ຕາມຂ່າວຈາກວິທະຍຸສາກົນຫວຽດນາມ ເມື່ອບໍ່ດົນມານີ້ກຸ່ມ 7 ປະເທດອຸດສາຫະກຳພັດທະນາ (G7) ໄດ້ໃຫ້ຄຳໝັ້ນ ສັນຍາຈະປະຕິບັດບັນດາມາດຕະການລົບລ້າງຊ່ອງຫວ່າງ ລະຫວ່າງ ຍິງ-ຊາຍ ໃນຂົງເຂດເສດຖະກິດຜ່ານການເພີ່ມທະວີ ການມອບສິດໃຫ້ແກ່ແມ່ຍິງ, ພ້ອມທັງຍອມຮັບຜົນກະທົບຫຍໍ້ທໍ້ ຂອງພະຍາດລະບາດໂຄວິດ-19 ສຳລັບຄວາມສະເໝີພາບ ລະຫວ່າງຍິງ-ຊາຍ. ພາຍຫລັງຈັດກອງປະຊຸມຢູ່ຍີ່ປຸ່ນ ໂດຍບັນດາລັດຖະມົນຕີຮັບຜິດຊອບຄວາມສະເໝີພາບ ລະຫວ່າງຍິງ-ຊາຍ G7 ເຫັນດີເປັນເອກະພາບສືບຕໍ່ມານະພະຍາຍາມເພື່ອສ້າງສັງຄົມທີ່ສິດທິມະນຸດ ແລະ ຄວາມສະເໝີພາບລະຫວ່າງ ຍິງ – ຊາຍ ໄດ້ຮັບຄວາມເຄົາລົບໃຫ້ປະກົດຜົນເປັນຈິງ. ນີ້ແມ່ນຄັ້ງທຳອິດທີ່ຍີ່ປຸ່ນ ຈັດກອງປະຊຸມ G7 ທີ່ກ່ຽວຂ້ອງເຖິງບັນດາ ບັນຫາລະຫວ່າງຍິງ – ຊາຍ, ໃນສະພາບການທີ່ຍີ່ປຸ່ນ ແມ່ນປະເທດທີ່ມີສະພາບຂາດຄວາມສະເໝີພາບລະຫວ່າງຍິງ – ຊາຍ ສູງສຸດໃນກຸ່ມບັນດາປະເທດພັດທະນາ.
(ບັນນາທິການຂ່າວ: ຕ່າງປະເທດ)
ຮຽບຮຽງ ຂ່າວໂດຍ: ສະໄຫວ ລາດປາກດີ
