ການແຂ່ງຂັນເຕະບານ ຢູຟາ ເນຊັນເນວ ລີກ 2022-2023 ຮອບຊີງຊະນະເລີດ ເມື່ອວັນທີ 18 ມິຖຸນາ ຜ່ານມາ ທີ່ສະໜາມ ສະຕາດິໂອນ ເຟເຢນູດ ເມືອງຣັອດເຕີດຳ ປະເທດໂຮນລັງ ເປັນການພົບກັນລະຫວ່າງ ທີມຊາດໂຄຣເອເຊຍ ທີ່ຮອບຮອງຊະນະເລີດ ເອົາຊະນະ ໂຮນລັງ ເຈົ້າພາບ ໃນໄລຍະຕໍ່ເວລາພິເສດ 4-2 ຫຼັງສະເໝີກັນໃນເວລາປົກກະຕິ 2-2 ເມື່ອວັນທີ 14 ມິຖຸນາ ຜ່ານມາ ພົບກັບ ທີມຊາດແອັດສະປາຍ ຮອງແຊ໋ມລາຍການນີ້ຄັ້ງທີ່ຜ່ານມາ ທີ່ຮອບຕັດເຊືອກ ເອົາຊະນະ ອີຕາລີ ໄປໄດ້ແບບຫວຸດຫວິດ 2-1 ໂດຍຄູ່ຊີງອັນດັບ 3 ທີ່ແຂ່ງຂັນໄປກ່ອນໜ້ານີ້ ອີຕາລີ ເອົາຊະນະ ໂຮນລັງ ໄປໄດ້ແບບສຸດມ່ວນ 3-2 ຄວ້າອັນດັບ 3 ສອງສະໄໝຊ້ອນ.
ເກມການແຂ່ງຂັນຕະຫຼອດ 90 ນາທີ ທັງສອງທີມມີໂອກາດຈົບສະກໍກັນໄດ້ບໍ່ຫຼາຍ ໂດຍ ແອັດສະປາຍ ທີ່ມີໂອກາດສ້າງເກມບຸກຫຼາຍກວ່າເຖິງ 15 ຄັ້ງ ແຕ່ປະກົດວ່າ ບານເຂົ້າຂອບພຽງຄັ້ງດຽວ ໃນຂະນະທີ່ ໂຄຣເອເຊຍ ມີໂອກາດລຸ້ນສະກໍ 6 ຄັ້ງ ແຕ່ເຂົ້າຂອບພຽງ 3 ຄັ້ງ ເຮັດໃຫ້ເກມຈົບລົງໄປແບບບໍ່ມີສະກໍເກີດຂຶ້ນ ສະເໝີກັນຢູ່ 0-0 ຕ້ອງໄປແຂ່ງຂັນໃນໄລຍະຕໍ່ເວລາພິເສດອີກ 30 ນາທີ ຊຶ່ງກໍບໍ່ຮູ້ຜົນໄດ້ເສຍ ສຸດທ້າຍຕ້ອງໄປຍິງຈຸດໂທດຕັດສິນ.
ຜົນການດວນຈຸດໂທດປະກົດວ່າ ແອັດສະປາຍ ແມ້ນກວ່າເອົາຊະນະ 5-4 ໂດຍການຍິງຈຸດໂທດຂອງທັງສອງປະກົດວ່າ 5 ຄົນທຳອິດຍິງພາດໄປເບື້ອງລະຄົນຄື ລອບໂຣເມເຢີ ຂອງໂຄຣເອເຊຍ ແລະ ເອມເມີຣິກ ລາປອກ ຂອງແອັດສະປາຍ ເຮັດໃຫ້ສະເໝີກັນ 4-4 ຕ້ອງໄປລຸ້ນຄົນທີ 6 ຊຶ່ງ ບຣູໂນ ເພດໂຄວິດ ຍິງໄປຕິດເຊັບຂອງ ອູໄນ ຊິໂມນ ເຮັດໃຫ້ ແອັດສະປາຍ ທີ່ຍິງທີ່ຫຼັງມີໂອກາດທັນທີກ່ອນທີ່ ດານີ ກາບາມານ ຈະຍິງເຂົ້າໄປ ສົ່ງຜົນໃຫ້ພວກເຂົາຄວ້າແຊ໋ມ ຢູຟາ ເນຊັນລີກ 2022-2023 ໄປຄອງ ແລະ ເປັນແຊ໋ມຄັ້ງທຳອິດຂອງ ແອັດສະປາຍ.
ຮຽບຮຽງໂດຍ: ພອນເພັດ ບຸນຄ້ຳ
