ຂຸນພົນນັກເຕະບານເຍົາວະຊົນ ທີມຊາດລາວ ຮຸ່ນອາຍຸບໍ່ເກີນ 17 ປີ ຫຼື ຢູ-17 ລົງສະໜາມນັດທີສອງຍັງສະກົດຄຳວ່າໄຊຊະນະບໍ່ເປັນ ຫຼັງເສຍໃຫ້ ທີມຊາດເຢເມນ ໄປແບບຫວຸດຫວິດ 1-2 ປະຕູ ໃນການແຂ່ງຂັນເຕະບານເຍົາວະຊົນຊາຍ ຮຸ່ນອາຍຸບໍ່ເກີນ 17 ປີ ຊີງແຊ໋ມອາຊີ ປະຈຳປີ 2023 ຫຼື ເອຊຽນ ຄັບ 2023 ຮອບສຸດທ້າຍ ທີ່ປະເທດໄທ ເປັນເຈົ້າພາບ.
ການແຂ່ງຂັນເຕະບານລາຍການດັ່ງກ່າວ ໄດ້ມີຂຶ້ນໃນຕອນຄ່ຳວັນທີ 18 ມິຖຸນາ 2023 ທີ່ສະໜາມກິລາທຳມະສາດ ຣັງສິດ ນະຄອນຫຼວງບາງກອກ ປະເທດໄທ ໂດຍເປັນການແຂ່ງຂັນຮອບແບ່ງກຸ່ມ ກຸ່ມ ເອ ນັດທີສອງ, ທີມຊາດລາວ ອັນດັບ 3 ຂອງກຸ່ມທີ່ຍັງບໍ່ທັນມີຈັກຄະແນນ ພົບກັບ ທີມຊາດເຢເມນ ອັນດັບ 2 ຂອງກຸ່ມ ມີ 3 ຄະແນນ ຈາກ 1 ນັດ.
ເກມນີ້, ທ່ານ ກັນລະຍາ ສີສົມຫວັງ ຫົວໜ້າຄູຝຶກທີມຊາດລາວ ຢູ-17 ທັງເປັນອະດີດກອງກາງທີມຊາດລາວ ຈັດທີມລົງສະໜາມ 11 ຕົວຈິງ ຜູ້ຮັກສາປະຕູ: ສຸລິສັກ ໝັ້ນປະເສີດ; ກອງຫຼັງ: ໄຊຍະສຸກ ແກ້ວວິສອນ, ສີສະຫວາດ ແກ້ວມຸງຄຸນ, ຂຸນວັງ ສອນດາລາ ແລະ ອາລິຍາກອນ ຟອງສະຫວັນ; ກອງກາງ: ສາຍຝົນ ແກ້ວຫານາມ ຫົວໜ້າທີມຈາກສະໂມສອນ ນົນທະບູລີ (ປະເທດໄທ), ຄູນທະວີ ທອງມະນີ ແລະ ເກດສະດາ ເດດກຸນມານ, ພູສົມບູນ ປັນຍາວົງ ແລະ ໄຊຍະຫວັດ ວັນສະຫວັດ. ສ່ວນໜ້າເປົ້າຍັງຄົງໃຊ້ງານ ປີເຕີ ພັນທະວົງ ກອງໜ້າຈາກສະໂມສອນ ເອສຣາ ເອັບຊີ ຊຶ່ງໃນນັດທຳອິດສາມາດຍິງປະຕູໃສ່ທີມຊາດໄທໄດ້.
ເລີ່ມເກມເຄິ່ງເວລາທຳອິດທັງສອງທີມຕ່າງກໍເປີດເກມເຂົ້າໃສ່ກັນ ແຕ່ມາເຖິງນາທີ 28 ກາຍເປັນທີມຊາດເຢເມນ ທີ່ໄດ້ປະຕູຂຶ້ນນຳໄປກ່ອນ 1-0 ຈາກການຍິງຂອງ ນັກກິລາໝາຍເລກ 18 ອາເດວ ສ່ວນເວລາທີ່ເຫຼືອທັງສອງທີມບໍ່ສາມາດຍິງປະຕູກັນໄດ້ເພີ່ມຈົບ 45 ນາທີ ທີມຊາດເຢເມນ ຍັງນຳ ທີມຊາດລາວ ຢູ່ 1-0.
ກັບເຂົ້າມາແຂ່ງຂັນຕໍ່ໃນເຄິ່ງເວລາທີສອງ ທີມຊາດລາວເຮົາ ແກ້ເກມມາດີ ເພາະເລີ່ມໄດ້ພຽງ 10 ນາທີ (ນາທີ 55) ກໍສາມາດຍິງປະຕູຕີສະເໝີເປັນ 1-1 ໄດ້ສຳເລັດຈາກຄວາມສາມາດສະເພາະຕົວຂອງ ພູສົມບູນ ປັນຍາວົງ ນັກເຕະຈາກສະໂມສອນ ກອງທັບ ເອັບຊີ ລາກບານຈາກປີກຊ້າຍໜີນັກເຕະເຢເມນເຂົ້າມາໜ້າເຂດໂທດ ກ່ອນຍິງດ້ວຍຂວາເຕັມຂໍ້ບານພຸ່ງສຽບສາມລ່ຽມເຂົ້າປະຕູໄປຢ່າງສວຍງາມ ເຖິງວ່າຜູ້ຮັກສາປະຕູທີມຊາດເຢເມນ ຈະພະຍາຍາມໂດດປັດແຕ່ກໍໄປບໍ່ເຖິງ.
