ຂ່າວຕ່າງປະເທດລາຍງານ ໃນວັນທີ 14 ມິຖຸນາ ຜ່ານມາ, ສຳນັກງານສິ່ງແວດລ້ອມເອີຣົບ (EEA) ໄດ້ເປີດເຜີຍບົດລາຍງານໂດຍລະບຸວ່າ: ສະພາບອາກາດຮຸນແຮງທີ່ເກີດຂຶ້ນໃນສະຫະພາບເອີຣົບ (EU) ເຮັດໃຫ້ມີຜູ້ເສຍຊີວິດເກືອບ 2 ແສນຄົນ ແລະ ສ້າງຄວາມສູນເສຍທາງດ້ານເສດຖະກິດຫຼາຍກວ່າ 560.000 ລ້ານເອີໂຣ ນັບຕັ້ງແຕ່ປີ 1980.
EEA ລະບຸໃນບົດລາຍງານວ່າ ມີຜູ້ເສຍຊີວິດຈຳນວນ 195.000 ຄົນ ຈາກເຫດການອຸທົກກະ ໄພ, ພາຍຸ, ຄື່ນຄວາມຮ້ອນ, ຄື່ນຄວາມໜາວ, ໄຟປ່າ ແລະ ດິນຖະຫຼົ່ມ ໃນລະຫວ່າງປີ 1980-2021 ຊຶ່ງຄວາມເສຍຫາຍຄິດເປັນມູນຄ່າ ປະມານ 560.000 ລ້ານເອີໂຣ ມີພຽງ 170.000 ລ້ານເອີໂຣເທົ່ານັ້ນທີ່ໄດ້ຮັບການຮັບປະກັນ. ທ່ານນາງ ອະເລັກຊານດຣາ ແຄດເມຊັດ ຜູ້ຊ່ຽວຊານຂອງ EEA ກ່າວວ່າ: ເພື່ອປ້ອງກັນຄວາມສູນເສຍ ພວກເຮົາຈຳເປັນຕ້ອງປ່ຽນຈາກການຕອບສະໜອງຕໍ່ເຫດການສະພາບອາກາດຮ້ອນແຮງ ເປັນການກຽມຄວາມພ້ອມໃນຮູບແບບເລັ່ງດ່ວນ. ໂດຍອີງຕາມຂໍ້ມູນຫຼ້າສຸດ ຄື່ນຄວາມຮ້ອນມີອັດຕາສ່ວນໃນການເສຍຊີວິດຢູ່ທີ່ 81% ແລະ ຄວາມສູນເສຍທາງການເງິນຢູ່ທີ່ 15% ຊຶ່ງ EEA ລະບຸວ່າ: EU ຈຳເປັນຕ້ອງໃຊ້ມາດຕະການຕ່າງໆ ເພື່ອຄຸ້ມຄອງປະຊາກອນຜູ້ສູງອາຍຸ ໂດຍສະເພາະຜູ້ສູງອາຍຸທີ່ອ່ອນໄຫວຕໍ່ຄວາມຮ້ອນ ເພາະເຖິງແມ່ນວ່ານະໂຍບາຍການປັບຕົວລະດັບຊາດ ແລະ ຍຸດທະສາດດ້ານສຸຂະພາບສ່ວນຫຼາຍນຶກເຖິງຜົນກະທົບທີ່ຄວາມຮ້ອນມີຕໍ່ລະບົບຫົວໃຈ ແລະ ຫຼອດເລືອດກັບລະບົບທາງເດີນຫາຍໃຈ ແຕ່ມາດຕະການທີ່ຄວບຄຸມຜົນກະທົບໂດຍກົງມາຈາກຄວາມຮ້ອນກັບມີບໍ່ເຖິງເຄິ່ງໜຶ່ງ. ເມື່ອເດືອນກຸມພາ 2022 EEA ກ່າວວ່າ: ສະພາບອາກາດທີ່ຮຸນແຮງເຮັດໃຫ້ຜູ້ຄົນເສຍຊີວິດປະມານ 142.000 ຄົນ ແລະ ສ້າງຄວາມເສຍຫາຍ 510.000 ລ້ານເອີໂຣ ໃນລະຫວ່າງປີ 1980-2020 ຊຶ່ງການເພີ່ມຂຶ້ນຂອງໂຕເລກທີ່ເຜີຍແຜ່ຫຼ້າສຸດສ່ວນໜຶ່ງເປັນຜົນມາຈາກອຸທົກກະໄພໃນເຢຍລະມັນ ແລະ ແບນຊິກ ໃນປີ 2021 ສົ່ງຜົນໃຫ້ເກີດຄວາມສູນເສຍທາງດ້ານເສດຖະກິດເກືອບ 50.000 ລ້ານເອີໂຣ.
ນອກຈາກນີ້, ການປ່ຽນແປງສະພາບອາກາດທີ່ເກີດຈາກມະນຸດ ຍັງເພີ່ມຄວາມສ່ຽງຂອງການເກີດໄພແຫ້ງແລ້ງ 5 ຫຼື 6 ເທົ່າໃນປີ 2022 ແລະ ຄວາມສູນເສຍທາງດ້ານເສດຖະກິດອາດຈະເພີ່ມຈາກ 9.000 ລ້ານເອີໂຣຕໍ່ປີ ໃນປັດຈຸບັນເປັນ 25.000 ລ້ານເອີໂຣ ໃນໄລຍະທ້າຍສະຕະວັດນີ້ ຖ້າຫາກໂລກຮ້ອນຂຶ້ນອີກ 1,5 ອົງສາ. EEA ກ່າວຕື່ມວ່າ: ຜົນກະທົບສໍາລັບພາກການກະເສດອາດຈະຮຸ່ນແຮງຖ້າຫາກບໍ່ມີການປ່ຽນແປງ. ຜົນຜະລິດ ແລະ ລາຍໄດ້ຜົນຜະລິດຈາກການກະເສດຄາດວ່າຈະຫຼຸດລົງອີກໃນອະນາຄົດ.
