່າງກົດໝາຍດັ່ງກ່າວ ໃຫ້ມີເນື້ອຄົບຖ້ວນ, ສົມບູນ, ຮັດກຸມ ແລະ ສາມາດນຳໄປຈັດຕັ້ງປະຕິບັດ ສອດຄ່ອງກັບສະພາບຄວາມເປັນຈິງໃນປັດຈຸບັນ.
ທ່ານ ພົທ ທອງລອຍ ສິລິວົງ ໄດ້ໃຫ້ຮູ້ວ່າ: ຮ່າງກົດໝາຍ ວ່າດ້ວຍສານທະຫານ ສະບັບປັບປຸງ ປະກອບມີ IX ພາກ, 5 ໝວດ, 68 ມາດຕາ. ໃນນີ້, ຮັກສາໄວ້ 15 ມາດຕາ, ເພີ່ມໃໝ່ 8 ມາດຕາ, ປັບປຸງ 45 ມາດຕາ. ໃນຂະນະທີ່ ກົດໝາຍ ວ່າດ້ວຍສານທະຫານ ສະບັບທຳອິດ ຖືກຮັບຮອງ ແລະ ປະກາດໃຊ້ໃນຕົ້ນປີ 2014 ເຊິ່ງປະກອບມີ IX ພາກ, 5 ໝວດ, 58 ມາດຕາ. ຜ່ານການຈັດຕັ້ງປະຕິບັດຕົວຈິງໃນ 9 ປີ ຜ່ານມາ, ເຫັນວ່າ ຍັງມີຫລາຍບັນຫາທີ່ຈະຕ້ອງໄດ້ປັບປຸງ ເພື່ອໃຫ້ສອດຄ່ອງກັບສະພາບຕົວຈິງ ຂອງການຂະຫຍາຍຕົວຂອງກອງທັບປະຊາຊົນລາວ. ສະນັ້ນ ກະຊວງປ້ອງກັນປະ ເທດ ຈຶ່ງໄດ້ຄົ້ນຄວ້າ ແລະ ຖອດຖອນບົດຮຽນ ກ່ຽວກັບວຽກງານສານທະຫານ ທັງພາຍໃນ ແລະ ຕ່າງ ປະເທດ ໂດຍສະເພາະ ປະເທດເພື່ອນມິດຍຸດທະສາດ ເພື່ອນໍາມາເປັນຂໍ້ມູນ ໃນການປັບປຸງກົດໝາຍສະບັບນີ້.
ສຳລັບ ເຫດຜົນ ແລະ ຄວາມຈຳເປັນ ໃນການປັບປຸງກົດໝາຍສະບັບນີ້ ເພື່ອໃຫ້ສອດຄ່ອງກັບແນວທາງຂອງພັກ ໃນໄລຍະໃໝ່, ລັດຖະທຳມະນູນ, ກົດໝາຍອື່ນທີ່ກ່ຽວຂ້ອງ ແລະ ສອດຄ່ອງ ກັບສະພາບການເຕີບໃຫຍ່ຂະຫຍາຍຕົວຂອງກອງທັບປະຊາຊົນລາວ ແລະ ເພື່ອໃຫ້ສອດຄ່ອງກັບກົດໝາຍ ວ່າດ້ວຍອົງການໄອຍະການທະຫານ(ສະບັບປັບປຸງ) ແລະ ກົດໝາຍອື່ນທີ່ກ່ຽວຂ້ອງ ເປັນຕົ້ນ ກົດໝາຍວ່າດ້ວຍສານປະຊາຊົນ, ກົດໝາຍ ວ່າດ້ວຍການດໍາເນີນຄະດີອາຍາ, ກົດໝາຍ ວ່າດ້ວຍຜູ້ພິພາກສາ, ກົດໝາຍ ວ່າດ້ວຍການປ້ອງກັນຊາດ, ກົດໝາຍ ວ່າດ້ວຍນາຍທະຫານ.
ພາຍຫລັງ, ຮ່າງກົດໝາຍ ວ່າດ້ວຍສານທະຫານ ສະບັບປັບປຸງ ຖືກຮັບຮອງ ແລະ ປະກາດໃຊ້ແລ້ວ, ຄາດວ່າຈະເປັນບ່ອນອີງທີ່ສໍາຄັນ ໃນການເຄື່ອນໄຫວວຽກງານ ຂອງສານທະຫານ ເຮັດໃຫ້ການພິຈາລະນາຕັດສິນ ແລະ ພິພາກສາຄະດີ ໃຫ້ມີຄວາມຖືກຕ້ອງ, ໂປ່ງໄສ, ຍຸຕິທຳ ສອດຄ່ອງກັບແນວ ທາງນະໂຍບາຍຂອງພັກ ໃນໄລຍະໃໝ່, ລັດຖະທຳມະນູນ ແລະ ກົດໝາຍອື່ນທີ່ໄດ້ປັບປຸງ, ທັງເຮັດໃຫ້ກົດໝາຍ ມີເນື້ອໃນຄົບຖ້ວນ, ຊັດເຈນ ແລະ ສອດຄ່ອງກັບສະພາບ ການຂະຫຍາຍຕົວຂອງກອງທັບ, ເສດຖະກິດ-ສັງຄົມ. ພ້ອມກັນນີ້, ສານທະຫານ ຈະໄດ້ຮັບການປັບປຸງທາງດ້ານໂຄງປະກອບການຈັດ ຕັ້ງ, ກົງຈັກບໍລິຫານ, ຂັ້ນການພິຈາລະນາຄະດີ, ສິດ ແລະ ໜ້າທີ່ ຂອງສານທະຫານແຕ່ລະຂັ້ນ ເພື່ອເຮັດໃຫ້ການເຄື່ອນໄຫວວຽກງານ ມີຄວາມສະດວກ, ສາມາດປະຕິບັດໜ້າທີ່ຂອງຕົນໄດ້ຢ່າງເຕັມສ່ວນ ຕາມທີ່ໄດ້ກໍານົດໄວ້ໃນກົດໝາຍ.
ຂ່າວ: ທະນູທອງ
ພາບ: ສຸກສະຫວັນ