ຢ່າງໃດກໍຕາມ, ເຖິງວ່າຈະຖືກຕີສະເໝີ ແຕ່ນັກເຕະທີມຊາດເຢເມນກໍບໍ່ຍອມງ່າຍໆ ມາເຖິງນາທີ 75 ກໍມາໄດ້ປະຕູຂຶ້ນນຳ ທີມຊາດລາວ ອີກຄັ້ງເປັນ 2-1 ຈາກການຍິງຂອງ ແອນວາ ສ່ວນເວລາທີ່ເຫຼືອເຖິງວ່າທັງສອງທີມຈະພະຍາຍາມເປີດເກມບຸກເຂົ້າໃສ່ກັນຢ່າງໜັກ ແຕ່ບໍ່ສາມາດຍິງປະຕູກັນໄດ້ເພີ່ມ ເຮັດໃຫ້ຈົບເກມ ທີມຊາດລາວ ເສຍ ທີມຊາດເຢເມນ ໄປແບບຫວຸດຫວິດ 1-2 ປະຕູ ສົ່ງຜົນໃຫ້ ທີມຊາດເຢເມນ ເກັບເພີ່ມເປັນ 6 ຄະແນນເຕັມ ຈາກສອງນັດ ແຕ່ຢູ່ອັນດັບ 2 ຂອງກຸ່ມ ເນື່ອງຈາກລູກໄດ້ເສຍເປັນຮອງ ທີມຊາດໄທ ເຈົ້າພາບ. ຂະນະທີ່ຈາກຜົນການແຂ່ງຂັນໃນນັດນີ້ເຮັດໃຫ້ທີມຊາດລາວເຮົາຍັງບໍ່ສາມາດເກັບຄະແນນໄດ້ເລີຍໃນລາຍການນີ້ ເສຍ 2 ນັດຊ້ອນ ຕົກຮອບຢ່າງເປັນທາງການແລ້ວ ເຖິງວ່າຈະເຫຼືອການແຂ່ງຂັນອີກ 1 ນັດກັບ ທີມຊາດມາເລເຊຍ ໃນວັນທີ 21 ມິຖຸນາ 2023 ເວລາ 19:00 ໂມງ ທີ່ສະໜາມກິລາ ທຳມະສາດ ຣັງສິດ.
ສະຫຼຸບຕາຕະລາງຄະແນນ ກຸ່ມ ເອ ຫຼັງຜ່ານໄປສອງນັດ ອັນດັບທີ 1 ທີມຊາດໄທ ເຈົ້າພາບ ມີ 6 ຄະແນນ, ອັນດັບທີ 2 ທີມຊາດເຢເມນ ມີ 6 ຄະແນນ ເທົ່າກັບເຈົ້າພາບ ແຕ່ລູກໄດ້ເສຍເປັນຮອງ, ອັນດັບທີ 3 ທີມຊາດລາວ ແລະ ອັນດັບທີ 4 ທີມຊາດມາເລເຊຍ ບໍ່ມີຈັກຄະແນນ.
ສຳລັບການແຂ່ງຂັນເຕະບານເຍົາວະຊົນຊາຍ ຮຸ່ນອາຍຸບໍ່ເກີນ 17 ປີ ຊີງແຊ໋ມອາຊີ ປະຈຳປີ 2023 ຮອບສຸດທ້າຍ ທີ່ປະເທດໄທ ຮັບກຽດເປັນເຈົ້າພາບ ລະຫວ່າງວັນທີ 15 ມິຖຸນາ ຫາ ວັນທີ 2 ກໍລະກົດ 2023 ໂດຍມີ 16 ທີມ ແບ່ງອອກເປັນ 4 ກຸ່ມ ຄື: ກຸ່ມ A: ໄທ ເຈົ້າພາບ, ເຢເມນ, ມາເລເຊຍ ແລະ ສປປ ລາວ; ກຸ່ມ B: ສ.ເກົາຫຼີ, ອີຣານ, ອັບການິດສະຖານ ແລະ ກາຕາ; ກຸ່ມ C: ທາຈິກິດສະຖານ, ອົດສະຕຣາລີ, ຊາອຸດິອາຣະເບຍ ແລະ ສປ ຈີນ; ກຸ່ມ D: ຍີ່ປຸ່ນ, ອິນເດຍ, ຫວຽດນາມ ແລະ ອຸຊະເບກິດສະຖານ. ຊຶ່ງລາຍການນີ້ ອັນດັບທີ 1-4 ແມ່ນຈະໄດ້ສິດໄປແຂ່ງຂັນເຕະບານຊາຍ ຮຸ່ນອາຍຸບໍ່ເກີນ 17 ປີ ຊີງແຊ໋ມໂລກ 2023.
ຂ່າວໂດຍ: ລູກນ້ຳເຊ ອິນທະດາລິນ
ພາບ: ສຕລ
