ພິທີມອບ-ຮັບ ໂຄງການກໍ່ສ້າງໂຮງຮຽນ 5 ແຫ່ງ ພາຍໃນເມືອງຮຸນ ແຂວງອຸດົມໄຊ ໄດ້ຈັດຂຶ້ນຢ່າງເປັນທາງການ ເມື່ອບໍ່ດົນມານີ້ ທີ່ໂຮງຮຽນ ມສ ເມືອງຮຸນ ໂດຍໃຫ້ກຽດກ່າວມອບຂຈອງທ່ານ ນາງ ຂັນແກ້ວ ນິດທະວົງ ປະທານ ບໍລິສັດ ໂຊກໄຊ ພັດທະນາກໍ່ສ້າງ ຈຳກັດຜູ້ດຽວ ແລະ ຕາງໜ້າກ່າວຮັບໂດຍທ່ານ ນາງ ນວມຄຳ ຈັນທະບູລີ ຮອງຫົວໜ້າກົມສາມັນສຶກສາ ກະຊວງສຶກສາທິການ ແລະ ກິລາ, ທັງເປັນຫົວໜ້າໂຄງການພັດທະນາການສຶກສາເພື່ອການຈ້າງງານ (EESDP), ເປັນກຽດເຂົ້າຮ່ວມມີ ທ່ານ ກິສອນ ແສນປັນຍາ ຮອງເຈົ້າເມືອງຮຸນ, ທ່ານ ສົມສັກ ສຸພິໄລ ຫົວໜ້າພະແນກສຶກສາທິການ ແລະ ກິລາ ແຂວງອຸດົມໄຊ ພ້ອມດ້ວຍຕາງໜ້າຈາກຫ້ອງການສຶກສາທິການ ແລະ ກິລາ ເມືອງຮຸນ, ບັນດາໂຮງຮຽນທີ່ໄດ້ຮັບທຶນ, ອົງການປົກຄອງບ້ານ, ແຂກເຊີນ, ຄູອາຈານ ແລະ ນ້ອງນັກຮຽນຢ່າງພ້ອມພຽງ.
ໃນພິທີ, ທ່ານ ອຸດອນ ນິດທະວົງ ຮອງປະທານບໍລິສັດ ໂຊກໄຊ ພັດທະນາກໍ່ສ້າງ ຈຳກັດຜູ້ດຽວ ໄດ້ລາຍງານການຈັດຕັ້ງປະຕິບັດການກໍ່ສ້າງໂຮງຮຽນ 5 ແຫ່ງໂດຍຫຍໍ້ ຊຶ່ງມີເນື້ອໃນບາງຕອນກ່າວວ່າ: ໂຄງການກໍ່ສ້າງໂຮງຮຽນ 5 ແຫ່ງ ທີ່ເມືອງຮຸນ ແມ່ນທຶນກູ້ຢືມຈາກທະນາຄານພັດທະນາອາຊີ (ADB), ໄດ້ເລີ່ມລົງມືກໍ່ສ້າງແຕ່ວັນທີ 24 ກຸມພາ 2021 ໂດຍມີໂຮງຮຽນ 5 ແຫ່ງພາຍໃນເມືອງຮຸນ ຄື: ມສ ເມືອງຮຸນ, ມສ ດອນເມືອງ, ມ.ຕົ້ນ ບ້ານນາ, ມ.ຕົ້ນ ວັງລ່ຳ ແລະ ມ.ຕົ້ນ ມົກພອດ.
ການກໍ່ສ້າງປະກອບມີ ຫ້ອງຮຽນ, ຫໍພັກ, ຫ້ອງການ, ຫໍສະມຸດ ແລະ ຫ້ອງທົດລອງ, ມີມູນຄ່າໃນການກໍ່ສ້າງທັງໝົດ 9 ຕື້ກວ່າກີບ ໂດຍແມ່ນບໍລິສັດ ໂຊກໄຊພັດທະນາກໍ່ສ້າງ ຈຳກັດຜູ້ດຽວ ເປັນຜູ້ຮັບເໝົາ ຊຶ່ງມາຮອດປະຈຸບັນແມ່ນສຳເລັດ 100%. ໃນໄລຍະການຈັດຕັ້ງປະຕິບັດໂຄງການກໍ່ສ້າງ ແມ່ນເຫັນວ່າມີຂໍ້ສະດວກ ແລະ ຂໍ້ຫຍຸ້ງຍາກຫຼາຍດ້ານ ເປັນຕົ້ນແມ່ນ ການລະບາດຂອງພະຍາດໂຄວິດ-19, ນ້ຳມັນຂາດຕະຫຼາດ, ນ້ຳມັນແພງ, ອັດຕາເງິນເຟີ້ສູງ ຊຶ່ງເປັນສາເຫດເຮັດໃຫ້ການກໍ່ສ້າງພົບຄວາມຫຍຸ້ງຍາກ ແລະ ມີຄວາມຫຼ້າຊ້າ.
ຫຼັງຈາກນັ້ນ, ທ່ານ ນາງ ນວມຄໍາ ຈັນທະບູລີ ໄດ້ກ່າວມອບອາຄານຮຽນ 5 ແຫ່ງໃຫ້ຂັ້ນເມືອງ ເພື່ອນຳໃຊ້ ແລະ ປົກປັກຮັກສາໃຫ້ເກີດປະໂຫຍດ ແລະ ສາມາດນຳໃຊ້ຍາວນານທີ່ສຸດ.
ຮຽບຮຽງໂດຍ ດາວຫວຽດ
