ທ່ານ ນາງ ເຂັມມະນີ ພົນເສນາ ຫົວໜ້າຫ້ອງວ່າການສໍານັກງານປະທານປະເທດ (ຫສປທ) ໄດ້ຕ້ອນຮັບການເຂົ້າຢ້ຽມຂ່ຳນັບອາລາ ຂອງທ່ານ ປີເຕີ ເຮມອນ (Peter M. Haymond) ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງສະຫະລັດອາເມຣິກາ ປະຈໍາ ສປປ ລາວ, ໃນໂອກາດສໍາເລັດ ໜ້າທີ່ການທູດຢູ່ລາວ, ໃນວັນທີ 12 ກໍລະກົດ ນີ້ ທີ່ ຫ້ອງຮັບແຂກ ຫສປທ.
ໃນໂອກາດດັ່ງກ່າວ, ທ່ານ ນາງ ເຂັມມະນີ ພົນເສນາ ໄດ້ສະແດງຄວາມຕ້ອນຮັບ, ຊົມເຊີຍ, ຕີລາຄາສູງຕໍ່ຜົນສໍາເລັດໃນການປະຕິບັດໜ້າທີ່ການທູດຢູ່ ສປປ ລາວ ຂອງທ່ານ ປີເຕີ ເຮມອນ ຈົນສໍາເລັດຜົນຢ່າງຈົບງາມ ຊຶ່ງເປັນການປະກອບສ່ວນເສີມສ້າງ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ລາວ-ອາເມຣິກາ, ອາເມຣິກາ-ລາວ ຂະຫຍາຍຕົວຍິ່ງໆຂຶ້ນ, ພ້ອມທັງສະແດງຄວາມຂອບໃຈຕໍ່ ທ່ານ ປີເຕີ ເຮມອນ ກໍຄື ສ ອາເມຣິກາ ທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ແກ່ ສປປ ລາວ ກໍຄື ປະຊາຊົນລາວ ໃນໄລຍະຜ່ານມາ ແລະ ອວຍພອນ ໃຫ້ທ່ານທູດ ຈົ່ງເດີນທາງກັບປະເທດດ້ວຍຄວາມສະຫວັດດີພາບ ແລະ ປະສົບຜົນສໍາເລັດໃນໜ້າທີ່ໃໝ່ຂອງທ່ານ.
ສ ປປ ລາວ – ສ ອາເມຣິກາ ໄດ້ສ້າງຕັ້ງສາຍພົວພັນການທູດນໍາກັນ ໃນເດືອນ 10 ສິງຫາ 1955. ໄລຍະຜ່ານມາ ການພົວພັນຮ່ວມມືສອງຝ່າຍ ລາວ-ອາເມຣິກາ ໄດ້ມີບາດກ້າວຂະຫຍາຍຕົວຢ່າງຕໍ່ເນື່ອງ (ໂດຍສະເພາະ ສອງຝ່າຍ ໄດ້ສືບຕໍ່ແລກປ່ຽນການຢ້ຽມຢາມ ຊຶ່ງກັນ ແລະ ກັນ ໃນລະດັບ ແລະ ຂະແໜງການຕ່າງໆ), ການຮ່ວມມື ລາວ-ອາເມຣິກາ ໄດ້ສະແດງອອກ ຄື: ການຮ່ວມມືວຽກງານ ຊອກຄົ້ນຫາສິ່ງເສດເຫຼືອ ຂອງທະຫານອາເມຣິກາ ທີ່ຫາຍສາບສູນໃນປາງສົງຄາມຢູ່ລາວ, ການຮ່ວມມື ດ້ານການປາບປາມຢາເສບຕິດ, ການຮ່ວມມືດ້ານການບັງຄັບໃຊ້ກົດໝາຍ, ດ້ານການເກັບກູ້ລະເບີດຝັງດິນບໍ່ທັນແຕກ, ການພົວພັນ ແລະ ການຮ່ວມມືດ້ານການທະຫານ, ການຮ່ວມມືດ້ານການຄ້າ ແລະ ການລົງທຶນ, ດ້ານສາທາລະນະສຸກ, ດ້ານການສຶກສາ, ການຊ່ວຍເຫຼືອດ້ານວັດທະນະທໍາ-ສັງຄົມ, ການຮ່ວມມືດ້ານພະລັງງານ.
ໃນວັນດຽວກັນ, ທ່ານ ນາງເຂັມມະນີ ພົນເສນາ, ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ນາງ Maria Renata Caldas deJesus ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ປະຈໍາ ສປປ ລາວ, ທີ່ຫ້ອງຮັບແຂກ ຫສປທ.
(ຂ່າວ: ແສງຈັນ)
