ອ້າງຕາມຂ່າວປັກກິ່ງ ຂອງຈີນ ວັນທີ 20 ມິຖຸນາ ຈີນ ໄດ້ປັບຫລຸດອັດຕາດອກເບ້ຍເງິນກູ້ຢືມເປັນຄັ້ງທຳອິດ ໃນຮອບ 10 ເດືອນ ເພື່ອຊອກຫາວິທີກະຕຸ້ນການຟື້ນຟູເສດຖະກິດທີ່ຊ້າລົງ. ຄາດວ່າຈະມີມາດຕະການກະຕຸ້ນເສດຖະກິດເພີ່ມຂຶ້ນຕື່ມອີກ. ທະນາຄານປະຊາຊົນຈີນ ຊຶ່ງເປັນທະນາຄານກາງ ໄດ້ປະກາດຫລຸດອັດຕາດອກເບ້ຍເງິນກູ້ລູກຄ້າຊັ້ນດີ (loan prime rate) ໃນໄລຍະເວລາ 1 ປີ ຫລຸດລົງ 0,10% ເຫລືອ 3,55% ແລະ ໄລຍະເວລາ 5 ປີ ຫລຸດລົງ 0,10% ເຫລືອ 4,20% ຫລັງຈາກທີ່ໄດ້ປັບຫລຸດອັດຕາດອກເບ້ຍເງິນກູ້ໄລຍະສັ້ນ ແລະ ໄລຍະກາງເມື່ອອາທິດຜ່ານມາ. ສິ່ງດັ່ງກ່າວໄດ້ສະແດງໃຫ້ເຫັນວ່າ: ທະນາຄານກາງຈີນ ຈະອອກມາດຕະການຫລຸດຜ່ອນທາງດ້ານການເງິນໃນຮອບໃໝ່ເພື່ອກະຕຸ້ນການຟື້ນຕົວ ທາງເສດຖະກິດຫລັງຈາກຜ່ານພົ້ນໂຄວິດ-19 ທີ່ເຮັດໃຫ້ການຟື້ນຕົວຊ້າລົງ ແລະ ມີການຂັບເຄື່ອນທີ່ດີໃນໄຕມາດທຳອິດ ຂອງປີນີ້.
